Jeremia 40:1-16
40 Reh kata Jahwe man Jeremia kenca Nebusaradan+ kepala pengawal e mbebasken ia i Rama.+ Paksa si e tan Jeremia iiket denga, janah ia lit ras kerina kalak Jerusalem bage pe kalak Juda si itaban si nandangi ibaba ku Babilon.
2 Baba kepala pengawal e Jeremia ku duru janah nina, “Enggo kataken Jahwe Dibatandu bencana enda man ingan enda,
3 janah ban Jahwe terjadi bagi si katakenNa, perban erdosa kena man Jahwe janah la patuhi kena kata-kataNa. E me sebapna maka terjadi si e kerina man kena.+
4 Gundari kupulahi gari si ngiket tanndu. Adi nggit kam, ikutken aku ku Babilon, janah aku pagi si ngurus kam. Tapi adi la kam nggit ikut ku Babilon, la padah kam ikut. Kerina negri enda lit i lebe-lebendu. Pilihlah ku ja atendu lawes.”+
5 Sanga Jeremia rukur denga, nina Nebusaradan man bana, “Dahilah Gedalya+ anak Ahikam+ kempu Sapan+ si enggo lantik raja Babilon guna ngawasi kota-kota Juda. Tadinglah kam ras ia i tengah-tengah rakyat. Ntah, laweslah ku ja pe atendu.”
Kenca si e, bere kepala pengawal e persedian pangan ras hadiah man bana jenari lawes ia.
6 Emaka lawes Jeremia ndahi Gedalya anak Ahikam i Mispa+ janah tading ia i tengah-tengah kalak si tading denga bas negri e.
7 Bas pudi wari, peminpin pasuken ras anak buahna si lit bas negri e, megi maka Gedalya anak Ahikam enggo ilantik raja Babilon guna ngawasi negri e, bage pe ngawasi kalak mesera si la ibaba ku Babilon,+ la soal si dilaki, si diberu, ras anak-anak.
8 Emaka jumpai kalak e Gedalya i Mispa.+ Kalak e eme Ismael+ anak Netania, Johanan+ ras Jonatan anak Kareah, Seraya anak Tanhumet, bage pe anak-anak Epai kalak Netopa, ras Jesania+ anak Maakat, radu ras pasuken-pasuken kalak e.
9 Ersumpah Gedalya anak Ahikam kempu Sapan man kalak e bage pe man pasuken-pasuken kalak e, nina, “Ula kena mbiar jadi budak kalak Kaldea. Tadinglah i negri enda janah layanilah raja Babilon. Alu bage, labo kari kena kaden pe.+
10 Aku pagi si tetap tading i Mispa jadi wakil kena i lebe-lebe kalak Kaldea si reh ndahi kita. Tapi pepulung kenalah anggur, buah-buah musim perlego, ras minak saitun, jenari tamaken ku bas ingan nimpansa janah tadinglah bas kota-kota si enggo rebut kena.”+
11 Kerina kalak Jahudi si lit i Moap, Ammon, Edom, ras negri-negri si deban pe megi maka ipediat raja Babilon piga-piga rakyat tetap tading i Juda, janah enggo lantikna Gedalya anak Ahikam kempu Sapan ngawasi kalak e.
12 Emaka kerina kalak Jahudi si merap ku erbage ingan, mulai mulih ku negri Juda janah jumpai kalak e Gedalya i Mispa. Pepulung kalak e mbue kel anggur ras buah-buah musim perlego.
13 Johanan anak Kareah ras kerina peminpin pasukenna si lit i negri e, reh ndahi Gedalya i Mispa.
14 Nina kalak e man bana, “La nge tehndu maka Baalis raja Ammon+ enggo nuruh Ismael anak Netania guna munuh kam?”+ Tapi Gedalya anak Ahikam la tek man kalak e.
15 Emaka alu erbuni-buni ngerana Johanan anak Kareah man Gedalya i Mispa, nina, “Kubunuh ateku Ismael anak Netania. Labo pagi ise pe si metehsa. Engkai maka arus bunuhna kam? Engkai maka kerina kalak Juda si pulung ras kam arus merap? Engkai maka kalak Juda si tading denga arus kernep?”
16 Tapi nina Gedalya+ anak Ahikam man Johanan anak Kareah, “Ula bage. Sebap kai si katakenndu kerna Ismael e labo tuhu.”
