Jeremia 34:1-22
34 Reh kata Jahwe man Jeremia sanga Nebukadnesar* raja Babilon, kerina pasukenna, kerina kerajan si ikuasaina, ras kerina bangsa sangana erperang ngelawan Jerusalem ras kota-kotana,+ nina,
2 “Bagenda nina Jahwe Dibata Israel, ‘Kataken man Sedekia+ raja Juda, “Bagenda nina Jahwe, ‘Kuserahken pagi kota enda ku tan raja Babilon, janah tutungna pagi kota enda.+
3 La pagi kam banci kiam arah raja e nari, sebap pasti pagi kam itangkap ras iserahken man bana.+ Lawes pagi kam ku Babilon, janah ngerana pagi kam pedempak ayo ras raja Babilon.’+
4 Tapi o Sedekia raja Juda, begikenlah kai nina Jahwe, ‘Bagenda nina Jahwe kerna kam, “Labo pagi kam mate alu pedang.
5 Tapi mate pagi kam alu tenang.+ Ban kalak e pagi acara nutung kemenyan man bandu bagi si lakoken kalak e man nini bulangndu, eme raja-raja sope kam. Tangisi kalak e pagi kam, nina, ‘Andiko, Tuanku!’ sebap ‘Aku si enggo ngatakenca,’ nina Jahwe.”’”’”
6 Kenca si e, peseh Nabi Jeremia kerina kata-kata e man Sedekia raja Juda i Jerusalem,
7 sanga pasuken raja Babilon erperang ngelawan Jerusalem ras kerina kota Juda si lit denga,+ eme Lakis+ ras Aseka.+ Kota-kota e nari ngenca si tading i kota-kota si erbenteng i Juda.
8 Reh kata Jahwe man Jeremia kenca iban Raja Sedekia perjanjin ras kerina kalak Jerusalem guna ngumumken kebebasen man budak-budak,+
9 gelah kerina kalak arus mbebasken budak-budakna si kalak Heber, dilaki bage pe diberu, gelah la lit kalak Jahudi si mperbudak kalak Jahudi.
10 Kerina peminpin ras kerina rakyat pe patuh. Setuju kalak e man perjanjin guna mbebasken budakna si dilaki ras si diberu janah lanai perbudakna kalak e. Patuh kalak e janah pediatna budak-budak e lawes.
11 Tapi bas pudi wari, baba kalak e ka mulih budakna si dilaki ras si diberu si enggo ibebasken janah paksana kalak e mulihi jadi budak.
12 Emaka reh kata Jahwe man Jeremia, bagenda nina Jahwe,
13 “Bagenda nina Jahwe, Dibata Israel, ‘Enggo Kuban perjanjin ras nini bulang kena+ sanga Kubaba kalak e ndarat arah Mesir, arah ingan perbudaken nari,+ ningKu man kalak e,
14 “Bas akhir tahun pepituken, arus bebasken kena budak kena si kalak Heber, si idayaken man kena janah si enggo erdahin enem tahun ras kena. Arus bebasken kena kalak e.”+ Tapi la begiken nini bulang kena Aku janah la perdiatekenna.
15 Mbaru-mbaru* enda robah kena janah lakoken kena kai si benar i lebe-lebeKu, bebasken kena kalak si sebangsa ras kena arah perbudaken nari, janah ban kena perjanjin i lebe-lebeKu, i rumah si maba gelarKu.
16 Tapi dungna berubah pikiren kena janah ban kena gelarKu jadi najis.+ Baba kena ka budak kena si dilaki ras si diberu si enggo bebasken kena menurut sura-sura kalak e janah paksa kena kalak e mulihi jadi budak.’
17 “Emaka bagenda nina Jahwe, ‘La kena patuh sanga ngumumken kebebasen man kalak si sebangsa ras kena.+ Emaka Kuumumken pagi kebebasen enda man kena,’ nina Jahwe, ‘mate pagi kena perban pedang, kelihen,+ ras wabah penakit, janah mbiar pagi Kuban kerina kerajan i doni+ ngidah kai si terjadi man kena.
18 Bage me pagi si terjadi man kalak si ngelanggar perjanjinKu ras si la ndalanken perjanjin si ibanna i lebe-lebeKu, sanga belahna anak lembu jadi dua jenari erdalan kalak e i tengah-tengahna.*+
19 Kalak e eme peminpin Juda, peminpin Jerusalem, pejabat istana, imam, ras kerina rakyat bas negri enda si erdalan i tengah-tengah anak lembu si enggo ibelah dua ndai.
20 Kubereken pagi kalak e man musuhna bage pe man kalak si merhat munuh ia. Mayat kalak e jadi pangan perik-perik i langit ras binatang liar i doni pagi.+
21 Sedekia raja Juda ras kerina pejabatna, Kuserahken pagi man musuhna, man kalak si merhat munuh ia, bage pe ku tan pasuken raja Babilon+ si gundari mundur arah kena nari.’+
22 “‘Kubere pagi perentah,’ nina Jahwe, ‘Kuban pagi kalak e reh mulihi ku kota enda. Serang kalak e pagi kota enda, rebutna, ras tutungna.+ Kuban pagi kota-kota Juda jadi ingan si gersang janah la lit si ngianisa.’”+
Cataten i teruh
^ As. “Nebukadresar,” penggelaren si deban.
^ As. “Bas wari.”
^ Enda kebiasan si nai guna erban perjanjin jadi sah.
