Jeremia 35:1-19
-
Usihen arah keturunen kalak Rehap si patuh (1-19)
35 Reh kata Jahwe man Jeremia bas jaman Joyakim+ anak Josia raja Juda, nina,
2 “Laweslah kam ku rumah keturunen Rehap,+ ngeranalah kam man kalak e janah babai kalak e ku rumah Jahwe, ku salah sada ruangen ingan man.* Kenca si e bere kalak e minem anggur.”
3 Emaka kulegi Jahasanya anak Jeremia kempu Habasinia, senina-seninana, kerina anakna si dilaki, ras kerina keturunen Rehap.
4 Kubabai kalak e ku rumah Jahwe. Kubabai kalak e ku ruangen ingan anak-anak Hanan man. Hanan e anak Igdalia, pelayan Dibata si benar. Ruangen ingan man e lit i sebelah ruangen ingan pejabat-pejabat man si lit i datas ruangen ingan Maaseya man. Maaseya e anak Salum si njaga pintu.
5 Jenari kutamaken cangkir ras gelas-gelas si risi anggur i lebe-lebe keturunen Rehap janah ningku, “Inemlah anggur enda.”
6 Tapi ning kalak e bangku, “La kami nggit minem anggur ena, perban Jonadap+ anak Rehap eme nini bulang kami, mereken perentah man kami, nina, ‘Kena ras keturunen kena ndigan pe la banci minem anggur.
7 La banci bangun kena rumah, nuan benih, erban kebun anggur ras la banci lit kebun anggur kena. Arus kena tetap tading bas kemah-kemah, gelah gedang umur kena bas negri ingan kena jadi kalak asing.’
8 Emaka lalap patuhi kami kerina si perentahken Jonadap anak Rehap nini bulang kami. E me sebapna, kami, diberu kami, anak kami si dilaki ras si diberu la pernah minem anggur.
9 La bangun kami rumah jadi ingan tading kami, la lit kebun anggur kami, janah la lit juma kami ntah pe benih kami.
10 Tetap kami tading bas kemah-kemah janah patuhi kami kerina perentah Jonadap nini bulang kami.
11 Tapi sanga reh Nebukadnesar* raja Babilon nyerang negri enda,+ ning kami, ‘Ota lawes ku Jerusalem, kiam kita arah pasuken kalak Kaldea ras pasuken Siria.’ Emaka gundari tading kami i Jerusalem.”
12 Nina Jahwe man Jeremia,
13 “Bagenda nina Jahwe penguasa malekat, Dibata Israel, ‘Kataken man kalak Juda ras penduduk Jerusalem, “La kin enggo mulih-ulih kena isuruh patuh man kata-kataKu?”+ nina Jahwe.
14 “Jonadap anak Rehap nuruh keturunenna gelah ula minem anggur janah ikutken kalak e alu la minem anggur seh ngasa gundari. Alu bage, patuh kalak e man nini bulangna.+ Tapi kena, mulih-ulih Aku ngerana man kena, tapi la kena patuh man bangKu.+
15 Lalap Kuutus kerina pelayanKu eme nabi-nabiKu man kena, lalap Kuutus kalak e+ janah nina man kena, ‘Robah min kena arah dalan geluh kena+ janah lakokenlah si benar! Ula ikutken dibata-dibata si deban ras ula layani ia. Alu bage, banci kena tetap tading bas negri si Kubereken man kena ras nini bulang kena.’+ Tapi la perdiateken kena Aku janah la begiken kena.
16 Keturunen Jonadap anak Rehap patuh man perentah nini bulangna,+ tapi bangsa enda la nggit megiken Aku.”’”
17 “Bagenda nina Jahwe penguasa malekat, Dibata Israel, ‘Kuban pagi terjadi kerina bencana man Juda ras kerina penduduk Jerusalem, bagi si enggo pernah Kukataken man kalak e.+ Enggo lalap Aku ngerana man kalak e, tapi la begikenna. Enggo lalap Kulebuh kalak e, tapi la aloina.’”+
18 Kenca si e, bagenda nina Jeremia man kerina keluarga Rehap, “Bagenda nina Jahwe penguasa malekat, Dibata Israel, ‘Perban patuh kena man Jonadap nini bulang kena, janah lalap patuhi kena kerina si perentahkenna, pas bagi si perentahkenna,
19 bagenda nina Jahwe penguasa malekat, Dibata Israel, “Keturunen Jonadap anak Rehap, lalap pagi ngelayani i lebe-lebeKu.”’”
