Jeremia 38:1-28
38 Sepatia anak Mattan, Gedalya anak Pashur, Juhal+ anak Selemia, ras Pashur+ anak Malkia megi kai si kataken Jeremia man kerina rakyat, nina,
2 “Bagenda nina Jahwe, ‘Kalak si tetap bas kota enda mate pagi perban pedang, kelihen, ras wabah penakit.+ Tapi si nyerah man kalak Kaldea tetap pagi nggeluh janah selamat.’+
3 Bagenda nina Jahwe, ‘Kota enda pasti pagi iserahken man pasuken raja Babilon, janah irebutna.’”+
4 Nina pejabat-pejabat e man raja, “Hukum mate saja ia,+ sebap banna mbiar prajurit si lit denga bas kota enda ras kerina rakyat perban rananna. Atena gelah bangsa enda kena bencana labo gelah dame.”
5 Nina Raja Sedekia ngaloi, “Lakokenlah uga kap kena mehuli. Labo kai pe banci lakoken raja guna ngelarang kena.”
6 Emaka tangkap kalak e Jeremia janah masukkenna ku bas sumur* si lit i Halamen Penjaga.+ Sumur e jang Malkia anak raja. Penusur kalak e Jeremia ku bas sumur e alu nali. Sumur e la lit launa, kubang ngenca lit, emaka reh mbagesna Jeremia masuk ku bas kubang e.
7 Bas istana lit sekalak pejabat, asalna Etiopia nari gelarna Ebedmelek.+ Begina berita maka Jeremia enggo imasukken ku bas sumur.* Paksa si e, raja sangana kundul bas Gerbang Benyamin.+
8 Emaka ndarat Ebedmelek arah istana nari janah nina man raja,
9 “O Tuanku Raja, jahat kap si lakoken kalak e man Jeremia! Masukken kalak e ia ku sumur,* mate kari ia i je perban kelihen, sebap lanai lit roti bas kota.”+
10 Dung e, perentahken raja man Ebedmelek kalak Etiopia e gelah babana 30 dilaki, guna narik Nabi Jeremia ndarat arah sumur* ndai sope lenga ia mate.
11 Emaka lawes Ebedmelek ras si 30 kalak ndai ku istana raja, ku ingan si lit i teruh ingan nimpan erta.+ I je ibuat kalak e paken bekas ras piga-piga uis si enggo merigat. Dung e, penusur kalak e uis ndai alu nali man Jeremia si lit bas sumur.*
12 Kenca si e nina Ebedmelek kalak Etiopia e man Jeremia, “Tamaken paken bekas ras uis si merigat e ku teruh kikikndu gelah ula kapndu mesui perban nali e.” Jenari ban Jeremia bage,
13 dung e angkat kalak e Jeremia alu nali janah tarikna ndarat arah sumur* e. Kenca si e, Jeremia tetap tading i Halamen Penjaga.+
14 Dung e, utus Raja Sedekia kalak guna ngelegi Nabi Jeremia bas dalan masuk peteluken, si lit i rumah Jahwe. Nina raja man Jeremia, “Nungkun ateku man bandu. Ula bunikenndu kai pe arah aku.”
15 Nina Jeremia man Sedekia, “Adi kuturiken man bandu, pasti bunuhndu aku. Adi kunasehati kam, pasti labo begikenndu aku.”
16 Emaka ersumpah Raja Sedekia man Jeremia alu erbuni-buni, nina, “Ersumpah aku i lebe-lebe Jahwe si nggeluh, si mereken kita kegeluhen, labo kam kubunuh, labo kam kuserahken man kalak si atena munuh kam.”
17 Nina Jeremia man Sedekia, “Bagenda nina Jahwe, Dibata penguasa malekat, Dibata Israel, ‘Adi nyerah kam man pejabat-pejabat raja Babilon, tetap pagi kam nggeluh janah kota enda la pagi itutung. Kam bage pe kalak si lit bas rumahndu banci pagi selamat.+
18 Tapi adi la kam nyerah man pejabat-pejabat raja Babilon, iserahken pagi kota enda man kalak Kaldea. Tutung kalak e pagi kota enda,+ janah kam la banci pulah arah tan kalak e nari.’”+
19 Kenca si e, nina Raja Sedekia man Jeremia, “Mbiar aku man kalak Jahudi si enggo erpihak man kalak Kaldea, sebap adi iserahken aku man kalak e, kejam pagi perbahanenna man bangku.”
20 Tapi nina Jeremia, “Labo pagi kam iserahken man kalak e. Mindo aku man bandu, patuhi min kata-kata Jahwe si kupeseh man bandu. Labo pagi terjadi si la mehuli man bandu janah tetap pagi kam nggeluh.
21 Adi la kam nggit nyerah, terjadi pagi si enggo cidahken Jahwe man bangku, eme:
22 Kerina diberu si lit denga bas istana raja Juda ibaba pagi man pejabat-pejabat raja Babilon.+ Nina diberu-diberu e pagi,‘Kam enggo itipu kalak si tekindu* janah talukenna kam.+
Enggo banna nahendu gedap bas kubang.
Gundari mundur kalak e janah tadingkenna kam.’
23 Kerina diberundu ras anak-anakndu si dilaki ibaba pagi man kalak Kaldea. Labo pagi kam banci pulah arah tan kalak e. Tangkap raja Babilon+ pagi kam janah itutung pagi kota enda perban kam.”+
24 Kenca si e nina Sedekia man Jeremia, “Ula sempat ise pe meteh kerna si e, gelah ula kam mate.
25 Adi begi pejabat-pejabat maka kam enggo ngerana ras aku janah nina, ‘Kataken min man kami kai nina raja man bandu. Ula bunikenndu kai pe arah kami nari, gelah la bunuh kami kam.+ Kai nina raja man bandu?’
26 bagendalah nindu ngaloi kalak e, ‘Mindo aku man raja gelah ula kirimna aku mulihi ku rumah Jehonatan, gelah ula aku mate i je.’”+
27 Bas pudi wari, dahi pejabat-pejabat me Jeremia janah sungkunina ia. Jawap Jeremia kalak e bagi si perentahken raja man bana. Emaka lanai sungkuni kalak e ia, sebap la lit si meteh kai si cakapkenna ras raja.
28 Jeremia tetap tading i Halamen Penjaga+ seh ngasa Jerusalem irebut. Tetap ia i je sanga Jerusalem irebut.+
Cataten i teruh
^ Maksudna, lubang guna nimpan lau.
^ Maksudna, lubang guna nimpan lau.
^ Maksudna, lubang guna nimpan lau.
^ Maksudna, lubang guna nimpan lau.
^ Maksudna, lubang guna nimpan lau.
^ Maksudna, lubang guna nimpan lau.
^ As. “si erdame ras kam.”
