Jeremia 17:1-27
17 “Dosa Juda itulis alu pulpen besi.
Dosa-dosa kalak e itulis bas pusuhna alu pulpen si matana iban arah intan,Itulis bas tanduk ingan nutung* persembahenna.
2 Anak-anak kalak e pe ingetna ingan nutung persembahen ras tiang-tiang si badia* kalak e,+Si lit i deher batang kayu si mbue bulungna bas bukit-bukit si meganjang,+
3 Bas gunung-gunung si ndauh arah kota.
Kebayakenndu ras kerina ertandu, Kubereken pagi jadi jarahen,+Bage pe ingan-ingan ersembahndu* perban dosa si lit i daerahndu.+
4 Bene pagi warisen si Kubereken man bandu perban kesalahenndu.+
Kuban pagi kam jadi budak musuh-musuhndu bas negri si la tandaindu,+Sebap enggo gara banndu rawaKu bagi api.*+
RawaKu e gara rasa lalap.”
5 Bagenda nina Jahwe,
“Kena sumpah pagi kalak* si tek man manusia,+Si ngandalken gegeh manusia,+Bage pe kalak si pusuhna nadingken Jahwe.
6 Bali pagi ia bagi batang kayu si tonggal i gurun pasir.
Adi lit si mehuli, la pagi idahna.
Tapi tading pagi ia bas ingan si gersang i taneh mesawang,*Bas taneh si masin si la teringani.
7 Tapi ipasu-pasu pagi kalak si tek man Jahwe,Kalak si ngarap man Jahwe.+
8 Bali pagi ia bagi batang kayu si isuan i deher lau,Si uratna seh ku lau maler.
Labo pagi gejapna melas,Bulung-bulungna pe mejile.+
Paksa musim perlego la ia kuatir,Lalap ia erbuah.
9 Pusuh manusia liciken* asangken kai pe janah nekat.*+
Ise si ngasup ngangkaisa?
10 Aku Jahwe, si mereksa pusuh,+Si mereksa perukuren si mbagesna,Guna mbalas tiap kalak menurut perbahanenna,Bage pe menurut lagu langkahna.+
11 Bagi perik si medemken naruh si labo naruhna,Bage pagi kalak si ndatken kebayaken alu cara si la jujur.*+
Bas pertengahen umurna bene kerina e,Teridah dungna maka bodoh kap ia.”
12 Tahta si mulia, si ipeganjang tangtangna nari,Eme inganta si badia.+
13 O Jahwe, arapen Israel,Kerina kalak si nadingken Kam ipermelaken pagi,Gelar kalak si nadingken Kam* itulis pagi bas abu,+Sebap enggo tadingken kalak e Jahwe, sumber lau kegeluhen.+
14 Pepalemlah aku o Jahwe, gelah malem aku.
Selamatken aku, gelah selamat aku,+Sebap Kam kap si kupuji.
15 Lit si ngataken bangku,
“Engkai maka lenga terjadi si kataken Jahwe?+
Mbera-mbera terjadi si katakenNa e!”
16 Tapi aku labo pagi ngadi jadi permakan si ngikutken Kam,Labo aku merhat terjadi wari bencana e.
TehNdu kap kerina si kukataken.
Kerina e terjadi i lebe-lebeNdu!
17 Ula banNdu aku mbiar.
Kam kap inganku erlindung bas wari kesusahen.
18 Ipermelakenlah kalak si nyiksa aku,+Tapi ula pediat aku ipermelaken.
Mbiarlah kalak e,Tapi ula pediat aku mbiar.
Rehlah wari kesusahen e man kalak e,+Hancurkenlah kalak e janah kernepken seh asa keri.
19 Bagenda nina Jahwe man bangku, “Tedislah i gerbang utama si ilewati raja-raja Juda guna masuk ras ndarat, bage pe bas kerina gerbang Jerusalem.+
20 Kataken bagenda man kalak e, ‘O raja-raja Juda, kalak Juda, ras kerina penduduk Jerusalem si masuk arah gerbang-gerbang e, begikenlah kai si kataken Jahwe enda.
21 Bagenda nina Jahwe, “Ula baba kena barang kai pe sanga wari Sabat, ula baba masuk arah gerbang-gerbang Jerusalem.+
22 Ula baba kena barang kai pe ndarat arah rumah kena sanga wari Sabat. Ula kena erdahin.+ Pebadialah wari Sabat bagi si Kuperentahken man nini bulang kena.+
23 Tapi la begiken kalak e, la perdiatekenna. Kalak e keras kepala ras la nggit patuh. La kalak e nggit ngaloken disiplin.”’+
24 “‘Nina Jahwe, “Adi tuhu-tuhu kena patuh man kata-kataKu, janah la baba kena barang kai pe masuk arah gerbang-gerbang kota e bas wari Sabat, ras pebadia kena wari Sabat alu la ndahiken kai pe bas wari e,+
25 masuk pagi raja-raja ras pejabat-pejabat si kundul bas tahta Daud+ arah gerbang-gerbang kota enda, janah nangkihina kuda ras gereta. Masuk pagi kalak e radu ras pejabatna bage pe kalak Juda ras penduduk Jerusalem.+ Kota enda iingani pagi seh rasa lalap.
26 Rehen pagi kalak arah kota-kota Juda, arah sekeliling Jerusalem, arah daerah Benyamin,+ arah dataren rendah,+ arah daerah pegunungen, bage pe arah Negep.* Baba kalak e pagi ku rumah Jahwe persembahen tutungen,+ korban,+ persembahen pangan,*+ kemenyan mbentar, ras korban pengatan bujur.+
27 “‘“Tapi adi la patuhi kena perentahKu guna mpebadia wari Sabat, janah baba kena barang arah gerbang-gerbang Jerusalem sanga wari Sabat, Kututung pagi gerbang-gerbangna alu api, pasti pagi keri banna menara-menara Jerusalem+ si erbenteng, janah apina la termateken.”’”+
Cataten i teruh
^ As. “ingan-ingan si meganjangndu.”
^ Ntah banci saja “Kena enggo bagi api perban itutung rawaKu.”
^ Ntah “manusia si megegeh.”
^ Taneh si mbelang si jarang iingani.
^ Ntah “la terteki.”
^ Ntah banci saja “la terpepalem.”
^ Ntah “adil.”
^ As. “Aku.” Mungkin maksudna Jahwe.
^ Ntah “Selatan.”