Jeremia 19:1-15
19 Bagenda nina Jahwe, “Tukurlah sada guci taneh liat arah sekalak tukang kudin.+ Lebuhlah piga-piga peminpin bangsa enda ras piga-piga imam si enggo erpengalamen.
2 Dung e lawes kam ku Lembah Anak Hinnom,+ i lebe-lebe Gerbang Pecahen Kudin Taneh. Umumkenlah i je kerna kai si enggo Kukataken man bandu.
3 Kataken bagenda, ‘O raja-raja Juda ras penduduk Jerusalem, bagenda nina Jahwe. Enda si kataken Jahwe penguasa malekat, Dibata Israel,
“‘“Kuban pagi terjadi bencana bas ingan enda. Ise pe si megi kerna si e sengget pagi.
4 Enda terjadi perban tadingken kena Aku,+ ban kena ingan enda lanai itandai.+ I jenda bereken kena persembahen man dibata-dibata si deban si la tandai kena ras si la tandai nini bulang kena bage pe raja-raja Juda. Enggo dem ban kena ingan enda alu dareh kalak si la ersalah.+
5 Ban kalak e ingan-ingan ersembah* man Baal guna nutung anakna si dilaki jadi persembahen tutungen man Baal.+ La pernah Kuperentahken ntah pe Kucakapken kerna si e, janah sitik pe la pernah turah bas ukurKu.”’+
6 “‘Nina Jahwe, “E me sebapna, bas paksana pagi, ingan e lanai igelari Topet ntah pe Lembah Anak Hinnom, tapi Lembah Penggelehen.+
7 Kugagalken pagi rencana Juda ras Jerusalem bas ingan enda, Kuban kalak e mate alu pedang musuh-musuhna ras alu tan kalak si merhat munuh kalak e. Kubereken pagi mayat kalak e jadi pangan perik-perik i langit ras binatang buas i doni.+
8 Kuban pagi kota e jadi ingan si erban mbiar janah ihina kalak. Tiap kalak si lewat ngeri pagi akapna ngidahsa janah hina kalak e kota e perban kai si la mehuli si terjadi man kota e.+
9 Kuban pagi pan kalak e daging anakna si dilaki ras si diberu. Tiap kalak pagi man daging temanna, sebap kalak e terkepung janah la lit pilihen si deban sanga kalak e ikepung musuh-musuhna ras kalak si merhat munuh kalak e.”’+
10 “Kenca si e, pecahken guci e i lebe-lebe kalak si lawes ras kam.
11 Kataken man kalak e, ‘Bagenda nina Jahwe penguasa malekat, “Bagenda pagi bangsa enda Kuhancurken ras kota enda, bagi ngancurken kudin taneh seh asa lanai terpekena. Kuburken kalak e pagi kalak si mate i Topet seh asa lanai lit ingan nguburkenca.”’+
12 “Nina Jahwe, ‘Bage pagi Kuban man ingan enda ras pendudukna. Kuban pagi kota enda bagi Topet.
13 Rumah-rumah bas Jerusalem bage pe istana raja-raja Juda jadi najis pagi bagi Topet.+ Perban persembahken kalak e korban i atap rumahna man bintang-bintang i langit*+ janah amburkenna persembahen inemen man dibata-dibata si deban.’”+
14 Sanga mulih Jeremia arah Topet eme inganna ernubuat si isuruh Jahwe, tedis ia i halamen rumah Jahwe, nina man kalak e kerina,
15 “Bagenda nina Jahwe penguasa malekat, Dibata Israel, ‘Kuban pagi terjadi bencana si enggo Kukataken man kota enda, man kerina kuta-kutana, sebap keras kepala kalak e, la kalak e nggit patuh man kai si Kukataken.’”+
