Jeremia 49:1-39
49 Kerna kalak Ammon,+ bagenda nina Jahwe,
“La kin lit anak Israel?
La kin lit ahli warisna?
Engkai maka Gat+ irebut Milkom?+
Engkai maka kalak si nembah ia tading i kota-kota Israel?”
2 “Nina Jahwe, ‘Bas paksana pagi,Kuban sora tanda perang* ngelawan Raba,+ eme kota kalak Ammon.+
Kota e jadi reruntuhen pagi janah ipediat la lit si ngianisa,Kota-kota i sekelilingna itutung pagi.’
‘Rebut Israel pagi negri kalak si mbarenda ngerebut negrina,’+ nina Jahwe.
3 ‘O Hesbon, nderkuhlah sebap Ai enggo ihancurken!
Nderkuhlah, o penduduk kota-kota si lit i sekeliling Raba.
Pakelah kain guni.
Nderkuhlah janah laweslah ku jah ku je i tengah kandang biri-biri,*Sebap itaban pagi Milkom,Radu ras imam-imam bage pe peminpin-peminpinna.+
4 O kota si la setia, engkai maka sombong kam perban lembah-lembahndu,*Lembah si melala launa,Andalkenndu ertandu,Janah nindu, “Ise si pang nyerang aku?”’”
5 “Bagenda nina Tuhan Si Meganjangna, Jahwe penguasa malekat, ‘Terjadi pagi man bandu kai si erban mbiar,Kuban pagi si e reh arah ingan si lit i sekelilingndu.
Merap pagi kam ku kerina arah,Janah la pagi lit si mpepulung kalak si melariken diri.’”
6 “‘Tapi kenca si e, Kupepulung pagi kalak Ammon si itaban,’ nina Jahwe.”
7 Bagenda nina Jahwe penguasa malekat man Edom,
“Lanai kin lit kepentaren i Teman?+
Kalak si lit pengertinna, lanai kin banci mereken nasehat si mehuli?
Enggo kin macik kepentaren kalak e?
8 Kiamlah! Mulihlah, o penduduk Dedan,+Laweslah janah tadinglah bas ingan-ingan si meteruk!
Sebap Kuban pagi terjadi bencana man Esau,Sanga seh waktuna guna ngukum ia.
9 Adi reh pagi kalak si rani anggur ndahi kam,Pasti pagi tadingkenna deba guna iputikken.
Adi reh pinangko sanga berngi,Kai si atena cedaina ngenca si cedaina.+
10 Kuban pagi Esau tilanjang.
Kucidahken pagi ingan-inganna cebuni,Emaka lanai pagi ia banci cebuni.
Anak-anakna, seninana, ras tetanggana ikernepken pagi,+Janah ia pe lanai pagi lit.+
11 Tadingkenlah anak-anakndu si la erbapa.
Kuurus pagi kalak e,Diberu-diberu si janda pe tek pagi man bangKu.”
12 Sebap bagenda nina Jahwe, “Adi kalak si la ihukum guna minem arah calung e pe arus nginemca, me la mungkin kam la ihukum? Pasti pagi kam ihukum, janah arus inemndu e.”+
13 “Tuhu-tuhu Aku ersumpah,” nina Jahwe, “jadi ingan si erban mbiar pagi Bosra janah hancur.+ Itokohi janah isumpahi kalak pagi ia. Jadi reruntuhen pagi kerina kotana seh rasa lalap.”+
14 Enggo Kubegi berita arah Jahwe,Sekalak suruh-suruhen enggo iutus ku tengah bangsa-bangsa guna ngataken,
“Pulunglah kena janah seranglah ia,Ersikaplah guna erperang.”+
15 “Sebap enggo Kuban kam igombangi i tengah bangsa-bangsa.
Ciga kel ate kalak ngidah kam.+
16 O kam si erlindung i tebing batu,Si tading i bukit si meganjang,Tertipu kam perban mbiar kalak man bandu,Bage pe perban kesombongenndu.
Amin pe banndu asarndu bas ingan si meganjang bagi kuliki,Kupenusur pagi kam je nari,” nina Jahwe.
17 “Edom jadi ingan si erban mbiar pagi.+ Tiap kalak si lewat, ngeri pagi akapna ngidahsa, janah tokohi kalak e ia perban kai si terjadi man bana.
18 La pagi lit si tading i je ras ringan i je,+ bagi Sodom ras Gomora ras kota-kota si lit i sekelilingna si enggo ihancurken,”+ nina Jahwe.
19 “Nenlah! Lit pagi kalak si reh janah serangna mbalmbal si aman bagi singa+ si ndarat arah rambah bas gedang-gedang Lau Jordan, kiam pagi kalak e arah negri e. Kulantik pagi kalak si ipilih e guna nguasai negri e. Ise kin si bagi Aku, ise kin si ngasup ngelawan Aku? Permakan si apai kin si ngasup ngelawan Aku?+
20 Emaka begikenlah keputusen* Jahwe kerna Edom ras kai si lit bas perukurenNa kerna penduduk Teman:+
Isaren pagi anak asuh-asuhen kalak e.
BanNa pagi ingan tading kalak e jadi gersang perban kai si lakokenna.+
21 Sora perdabuh kalak e erban doni mugur-ugur.
Lit sora nderkuh!
Sorana terbegi seh ku Laut Merah.+
22 Kabang pagi ia ku datas jenari ku teruh bagi kuliki,+Kimbangkenna pagi kabengna i datas Bosra.+
Bas wari e, perasan prajurit EdomBagi perasan sekalak diberu si sangana melahirken.”
23 Man Damaskus:+
“Hamat+ ras Arpad enggo ipermelaken,Sebap begi kalak e berita si la mehuli.
Mbiar kalak e.
Kalak e bali pagi bagi laut si la banci tenang.
24 Damaskus lanai pang.
Mulih ia guna kiam, tapi panik pagi ia.
Susah janah mesui akapna,Bagi diberu si sangana melahirken.
25 Engkai maka kota si ipuji-puji e, kota si dem keriahen e,Lalap lenga itadingken?
26 Anak-anak peranana mate pagi i lapangen-lapangen kota,Janah tentera-tenterana kernep pagi bas wari e,” nina Jahwe penguasa malekat.
27 “Kututung pagi tembok Damaskus,Menara-manara Benhadat si erbenteng, keri pagi ipan api.”+
28 Man Kedar+ ras kerajan-kerajan Hasor, si enggo taluken Nebukadnesar,* raja Babilon, bagenda nina Jahwe,
“Laweslah janah nangkihlah ku Kedar,Jenari hancurken anak-anak si dilaki arah Timur.
29 Kemah-kemah ras asuh-asuhen kalak e irampas pagi,Bage pe kain kemah ras kerina barang kalak e.
Unta kalak e ibaba pagi lawes.
Serko pagi kalak man kalak e, nina, ‘I ja pe lit kebiaren!’”
30 “Kiamlah! Ndauhlah kam lawes!
O penduduk Hasor, cebunilah bas ingan-ingan si meteruk,” nina Jahwe.
“Sebap Nebukadnesar* raja Babilon enggo erban taktik guna nyerang kena,Janah banna rencana guna nyerang kena.”
31 “Tediskenlah, seranglah bangsa si aman geluhna,Bangsa si tading alu aman!” nina Jahwe.
“La lit pintuna ntah pe palang pintuna, janah tading kalak e bas pelosok.
32 Irampas pagi unta-unta kalak e,Ijarah pagi asuh-asuhenna si melala.
Kalak si enggo cukurna buk perdempakenna,+Kumerapken pagi ku erbage arah.
Kuban pagi terjadi bencana arah kerina arah man kalak e,” nina Jahwe.
33 “Hasor jadi asar biang kerangen pagi,Jadi ingan si la iurus seh rasa lalap.
La pagi lit si tading i je,La pagi lit si ringan i je.”
34 Enda me si kataken Jahwe man Nabi Jeremia kerna Elam,+ bas awal pemerentahen Sedekia+ raja Juda, nina,
35 “Bagenda nina Jahwe, penguasa malekat, ‘Kupenggelken pagi busur panah Elam,+ eme sumber gegeh kalak e.
36 Kuban pagi empat angin si rehna arah empat arah ku Elam, janah Kumerapken pagi kalak e ku kerina arah. Kalak Elam si merap, lawes pagi ku kerina bangsa.’”
37 “Kuhancurken pagi kalak Elam i lebe-lebe musuh kalak e ras i lebe-lebe kalak si atena munuh kalak e. Kuban pagi reh bencana man kalak e, eme rawaKu si gara,” nina Jahwe. “Kuban pagi reh pedang guna ngayaki kalak e seh ngasa kernep kalak e.”
38 “Kuban pagi tahtaKu i Elam,+ Kukernepken pagi raja ras peminpin-peminpin kalak e,” nina Jahwe.
39 “Tapi bas pendungi masa e, Kupepulung pagi kalak Elam si itaban,” nina Jahwe.
Cataten i teruh
^ Ntah banci saja, “sora surak-surak perang.”
^ Ntah “kandang-kandang si iban arah batu.”
^ Ntah “baluren-balurenndu.”
^ Ntah “nasehat.”
^ As. “Nebukadresar,” penggelaren si deban.
^ As. “Nebukadresar,” penggelaren si deban.
