Jeremia 39:1-18
39 Bas tahun si pesiwahken pemerentahen Sedekia raja Juda, bas bulan si pe-10-ken, reh Nebukadnesar* raja Babilon ras kerina pasukenna nyerang Jerusalem, janah kepung kalak e kota e.+
2 Bas tahun si pe-11-ken pemerentahen Raja Sedekia, bas bulan peempatken, bas wari si pesiwahken bulan e, hancurken kalak e tembok kota.+
3 Kerina pejabat raja Babilon reh janah kundul bas Gerbang Tengah.+ Kalak e eme Samgar si gelarna Nergal Sareser, Rabsaris si gelarna Nebo Sarsekim,* Rabmag* si gelarna Nergal Sareser, ras kerina pejabat raja Babilon si debanna.
4 Sanga Sedekia raja Juda ras kerina prajuritna ngidah kalak Kaldea, kiam kalak e+ janah ndarat kalak e kota nari sanga berngi ngelewati taman raja. Lewatina gerbang si lit i antara tembok si erlapis dua. Jenari, lawes kalak e ku arah Araba.+
5 Tapi ayaki pasuken Kaldea kalak e janah datna Sedekia i Gurun Pasir Jeriho.+ Tangkap kalak e ia janah baba kalak e ku Nebukadnesar* raja Babilon i Ripla+ negri Hamat.+ I je tetapken raja hukumen man Sedekia.
6 Bunuhi raja Babilon anak-anak Sedekia i Ripla i lebe-lebe Sedekia, janah bunuhi raja Babilon kerina bangsawan Juda.+
7 Pepentangna mata Sedekia, jenari iketna alu rante tembaga guna ibaba ku Babilon.+
8 Tutung kalak Kaldea istana ras rumah-rumah rakyat.+ Runtuhken kalak e tembok-tembok Jerusalem.+
9 Kalak si tading denga i kota e, kalak si mberontak si enggo erpihak man bana, ras ise pe si tading denga i je, itaban Nebusaradan+ kepala pengawal e ku Babilon.
10 Tapi piga-piga rakyat si mesera kel geluhna, si la lit kadena pe, la baba Nebusaradan kepala pengawal e janah tadingkenna i Juda. Bas wari e berekenna kebun-kebun anggur ras juma-juma guna idahiken.*+
11 Nebukadnesar* raja Babilon mereken perentah man Nebusaradan kepala pengawal e kerna Jeremia, nina,
12 “Baba ia janah urus ia. Ula ban ia kaden pe. Bereken kai pe si pindona.”+
13 Emaka Nebusaradan kepala pengawal e, Rabsaris* Nebusyaban, Rabmag* Nergal Sareser, ras kerina kalak si terpandang i Babilon ngutus kalak guna
14 maba Jeremia ndarat arah Halamen Penjaga,+ janah naruhken Jeremia man Gedalya+ anak Ahikam+ kempu Sapan,+ guna mabasa ku rumah Gedalya. Emaka tading Jeremia ras rakyat si deban.
15 Sanga Jeremia itahan i Halamen Penjaga,+ nina Jahwe man bana,
16 “Laweslah, kataken man Ebedmelek,+ kalak Etiopia e, ‘Bagenda nina Jahwe penguasa malekat, Dibata Israel, “Kuban pagi terjadi kerina bencana si Kukataken man kota e, labo si mehuli. Bas paksana pagi, idahndu me si e kerina terjadi.”’
17 “‘Tapi Kuselamatken pagi kam bas wari e,’ nina Jahwe, ‘labo pagi kam iserahken man kalak si erban kam mbiar.’
18 “‘Sebap Kuselamatken pagi kam janah labo pagi kam mate iban pedang. Selamat pagi geluhndu,+ perban tek kam man bangKu,’+ nina Jahwe.”
Cataten i teruh
^ As. “Nebukadresar,” penggelaren si deban.
^ Bas teks Heber banci ka ibagi jadi “Nergal Sareser, Samgar Nebo, Sarsekim, Rabsaris.”
^ Ntah “peminpin ahli bintang-bintang.”
^ As. “Nebukadresar,” penggelaren si deban.
^ Ntah banci saja “ras tugas wajip.”
^ As. “Nebukadresar,” penggelaren si deban.
^ Ntah “peminpin pegawai istana.”
^ Ntah “peminpin ahli bintang-bintang.”
