Jeremia 15:1-21
15 Kenca si e nina Jahwe man bangku, “Amin pe tedis Musa ras Samuel i lebe-lebeKu,+ labo ateKu mekuah bangsa enda. Suruh kalak e lawes arah lebe-lebeKu. Pediat kalak e lawes.
2 Adi sungkun kalak e kam, ‘Ku ja kami arus lawes?’ kataken man kalak e, ‘Bagenda nina Jahwe,
“Kalak si mate perban penakit, matelah ia perban penakit!
Kalak si mate perban pedang, matelah ia perban pedang!+
Kalak si mate perban kelihen, matelah ia perban kelihen!
Kalak si mate perban itaban, matelah ia perban itaban!”’+
3 “‘Kuban pagi terjadi empat bencana* man kalak e,’+ nina Jahwe, ‘pedang guna munuh, biang guna naren, perik-perik i langit ras binatang liar i doni guna mangani ras ngancurken.+
4 Mbiar pagi Kuban kerina kerajan i doni+ ngidah kai si terjadi man kalak e. Si e terjadi perban kai si enggo ilakoken Manase anak Hiskia raja Juda i Jerusalem.+
5 O Jerusalem, ise pagi si rate mekuah man bandu?
Ise pagi si rate ceda perban kam?
Ise pagi si singgah nungkun beritandu?’
6 ‘Tadingkenndu Aku,’ nina Jahwe.+
‘Lalap pudikenndu Aku.*+
Emaka Kududurken pagi tanKu janah Kuhancurken kam.+
Enggo bosan Aku rate mekuah man bandu.
7 Kupiari pagi kalak e i gerbang negri enda.
Kurampok pagi anak-anak kalak e.+
Kukernepken pagi umatKu,Sebap la kalak e nggit ngobah dalanna.+
8 Kuban pagi buen janda-janda kalak e asangken kersik i laut.
Bas ciger wari, Kuban pagi lit si erban kalak e hancur, si erban pernanden ras anak perana hancur.
Kuban pagi rempet kalak e mbiar ras nggirgir.
9 Lemah pagi diberu si ngelahirken pitu anak,Sesak napas ia.
Terbenam pagi matawarina sanga ciger denga,Emaka mela akapna janah terhina.’*
‘Kalak si nggeluh denga i tengah-tengah kalak e,Kuserahken pagi man musuh kalak e,’ nina Jahwe.”+
10 O mamakku, cilaka kel aku, perban enggo lahirkenndu aku,+Lalap aku rubati ras ersoal i belang-belang negri enda.
La pernah aku minjam bage pe mereken pinjamen,Tapi kerina kalak e numpahi aku.
11 Nina Jahwe, “Pasti pagi Kusampati kam.
Kusampati kam sanga susah,Bas masa si susah, sanga kam ngadapi musuh.
12 Banci kin hancurken jelma besi, amin pe besi e arah utara nari?
Banci kin tembaga ihancurken jelma?
13 Kuban pagi kebayaken ras erta kena jadi jarahen,+Labo guna ndatken sen, tapi perban kerina dosa i belang-belang daerah kena.
14 Kubereken pagi e man musuh kena,Baba kalak e pagi si e ku negri si la tandai kena.+
Sebap enggo gara rawaKu,RawaKu e gurlah man kena.”+
15 O Jahwe, tehNdu kai si kuadapi,Inget min aku janah perdiateken.
Balas min kalak si nyiksa aku.+
Ula sempat aku mate, perban sabarsa Kam man kalak e.
Inget min maka guna Kam aku nanggung hinan enda.+
16 Sanga kualoken kata-kataNdu, kutamaken ku pusuhku,+Kata-kataNdu erban meriah ukurku janah senang kuakap.
Sebap aku si maba gelarNdu, o Dibata Jahwe penguasa malekat.
17 La aku kundul ras kalak si tawa-tawa bage pe si ersenang-senang saja.+
Kundul aku sisada perban kuasa tanNdu.
Merawa kel aku banNdu perban kai si enggo lakoken kalak e.+
18 Engkai maka mesui kuakap lalap janah lukaku la tertambari?
Lukaku la malem-malem.
Tuhu kin Kam enggo bagi mata lau si la lit launa,Si la banci iandalken?
19 Emaka bagenda nina Jahwe,
“Adi mulih kam man bangKu, mulihi ka pagi jadi ateKu man bandu,Lalap pagi layanindu Aku.
Adi pisahkenndu kai si merga ras kai si la erguna,Bali pagi kam bagi juru bicaraKu.
Pasti reh pagi kalak e ndahi kam,Tapi kam la perlu ndahi kalak e.”
20 “Kuban pagi kam bagi benteng pertahanen si iban arah tembaga i tengah-tengah bangsa enda.+
Pasti lawan kalak e pagi kam,Tapi labo pagi kam talu ban kalak e,+Sebap Aku ras kam, guna nelamatken kam ras ngelindungi kam,” nina Jahwe.
21 “Kupulahi pagi kam arah tan kalak jahat nari,Kutebus pagi kam arah tan kalak si kejam.”
Cataten i teruh
^ Ntah banci saja “empat jenis hukumen.” As. “empat keluarga.”
^ Ntah banci saja “Lalap kam erdalan mundur.”
^ Ntah banci saja “Mela matawari e janah segan.”
