Jeremia 32:1-44
32 Reh kata Jahwe man Jeremia bas tahun pe-10-ken pemerentahen Sedekia raja Juda, eme tahun pe-18-ken pemerentahen Nebukadnesar.*+
2 Paksa si e pasuken raja Babilon sangana ngepung Jerusalem, Nabi Jeremia sangana itahan i Halamen Penjaga+ bas istana raja Juda.
3 Sedekia raja Juda nahan Jeremia,+ nina raja e, “Engkai maka nubuatkenndu bage? Engkai maka nindu, ‘Bagenda nina Jahwe, “Kuserahken pagi kota enda ku tan raja Babilon, rebutna pagi kota enda,+
4 Sedekia raja Juda la banci kiam arah kalak Kaldea, sebap pasti pagi ia iserahken ku tan raja Babilon. Pedempak ayo pagi ia ngerana ras raja e.”’+
5 ‘Baba raja e pagi Sedekia ku Babilon, i je pagi ia tading seh ngasa Kuperdiateken ia,’ nina Jahwe. ‘Amin gia lalap lawanndu kalak Kaldea, labo pagi kam berhasil.’”+
6 Nina Jeremia, “Bagenda nina Jahwe man bangku,
7 ‘Reh pagi Hanamel anak Salum senina bapakndu ndahi kam, nina, “Tukurlah jumaku si lit bas Anatot,+ sebap hakndu kap si pertama nukursa mulihi.”’”+
8 Pas bagi si kataken Jahwe, reh Hanamel anak senina bapakku e ndahi aku i Halamen Penjaga, nina man bangku, “Tukurlah jumaku si lit bas Anatot, i daerah Benyamin, sebap lit hakndu nukur juma e mulihi man bandu. Tukurlah juma e.” Megi si e, kuteh maka enda kap sura-sura Jahwe.
9 Emaka kutukur juma si bas Anatot e arah Hanamel anak senina bapakku. Jenari, kutimbang sen+ si buena kira-kira 80 gram* ras 10 logam pirak janah kubereken man bana.
10 Kenca si e, kucatat bas sada surat jual beli,+ kututup alu segel, janah kulebuh saksi-saksi,+ jenari kutimbang sen e bas timbangen.
11 Kubuat surat jual beli si enggo isegel menurut undang-undang ras peraturen, bage pe surat si la isegel.
12 Dung e, kubereken surat jual beli e man Baruh+ anak Neria+ anak Mahsea, i lebe-lebe Hanamel anak senina bapakku. Saksi-saksi si enggo nandatangani surat e ras kerina kalak Jahudi si kundul i Halamen Penjaga pe ngidah si e.+
13 Kubereken perentah man Baruh i lebe-lebe kalak e, ningku,
14 “Bagenda nina Jahwe penguasa malekat, Dibata Israel, ‘Buatlah surat-surat jual beli e, eme surat si isegel ras si lang. Simpanlah kerina e bas guci si iban arah taneh liat gelah ndekah tahan.’
15 Sebap bagenda nina Jahwe penguasa malekat, Dibata Israel, ‘Rumah-rumah, juma-juma, ras kebun-kebun anggur, itukur ka pagi mulihi i negri enda.’”+
16 Kenca kubereken surat-surat e man Baruh anak Neria, ertoto aku man Jahwe, ningku,
17 “O Jahwe Tuhan Si Meganjangna! Kam kap si erban langit ras doni alu kuasaNdu si mbelin+ ras alu tanNdu si megegeh. La lit si meserasa akapNdu ngelakokenca.
18 Kam kap si ncidahken kekelengen si setia man ribun kalak, ras si mpediat anak-anak dat akibat arah kesalahen bapakna.+ Kam kap Dibata si benar, si mulia ras erkuasa, si gelarna Jahwe penguasa malekat.
19 Luar biasa sura-suraNdu ras hebat perbahanenNdu.+ PerdiatekenNdu kerina dalan geluh manusia,+ guna mbalas tiap kalak menurut dalan geluhna ras perbahanenna.+
20 LakokenNdu melala tanda ras mukjizat i Mesir, janah iteh kalak kerna si e seh asa gundari. Alu bage banNdu gelarNdu terkenal bas Israel ras i tengah-tengah umat manusia+ seh asa gundari.
21 BabaNdu umatNdu Israel ndarat arah Mesir alu tanda, alu mukjizat, alu tanNdu si megegeh si dem kuasa, ras alu perbahanen si erban mbiar.+
22 “Kenca si e, bereNdu negri enda man kalak e, negri si janjikenNdu alu sumpah man nini bulang kalak e.+ Eme negri si melala kel i je susu ras madu.+
23 Jenari masuk kalak e ku negri e janah rebutna, tapi la kalak e patuh man kata-kataNdu, la ikutkenna undang-undangNdu. La kalak e nggit ngelakoken sada pe perentahNdu. Emaka banNdu kerina bencana enda terjadi man kalak e.+
24 Rehen kalak, bangunna tembok guna ngepung ras ngerebut kota e.+ Pedang,+ kelihen, ras wabah penakit,+ erban ndabuh pagi kota enda ku tan kalak Kaldea si nyerang kota e. Kerina si katakenNdu e enggo terjadi, bagi si idahNdu gundari.
25 Tapi o Jahwe Tuhan Si Meganjangna, amin pe iserahken pagi kota enda ku tan kalak Kaldea, suruhNdu aku nukur juma alu sen ras ngelebuh saksi-saksi.”
26 Kenca si e nina Jahwe man Jeremia,
27 “Aku kap Jahwe, Dibata umat manusia. Lit kin si meserasa Kuakap ngelakokenca?
28 Emaka bagenda nina Jahwe, ‘Kuserahken pagi kota enda ku tan kalak Kaldea ras Nebukadnesar* raja Babilon. Rebutna pagi kota enda.+
29 Reh pagi kalak Kaldea nyerang kota enda janah tutungna kota e seh keri,+ bage pe rumah-rumah si atapna ipake guna ingan mpersembahken korban man Baal ras ngamburken persembahen inemen man dibata-dibata si deban, guna erban Aku sakit hati.’+
30 “‘Sebap mulai kin ngudana nari, kai si Kuakap jahat saja ngenca lakoken kalak Israel ras kalak Juda i lebe-lebeKu.+ Lalap ban kalak Israel Aku sakit hati alu perbahanenna,’ nina Jahwe.
31 ‘Mulai bas wari ibangun kalak e kota enda seh ngasa gundari, kota enda erban Aku merawa ras nembeh saja.+ Kota enda arus ikernepken arah lebe-lebeKu nari,+
32 perban kerina kejahaten si lakoken kalak Israel ras kalak Juda. Raja-raja,+ peminpin-peminpin,+ imam-imam, nabi-nabi,+ kalak Juda, ras penduduk Jerusalem, kerina kalak e erban Aku sakit hati.
33 Amin pe lalap Kuusahaken ngajari kalak e, tapi lalap kalak e buang muka.+ La lit sada pe si nggit megiken guna ngaloken disiplin.+
34 Ban kalak e berhala-berhala si erban ciga ate bas rumah si maba gelarKu, gelah najis rumah e.+
35 Ban kalak e ka ingan-ingan ersembah* man Baal i Lembah Anak Hinnom,*+ guna nutung anakna si dilaki ras si diberu jadi korban man Moloh.+ La pernah Kuperentahken kerna si e,+ janah kai si erban ciga ate si erban Juda erdosa, la pernah turah bas ukurKu.’
36 “Emaka bagenda nina Jahwe, Dibata Israel, kerna kota enda si kataken kena iserahken pagi man raja Babilon alu pedang, kelihen, ras wabah penakit,
37 ‘Kupepulung pagi kalak e arah erbage negri ingan kalak e Kumerapken sanga merawa kel Aku, ngilas ateKu, janah nembeh ateKu.+ Kubaba pagi kalak e mulih ku ingan enda, Kuban pagi aman kap kalak e tading i je.+
38 Kalak e pagi jadi umatKu, aku jadi Dibatana.+
39 Kuban pagi kalak e lalap mbiar man bangKu, bas pusuhna+ bage pe perbahanenna, guna kiniulin kalak e ras anak-anakna.+
40 Kuban pagi perjanjin si rasa lalap ras kalak e,+ maka labo pagi Aku ngadi erban si mehuli man kalak e.+ Kuban pagi kalak e mbiar man bangKu gelah la tadingkenna Aku.+
41 Meriah pagi ukurKu erban si mehuli man kalak e.+ Alu kerina gegehKu ras bulat ukurKu, Kuban pagi kalak e jadi penduduk si tetap bas negri enda.’”+
42 “Sebap bagenda nina Jahwe, ‘Bagi sanga Kuban terjadi kerina bencana si mbelin man umat enda, Kuban ka pagi terjadi kerina si mehuli si Kujanjiken man kalak e.+
43 Bas negri enda, tukur kalak ka pagi mulihi juma,+ amin pe ning kena, “Ingan enda gersang, la lit jelma ntah pe binatang janah negri e enggo ibereken man kalak Kaldea.”’
44 “‘Tukur kalak pagi juma-juma alu sen, surat jual beli icatat janah isegel, ilebuh pagi saksi-saksi i daerah Benyamin,+ i daerah sekeliling Jerusalem, i kota-kota Juda,+ i kota-kota si lit i daerah pegunungen, i kota-kota si lit bas dataren rendah,+ ras kota-kota i selatan. Sebap Kubaba pagi mulih kalak si itaban,’+ nina Jahwe.”
Cataten i teruh
^ As. “Nebukadresar,” penggelaren si deban.
^ As. “Nebukadresar,” penggelaren si deban.
^ As. “ingan-ingan si meganjang.”
