Jeremia 36:1-32
36 Bas tahun peempatken pemerentahen Joyakim+ anak Josia raja Juda, ngerana ka Jahwe man Jeremia, nina,
2 “Buatlah sada gulungen,* tuliskenlah kerina si Kukataken man bandu kerna kalak Israel ras Juda+ bage pe kerna kerina bangsa,+ mulai tangtangna Aku ngerana man bandu bas jaman Josia seh ngasa gundari.+
3 Adi begi kalak Juda kerina bencana si nandangi Kuban man kalak e, banci saja nggit kalak e robah arah dalan geluhna si jahat, alu bage banci Kuampuni kesalahen ras dosa kalak e.”+
4 Kenca si e, lebuh Jeremia me Baruh+ anak Neria. Jenari kataken Jeremia kerina si pernah kataken Jahwe man bana, janah tulisken Baruh si e bas gulungen* ndai.+
5 Jenari, bereken Jeremia perentah man Baruh, nina, “Aku ilarang masuk ku rumah Jahwe.
6 Emaka, kam si arus masuk ku je, bacaken alu sora megang kata-kata Jahwe si enggo kukataken, si enggo tulisndu bas gulungen e. Bacaken e man bangsa enda i rumah Jahwe bas wari puasa, bacaken man kalak Juda si reh arah kota-kotana.
7 Banci saja pindo kalak e pagi perkuah ate Jahwe janah masing-masing kalak e robah arah dalan geluhna si jahat, sebap enggo kataken Jahwe kerna rawaNa ras nembeh ateNa si mbelin man bangsa enda.”
8 Emaka lakoken Baruh anak Neria e kerina si perentahken Nabi Jeremia. Bacakenna alu sora megang kata-kata Jahwe arah gulungen* e i rumah Jahwe.+
9 Bas tahun pelimaken pemerentahen Joyakim+ anak Josia raja Juda, bas bulan pesiwahken, kerina penduduk Jerusalem ras kerina rakyat reh arah kota-kota Juda ku Jerusalem. Lit pengumumen maka kerina arus erpuasa i lebe-lebe Jahwe.+
10 Alu sora megang, bacaken Baruh gulungen* si isina kata-kata Jeremia e man kerina rakyat si lit i rumah Jahwe i ruangen* Gemaria+ anak Sapan,+ juru tulis e. Ruangen e lit i halaman si arah datas, i lebe-lebe gerbang si mbaru bas rumah Jahwe.+
11 Sanga Mikaya anak Gemaria kempu Sapan megi kerina kata-kata Jahwe si lit bas gulungen* e,
12 lawes ia ku istana, ku ruangen sekertaris. Kerina pejabat sangana kundul i je, eme Elisama+ sekertaris e, Delaya anak Semaya, Elnatan+ anak Ahbor,+ Gemaria anak Sapan, Sedekia anak Hanania, ras kerina pejabat si debanna.
13 Kataken Mikaya man kalak e kerina si begina sanga bacaken Baruh gulungen* e man rakyat.
14 Kenca si e, kerina pejabat e ngutus Jehudi anak Netania anak Selemia anak Kusi ndahi Baruh guna ngataken, “Rehlah kam, baba gulungen si bacakenndu man rakyat.” Emaka lawes Baruh anak Neria ndahi kalak e janah babana gulungen e bas tanna.
15 Nina kalak e man bana, “Kundul kam. Bacaken isi gulungen e man kami janah megang ban sorandu.” Emaka bacaken Baruh man kalak e.
16 Kenca begi kalak e kerina kata-kata e, sitatapen kalak e, mbiar kalak e jenari nina man Baruh, “Arus sikataken kerina kata-kata e man raja.”
17 Sungkun kalak e Baruh, nina, “Kataken min man kami, engkai maka banci tuliskenndu kerina kata-kata e? Jeremia nge si nuruh kam nulissa?”
18 Nina Baruh ngaloi, “Payo, ia si ngataken kerina kata-kata e man bangku jenari kutulisken alu tinta bas gulungen* e.”
19 Nina pejabat-pejabat e man Baruh, “Kam ras Jeremia arus lawes janah cebuni. Ula sempat lit si meteh i ja ingan kena cebuni.”+
20 Simpan kalak e gulungen ndai bas ruangen Elisama sekertaris e. Kenca si e, lawes kalak e njumpai raja i halamen. Jenari peseh kalak e kerina si enggo begina ndai man raja.
21 Emaka utus raja me Jehudi+ muat gulungen e. Jenari buat Jehudi gulungen e arah ruangen Elisama, sekertaris e, janah bacakenna man raja ras man kerina pejabat-pejabatna si tedis i deher raja.
22 Paksa si e raja sangana kundul bas istana, bas inganna cudu sanga musim mbergeh, eme bas bulan pesiwahken.*
23 Kenca dung bacaken Jehudi telu ntah empat bagin arah gulungen e, ipotong raja bagin e alu piso sekertaris, jenari benterkenna ku api si gara, emaka tertutung kerina gulungen e.
24 La kalak e mbiar. Raja ras kerina pelayan-pelayanna si megi kerina kata-kata e la rigatkenna bajuna.
25 Amin gia Elnatan,+ Delaya,+ ras Gemaria+ mindo gelah la tutung raja gulungen e, la begiken raja kalak e.
26 Kenca si e, perentahken raja me Jerahmeel anak raja, Seraya anak Asrel, ras Selemia anak Abdel guna nangkap Baruh sekertaris e, bage pe Nabi Jeremia. Tapi buniken Jahwe kalak e.+
27 Kenca tutung raja gulungen si isina kata-kata si kataken Jeremia si tulis Baruh,+ nina Jahwe ka man Jeremia,
28 “Buatlah gulungen si deban janah tulislah kerina kata-kata si seri bagi bas gulungen si pertama ndai, si tutung Joyakim raja Juda.+
29 Katakenlah man Joyakim raja Juda, ‘Bagenda nina Jahwe, “Enggo tutungndu gulungen e janah nindu, ‘Engkai maka tulisndu bas gulungen e, “Pasti pagi reh raja Babilon janah kernepkenna negri enda ras kerina jelma bage pe binatang si lit i je”?’+
30 Emaka bagenda nina Jahwe kerna Joyakim raja Juda, ‘Labo pagi lit keturunenna si kundul i tahta Daud.+ Mayatna ipediat pagi kena las bas ciger wari ras bergehen bas berngi wari.+
31 Kupindo pagi pertanggung jawapen arah ia, keturunenna, ras pelayan-pelayanna perban kesalahenna. Kuban pagi terjadi kerina bencana man kalak e, man penduduk Jerusalem, kalak Juda, bagi si enggo Kukataken,+ perban la begiken kalak e.’”’”+
32 Buat Jeremia ka gulungen si deban janah berena man Baruh anak Neria, sekertaris e.+ Tulis Baruh kerina si kataken Jeremia eme kerina kata-kata si tertulis bas gulungen* si tutung Joyakim raja Juda.+ Mbue ka kata-kata si bage si itambahken bas gulungen e.
Cataten i teruh
^ As. “gulungen buku.”
^ As. “gulungen buku.”
^ Ntah “buku.”
^ Ntah “buku.”
^ Ntah “ruangen ingan man.”
^ Ntah “buku.”
^ Ntah “buku.”
^ Ntah “buku.”
^ Ntah “buku.”
