Jeremia 33:1-26
33 Reh kata Jahwe man Jeremia pedua kaliken sanga ia itahan denga i Halamen Penjaga,+ nina,
2 “Ngerana Jahwe Si Mbentuk doni ras si erbanca paguh. Payo, Ia kap si nciptaken doni, janah gelarNa eme Jahwe. Nina Jahwe,
3 ‘Erlebuhlah man bangKu. Kualoi pagi kam janah mis Kukataken kai si luar biasa si la banci angkandu, si lenga pernah tehndu.’”+
4 “Sebap bagenda nina Jahwe Dibata Israel kerna rumah-rumah i kota enda ras istana raja-raja Juda, si iruntuhken perban ikepung ras iserang pedang musuh.+
5 KatakenNa ka kerna kalak si reh ngelawan kalak Kaldea, ras kerna kota enda si ibanNa pagi dem alu mayat kalak si nggejapken rawaNa si mbelin. Kejahaten kalak e enggo erban Ia buang muka arah kota e,
6 nina, ‘Kuban pagi ia sehat mulihi.+ Kupepalem pagi kalak e janah Kubere kedamen ras keamanen si la teralang.+
7 Kubaba pagi mulih kalak Juda ras kalak Israel si itaban.+ Kubangun pagi kalak e bagi si Kulakoken mbarenda.+
8 Kubersihken pagi kalak e arah kerina dosa ras kesalahen si iban kalak e man bangKu,+ Kuampuni pagi kerina dosa ras pelanggaren si lakokenna man bangKu.+
9 Meriah pagi ukurKu perban gelar kota e, janah ban kota e pagi Aku ipuji ras imuliaken i lebe-lebe kerina bangsa i doni, si megi kerna kai si mehuli si Kulakoken man umatKu.+ Mbiar ras nggirgir pagi kalak e+ perban ngidah si mehuli ras kedamen si Kubereken man kota e.’”+
10 “Bagenda nina Jahwe, ‘Ning kena ingan enda gersang, la lit jelma ras asuh-asuhen, kota-kota Juda ras dalan-dalan bas Jerusalem lanai iingani, janah la lit jelma ras asuh-asuhen i je. Tapi terbegi pagi bas ingan-ingan e
11 sora keriahen ukur ras surak ermeriah ukur,+ sora penganten si dilaki ras penganten si diberu, ras sora kalak si ngataken, “Kataken bujur man Jahwe penguasa malekat, sebap Jahwe mehuli,+ kekelengenNa si setia tetap lit rasa lalap!”’+
“‘Baba kalak e pagi persembahen pengatan bujur ku rumah Jahwe,+ sebap Kubaba pagi mulih rakyat negri enda si itaban, mulihi pagi kalak e bagi si mbarenda,’ nina Jahwe.”
12 “Bagenda nina Jahwe penguasa malekat, ‘Bas ingan si gersang enda, ingan si la lit si ngianisa, la soal jelma ntah pe asuh-asuhen bage pe bas kerina kotana, lit pagi mbalmbal man permakan-permakan guna ingan ngadi asuh-asuhen kalak e.’+
13 “‘Bas kota-kota i daerah pegunungen, bas kota-kota i dataren rendah, bas kota-kota i selatan, i daerah Benyamin, i daerah sekeliling Jerusalem,+ ras kota-kota Juda,+ ikira permakan-permakan pagi mulihi asuh-asuhenna,’ nina Jahwe.”
14 “Nina Jahwe, ‘Bas waktuna pagi, Kutepati kerina si mehuli si Kujanjiken kerna kalak Israel ras kalak Juda.+
15 Paksa si e, Kuban pagi lit ahli waris* Daud si benar perbahanenna,+ janah tegakkenna pagi keadilen ras kebenaren bas negri enda.+
16 Bas masa si e, iselamatken pagi Juda+ janah Jerusalem nggeluh pagi alu aman.+ Igelari pagi kota e: Keadilenta Rehna arah Jahwe nari.’”+
17 “Bagenda nina Jahwe, ‘Keturunen Daud nge pagi si lalap kundul bas tahta Israel.+
18 Selain si e, keturunen Lewi pagi si lalap jadi imam i lebe-lebeKu guna mereken persembahen tutungen, nutung persembahen pangan,* ras mpersembahken korban.’”
19 Nina Jahwe ka man Jeremia,
20 “Bagenda nina Jahwe, ‘Lit perjanjinKu ras suari bage pe ras berngi. Emaka suari ras berngi lalap reh bas waktuna. Adi ngasup kena mbatalken perjanjin e,+
21 perjanjinKu ras Daud pelayanKu pe banci ibatalken.+ Alu bage, la pagi lit anakna si merentah jadi raja bas tahtana.+ Selain si e, perjanjinKu ras imam-imam Lewi si ngelayani Aku pe banci ibatalken.+
22 Bagi bintang-bintang i langit* si la mungkin ikira ras kersik i laut si la terbeligai, bage me pagi Kuban reh buena keturunen Daud pelayanKu ras kalak Lewi si ngelayani Aku.’”
23 Nina Jahwe ka man Jeremia,
24 “La kin begindu ning kalak ngerana, ‘Tulak Jahwe kin pagi duana keluarga si pilihNa?’ La hamati kalak e umatKu janah lanai anggapna umatKu sada bangsa.
25 “Bagenda nina Jahwe, ‘Bagi perjanjinKu ras suari bage pe ras berngi,+ janah undang-undangKu* kerna langit ras doni+ si la banci ibatalken,
26 bage ka me pagi, labo Kutulak keturunen Jakup ras Daud pelayanKu. Arah keturunenna, Kupilih pagi kalak guna merentah keturunen Abraham, Isak, ras Jakup. Sebap Kupepulung pagi mulihi kalak si itaban+ janah mekuah ateKu kalak e.’”+
