Jeremia 8:1-22
8 Nina Jahwe, “Paksa si e, tulan-tulan raja-raja Juda, tulan peminpin-peminpinna, tulan imam-imamna, tulan nabi-nabina, ras tulan penduduk Jerusalem, ipedarat pagi arah kuburenna.
2 Imerapken pagi tulan-tulan e i teruh matawari, i teruh bulan, ras kerina bintang-bintang i langit.* Mbarenda keleng ate kalak e benda-benda penerang e, layanina ras ikutkenna. Sujud kalak e man benda-benda penerang e janah pindona petunjukna.+ Tulan-tulan kalak e labo pagi ipepulung ntah pe ikuburken. Tapi ipediat pagi bagi kotoren i taneh.”+
3 “Kalak si nggeluh denga i tengah-tengah bangsa si jahat e, si enggo Kumerapken ku erbage ingan, padin pagi kapna mate asangken nggeluh,” nina Jahwe penguasa malekat.
4 “Kataken man kalak e, ‘Bagenda nina Jahwe,
“Adi ndabuh kalak e, la kin keke kalak e mulihi?
Adi lit sekalak si mulih, la kin si sada nari pe mulih ka nge?
5 Engkai maka umat enda, penduduk Jerusalem, lalap la setia man bangKu?
Lalap kalak e erhianat man bangKu,La kalak e nggit mulihken.+
6 Lalap kalak e Kuperdiateken ras Kubegiken, tapi kai si kataken kalak e la tuhu.
La lit si robah arah perbahanenna si jahat ras nungkun, ‘Engkai maka kuban bage?’+
Tiap kalak ngikutken kai si lakoken jelma si enterem, bagi kuda si kiam ku peperangen.
7 Burung bangau saja pe tehna ndigan waktuna pindah.
Merpati, burung layang-layang, ras burung anis* pe tehna ndigan waktuna mulih.
Tapi umatKu la angkana keputusen Jahwe.”’+
8 ‘Uga maka ning kena, “Kami pentar, lit undang-undang* Jahwe bas kami”?
Tapi situhuna pulpen penulis-penulis*+ ipake guna nulis si la tuhu ngenca.
9 Kalak si pentar enggo ipermelaken.+
Mbiar pagi kalak e janah terjebak.
Enggo tulak kalak e kata-kata Jahwe.
Emaka, kepentaren kai kin si lit bas kalak e?
10 Kubereken pagi diberu kalak e man dilaki si deban,Juma kalak e man kalak si deban,+Sebap mulai si kitik seh ku si galang, kerina erusaha ndatken untung si la jujur.+
Mulai nabi nari seh ku imam, kerina nggit nipu.+
11 Tambari kalak e atena kehancuren anak bangsaKu si diberu tapi asal-asalen, nina,“Lit dame! Lit dame!”
Padahal labo lit dame.+
12 La nge mela akap kalak e perban perbahanenna si erban ciga ate?
La akap kalak e mela!
Kalak e la meteh mela!+
Ndabuh pagi kalak e i tengah-tengah kalak si enggo ndabuh.
Tertuktuk pagi kalak e sanga Kuhukum kalak e,’+ nina Jahwe.
13 Nina Jahwe, ‘Sanga Kupepulung kalak e,Kukernepken pagi kalak e. Lanai pagi lit buah batang anggur ras batang ara, bulung-bulungna pe melus.
Bene pagi si Kubereken man kalak e.’”
14 “Man kai kita kundul i jenda?
Mari kita pulung janah masuk ku kota-kota si erbenteng+ jenari kernep i je.
Sebap kernep pagi kita iban Jahwe Dibatata,BereNa pagi kita lau inemen si lit racunna,+Sebap enggo erdosa kita man Jahwe.
15 Arapken kalak pagi dame, tapi la lit si mehuli si terjadi,Ngarap kalak e ipepalem, tapi kebiaren ngenca si lit!+
16 Terbegi sora kuda musuh arah Dan nari,Sora kuda jantan si erngih-ngihSi e erban nggirgir belang-belang negri e.
Masuk musuh, hancurkenna negri e ras kerina isina,Bage pe kota ras kerina pendudukna.”
17 Nina Jahwe, “Kukirim pagi nipe ku tengah-tengah kena,Nipe si erbisa si la banci ipelemuk alu mantra,Tagutna pagi kena.”
18 Ceda kel ateku,Ateku ceda e la tertambari.
19 Arah negri si ndauh terbegi sora mindo penampat,Sora anak bangsaKu si diberu, nina,
“La kin lit Jahwe i Sion?
La nge lit rajana i je?”
“Engkai maka ban kalak e Aku sakit hati alu patung-patung ukirenna,Ras dibata-dibata si deban si la erguna?”
20 “Musim rani enggo lewat, musim perlego enggo dung,Tapi kita lenga iselamatken!”
21 Getem kel pusuhku perban kehancuren anak bangsaku si diberu,+Kecewa kel aku.
Mbiar kel aku.
22 La nge lit minak balsem* i Gileat?+
La nge lit dokter i je?+
Engkai maka anak bangsaku si diberu lalap lenga malem?+
Cataten i teruh
^ As. “kerina pasuken langit.”
^ Ntah banci saja “burung bangau.”
^ Ntah “petunjuk.”
^ Ntah “sekertaris-sekertaris.”
^ Minak si merim si iban arah sinuan-sinuan ntah pe batang kayu tertentu. E ipake guna jadi tambar ntah pe parfum.
