Jeremia 23:1-40
23 “Cilaka permakan-permakan si ngancurken ras si erban merap biri-biri bas mbalmbalKu!” nina Jahwe.+
2 E me sebapna bagenda nina Jahwe Dibata Israel kerna permakan-permakan si mpermakani umatNa, “Ban kena biri-biriKu merap. Lalap ban kena kalak e merap, la urus kena.”+
“Emaka Kuhukum pagi kena perban perbahanen kena si jahat,” nina Jahwe.
3 “Kenca si e, Kupepulung pagi biri-biriKu si tading denga si enggo Kumerapken ku erbage negri.+ Kubaba pagi kalak e mulih ku mbalmbalna.+ Ertambah-tambah pagi kalak e janah reh buena.+
4 Kupilih pagi permakan-permakan si tutus atena mpermakani kalak e.+ UmatKu lanai pagi nggirgir ntah pe mbiar, la lit sada pe si bene,” nina Jahwe.
5 Nina Jahwe, “Seh pagi waktuna, Kubereken man Daud ahli waris* si benar perbahanenna.+ Erkuasa pagi sekalak raja si pentar,+ tegakkenna pagi keadilen ras kebenaren i negri enda.+
6 Bas jamanna iselamatken pagi Juda,+ tading pagi Israel alu aman.+ Ilebuh pagi ia alu gelar: Keadilenta Rehna arah Jahwe nari.”+
7 Tapi nina Jahwe, “Bas masana pagi, lanai kataken kalak e, ‘Ersumpah kami i lebe-lebe Jahwe si nggeluh, si maba kalak Israel ndarat arah Mesir!’+
8 tapi ning kalak e pagi, ‘Ersumpah kami i lebe-lebe Jahwe si nggeluh, si maba keturunen kalak Israel ndarat ras mulih arah negri i utara bage pe arah negri ingan kalak e tading kenca merapkenNa,’ tading pagi kalak e bas negrina.”+
9 Kerna nabi-nabi:
Getem kel pusuhku.
Nggirgir tulan-tulanku.
Aku bagi kalak mabuk,Bagi kalak si mbuesa minem anggur,Perban Jahwe ras kata-kataNa si badia.
10 Sebap dem kalak si erlua-lua bas negri enda.+
Erceda ate negri enda perban kena sumpah,+Mbalmbal kerah i taneh mesawang.*+
Jahat perbahanen kalak e, salahgunakenna kuasana.
11 “Nabi ras imam pe enggo murtad.+
Bas rumahKu pe Kuidah kejahaten kalak e,”+ nina Jahwe.
12 “Medalit pagi dalan kalak e janah gelap,+Isorong pagi kalak e janah ndabuh.
Sebap Kuban pagi terjadi bencana man kalak e,Bas tahun kalak e ihukum,” nina Jahwe.
13 “Kuidah si erban ciga ate bas nabi-nabi Samaria.+
Ernubuat kalak e bas gelar Baal,Ban kalak e umatKu Israel papak.
14 Kuidah si erban ngeri bas nabi-nabi Jerusalem.
Erlua-lua kalak e,+ geluhna dem perbahanen si la bujur.+
Dukung kalak e kalak jahat,La kalak e robah arah kejahatenna.
Kalak e bali Kuakap bagi Sodom,+Pendudukna bagi Gomora.”+
15 Emaka bagenda nina Jahwe penguasa malekat kerna nabi-nabi,
“Kuban pagi ipan kalak e sinuan-sinuan si pagit,Kubere inem kalak e lau si lit racunna.+
Perban nabi-nabi bas Jerusalem enggo erban kerina negri e murtad.”
16 Bagenda nina Jahwe penguasa malekat,
“Ula begiken kai si kataken nabi-nabi si ernubuat man kena.+
Papak pagi ban kalak e kena.*
Pengenehenen* si peseh kalak e rehna arah pusuhna,+
Labo arah Jahwe.+
17 Lalap kataken kalak e man kalak si la ngergai Aku,‘Nina Jahwe, “Dat kena pagi kedamen.”’+
Man kalak si ngikutken pusuhna ras si la patuh,‘Labo pagi terjadi bencana man kena.’+
18 Sebap ise kin si tedis i tengah-tengah kalak si rembak ras JahweGuna megiken ras ngangkai kata-kataNa?
Ise kin si mperdiateken kata-kataNa janah megikenca?
19 Merawa pagi Jahwe bagi angin badai.
Bagi badai si erputar-putar, nusur pagi si e ku takal kalak jahat.+
20 Rawa Jahwe labo pagi ngadi,Seh ngasa lakokenNa sura-suraNa janah sehkenNa.
Bas pendungi masa e, angkai kena pagi kerina e alu jelas.
21 Labo Kuutus kalak e, tapi meter kel kalak e ertindak.*
Labo lit Aku ngerana man kalak e, tapi ernubuat kalak e.+
22 Bicara tedis kalak e i tengah-tengah kalak si rembak ras Aku,Pasti enggo ban kalak e gelah begiken umatKu kata-kataKu,Janah banna umatKu robah arah dalan geluhna si jahat ras perbahanenna si la mehuli.”+
23 Nungkun Jahwe, “La kin Kuidah nge si ndauh arah Aku nari? Si ndeher saja kin ngenca si banci Kuidah?”
24 Nungkun Jahwe, “La kin banci kuidah kalak si cebuni?”+
Nina Jahwe, “La kin aku si ndemi langit ras doni?”+
25 “Enggo Kubegi kai si kataken nabi-nabi si erbual man kena alu gelarKu nina, ‘Lit kudat nipi! Lit kudat nipi!’+
26 Asa ndigan nabi-nabi e ernubuat kerna kai si la tuhu? Peseh nabi-nabi e tipun arah pusuhna.+
27 Ban nabi-nabi e umatKu ngelupaken gelarKu alu nipi si ceritakenna man sada ras si debanna. Bali ras nini bulang kalak e ngelupaken gelarKu perban Baal.+
28 Pediatlah ceritaken nabi-nabi e nipina, tapi kalak si lit bas ia kata-kataKu, pesehna alu benar.”
“Banci kin nggala* ipeseri ras gandum?” nina Jahwe.
29 Nina Jahwe, “La kin kata-kataKu seri ras api+ bage pe martel si ngancurken tebing batu?”+
30 “Emaka Kuhukum nabi-nabi si mutarbalikken kata-kataKu, alu bage banci katakenna man kalak kai si atena katakenna,”+ nina Jahwe.
31 “Kuhukum pagi nabi-nabi si pakena dilahna guna ngataken, ‘Bagenda nina!’”+ nina Jahwe.
32 “Kuhukum pagi nabi-nabi si mpeseh nipi si la tuhu, si erban umatKu papak alu bual bage pe kesombongen kalak e,” nina Jahwe.+
“Labo Kuutus kalak e, labo lit Kuperentahken. Emaka sitik pe la lit gunana kalak e man bangsaKu enda,”+ nina Jahwe.
33 “Adi bangsa enda, nabi-nabina, ras imamna ngataken bandu, ‘Berita enda, baban si mberat* arah Jahwe,’ kataken man kalak e, ‘“Kena nge baban si mberat e! Kuambekken pagi kena,”+ nina Jahwe.’
34 Tapi kerna nabi, imam, ntah pe kalak si ngataken, ‘Berita e baban si mberat arah Jahwe!’ Kuhukum pagi ia ras kerina si lit bas rumahna.
35 Nungkun kena man teman kena ras senina kena, ‘Kai nina Jahwe? Kai si kataken Jahwe?’
36 Tapi ula kataken kena berita arah Jahwe e baban si mberat. Si e jadi baban si mberat perban ranan kena, kena nge si ngubah kata-kata Jahwe Dibatata eme Dibata si nggeluh penguasa malekat.
37 “Bagenda pagi kataken man nabi-nabi, ‘Kai jawapen Jahwe man kena? Kai nina Jahwe?
38 Adi lalap ning kena, “Berita arah Jahwe e baban si mberat!” bagenda nina Jahwe, “Perban lalap kataken kena, ‘Si kataken Jahwe e baban si mberat,’ padahal enggo Kukataken, ‘Ula kataken berita arah Jahwe e baban si mberat,’
39 Kuangkat pagi kena, Kuambekken arah lebe-lebeKu nari, kena bage pe kota si Kubereken man kena ras nini bulang kena.
40 Kuban pagi kena ihina janah ipermelaken rasa lalap, si e lalap pagi iinget.”’”+
Cataten i teruh
^ As. “tunas.”
^ Taneh si mbelang si jarang iingani.
^ Ntah “Berena arapen si palsu.”
^ Eme kerna kai pe si cidahken Dibata ku bas pikiren sekalak jelma.
^ As. “kiam.”
^ Ntah “jerami.”
^ Ntah “berita si mberati.” Kata bahasa Heber ertina “berita si mberat arah Dibata” ntah “si erban mberat.”
