Jeremia 29:1-32
29 Enda isi surat si kirim Nabi Jeremia arah Jerusalem nari man peminpin si ikut itaban bage pe man imam-imam, nabi-nabi, ras kerina rakyat si itaban Nebukadnesar arah Jerusalem nari ku Babilon,
2 kenca Raja Jekonia,+ mamak raja,+ pejabat istana, peminpin Juda ras Jerusalem, tukang-tukang besi,* ras tukang si beluh si debanna ibaba lawes arah Jerusalem nari.+
3 Surat e ikirim arah Elasah anak Sapan+ ras Gemaria anak Hilkia, si iutus Sedekia+ raja Juda ku Babilon guna njumpai Nebukadnesar raja Babilon. Isi surat e eme,
4 “Bagenda nina Jahwe penguasa malekat, Dibata Israel, man kerina tabanen si ibaba arah Jerusalem ku Babilon,
5 ‘Bangun kenalah rumah janah ingani. Suani juma kena janah pan buahna.
6 Erjabulah kena janah lit min anak kena dilaki ras diberu. Pejabu anak kena si dilaki ras si diberu, gelah kalak e pe lit anakna dilaki ras diberu. Reh teremnalah kena, ula reh urakna.
7 Usahaken kenalah nggeluh alu dame bas kota ingan kena itaban e. Ertotolah man Jahwe guna kota e, sebap adi dame kota e, kena pe dame akap kena.+
8 Sebap bagenda nina Jahwe penguasa malekat, Dibata Israel, “Ula kena nggit itipu nabi-nabi ras peramal si lit i tengah-tengah kena,+ ula kena tek man nipi kalak e.
9 Sebap ‘bual kap si nubuatken kalak e alu gelarKu. Labo Aku si nuruh kalak e,’+ nina Jahwe.”’”
10 “Sebap bagenda nina Jahwe, ‘Kenca keri 70 tahun e, Kuinget pagi kena mulihi,+ Kutepati pagi janjiKu man kena guna maba kena mulih ku ingan enda.’+
11 “‘Sebap Kuteh kai ateKu Kulakoken man kena,’ nina Jahwe, ‘Kubereken ateKu kedamen man kena labo kesusahen.+ Kubereken ateKu masa depan si arapken kena.+
12 Lebuh kena pagi Aku, reh kena ertoto man bangKu, janah Kubegiken pagi kena.’+
13 “‘Darami kena pagi Aku janah dat kena,+ sebap darami kena Aku alu bulat ukur.+
14 Kupediat pagi ijumpai kena Aku,’+ nina Jahwe. ‘Kupepulung pagi kena arah si enggo itaban janah Kupepulung kena arah bangsa ingan kena Kumerapken,’+ nina Jahwe. ‘Kubaba pagi kena mulih arah ingan kena itaban.’+
15 “Tapi ning kena, ‘Enggo pilih Jahwe nabi-nabi guna kami i Babilon.’
16 “Bagenda nina Jahwe man raja si kundul bas tahta Daud+ ras man kerina si tading i kota enda, eme senina-senina kena si la ikut jadi tabanen radu ras kena,
17 ‘Bagenda nina Jahwe penguasa malekat, “Kuban pagi reh pedang, kelihen, ras wabah penakit man kalak e.+ Kuban pagi kalak e bagi buah ara si macik,* si lanai terpan ban mejinna.”’+
18 “‘Kuhukum pagi kalak e alu pedang,+ kelihen, ras wabah penakit. Kuban pagi kalak e jadi kai si erban mbiar man kerina kerajan i doni.+ Isumpahi pagi kalak e janah mamang ate kalak ngidahsa. Ku ja pe kalak e Kumerapken+ ihina pagi kalak e, jadi kuan-kuanen kalak,+ ras itokohi,
19 sebap la begiken kalak e kai si Kupeseh arah pelayan-pelayanKu eme nabi-nabiKu,’ nina Jahwe, ‘lalap Kuutus kalak e.’+
“‘Kena pe la begiken kena,’+ nina Jahwe.
20 “Emaka, begikenlah kai si kataken Jahwe, o kalak si itaban si enggo Kupelawes Jerusalem nari ku Babilon.
21 Bagenda nina Jahwe penguasa malekat, Dibata Israel, kerna Ahap anak Kolaya ras Sedekia anak Maaseya, si nubuatkenna bual bas gelarKu,+ ‘Kuserahken pagi kalak e ku tan Nebukadnesar* raja Babilon. Bunuhna pagi kalak e i lebe-lebe kena.
22 Kai si terjadi man kalak e ipake kalak Juda si itaban pagi sanga numpahi, nina, “Mbera-mbera ban Jahwe pagi kam bagi Sedekia ras Ahap, si itutung raja Babilon!”
23 Sebap perbahanen kalak e enggo erban mela bas Israel.+ Erlua-lua kalak e ras diberu kalak, erbual ia bas gelarKu amin pe la lit Kuperentahken.+
“‘“Aku kap si metehsa, Aku saksina,”+ nina Jahwe.’”
24 “Arus katakenndu man Semaya+ kalak Nehelam,
25 ‘Bagenda nina Jahwe penguasa malekat, Dibata Israel, “Perban enggo kirimndu surat man kerina penduduk Jerusalem, man Imam Sepanya+ anak Maaseya, ras kerina imam-imam, si isina,
26 ‘Enggo ban Jahwe kam jadi imam guna nggantiken Imam Joyada selaku pengawas i rumah Jahwe guna nangkap kalak adon si ertindak bagi nabi, janah masung nahena, tanna ras kerahungna.+
27 Jadi engkai maka la rawaindu Jeremia kalak Anatot+ si perbahanenna bagi nabi i tengah-tengah kena?+
28 Kirimna pesan man kami i Babilon, nina, “Ndekah nge pagi kena itaban! Bangunlah rumah kena, tadinglah kena i je. Suani juma kena, pan buahna,+ . . .”’”’”
29 Sanga bacaken Imam Sepanya+ surat enda man Nabi Jeremia,
30 nina Jahwe man Jeremia,
31 “Kirim pesan enda man kerina tabanen, ‘Bagenda nina Jahwe kerna Semaya kalak Nehelam, “Semaya ernubuat man kena tapi labo Aku si nuruh ia, janah cubakenna erban kena tek man bualna.+
32 Perban si e, bagenda nina Jahwe, ‘Kuhukum pagi Semaya kalak Nehelam bage pe keturunenna. La pagi lit sada pe keturunenna si tetap bas bangsa enda, labo pagi idahna si mehuli si Kulakoken man umatKu,’ nina Jahwe, ‘perban babaina rakyat enda mberontak ngelawan Jahwe.’”’”
Cataten i teruh
^ Ntah banci saja “si mbangun tembok pertahanen.”
^ Ntah banci saja “pecah.”
^ As. “Nebukadresar,” penggelaren si deban.
