Jeremia 9:1-26
9 Bicara sumur min ndai takalku enda,Janah mataku pancurna!+
Enggo ngandung aku suari ras berngi,Perban bangsaku si enggo ibunuh.
2 Bicara lit min ndai inganku erberngi bas taneh mesawang!*
Enggo kutadingken bangsaku enda, lawes aku nadingken kalak e,Sebap kerina kalak e perlua-lua,+Kerina kalak e penghianat.
3 Bengkokken kalak e dilahna bagi busur panah.
Si erkuasa bas negri e eme tipun, labo kesetian.+
“Reh jahatna kalak e,La perdiateken kalak e Aku,”+ nina Jahwe.
4 “O kena kerina, hati-hatilah man teman kena,Ula kena tek man senina kena.
Sebap kerina senina kena penghianat,+Kerina teman kena tukang pitnah.+
5 Kerina kalak nipu temanna.
La lit si ngataken si tuhu.
Ilatih kalak e dilahna ngataken bual,+Pekerina gegehna ngelakoken si salah.
6 Ringan kam i tengah-tengah penipu.
E me sebapna la kalak e nggit nandai Aku,” nina Jahwe.
7 Emaka bagenda nina Jahwe penguasa malekat,
“Kubersihken* pagi kalak e janah Kuuji.+
Kai nari kin si banci Kulakoken man anak bangsaKu si diberu enda?
8 Dilah kalak e ngataken tipun bagi anak panah si banci munuh.
Cakapken kalak e kerna dame man temanna,Tapi pusuhna ngerencanaken jebaken.”
9 Nina Jahwe, “La kin cocok nge Kuhukum kalak e perban kerina e?
La kin cocok nge Kubalas bangsa si bage?+
10 Ngandung aku, kutangisi gunung-gunung,Kuendeken pagi lagu ceda ate* man mbalmbal i taneh mesawang,*Sebap kerina e enggo itutung seh asa keri emaka la lit kalak si lewat,Sora asuh-asuhen pe lanai terbegi.
Perik-perik ras binatang liar enggo kiamen, kerina enggo lawes.+
11 Kuban pagi Jerusalem jadi gun-gunen batu,+ jadi asar biang kerangen.+
Kuban pagi kota-kota Juda la iingani, la lit pendudukna.+
12 Ise si pentar guna ngangkai si enda?
Man ise Jahwe enggo ngerana, gelah banci katakenNa kerna si enda?
Engkai maka kernep negri enda?
Engkai maka gersang negri enda bagi taneh mesawang,*Si erbanca la lit kalak si lewat?”
13 Nina Jahwe, “Sebap tulak kalak e undang-undang* si Kubereken man kalak e, la ikutken kalak e undang-undangKu ras la patuhina kataKu.
14 Tapi keras kepala kalak e, pusuhna ngenca si ikutkenna.+ Ikutken kalak e patung-patung Baal bagi si ajarken nini bulangna.+
15 Emaka bagenda nina Jahwe penguasa malekat, Dibata Israel, ‘Kuban pagi ipan umat enda sinuan-sinuan si pagit, Kuban inem kalak e lau si lit racunna.+
16 Kuban pagi kalak e merap i tengah bangsa-bangsa si la tandai kalak e ras la tandai nini bulangna.+ Kuban pagi reh pedang guna munuh kalak e seh ngasa kernep kalak e.’+
17 Bagenda nina Jahwe penguasa malekat,‘Ertindaklah alu pengertin.
Lebuhlah diberu-diberu si ngendeken lagu ceda ate,*+Legilah diberu-diberu si beluh ngendekenca,
18 Gelah banci mis endeken kalak e lagu ceda ate man banta,Gelah naktaken iluhtaJanah maler.+
19 Sebap sora perngandungen terbegi arah Sion,+ nina,
“Kami enggo ikernepken!
Mela kel akap kami!
Sebap enggo tadingken kami negri kami, janah enggo runtuhken kalak e rumah kami.”+
20 O diberu-diberu, begikenlah kai si kataken Jahwe.
Alokenlah kai si katakenNa.
Ajarkenlah lagu perngandungen man anak-anak kena si diberu,Ajarkenlah lagu ceda ate* enda man teman kena.+
21 Sebap kematen enggo reh arah jendela-jendelata,Masuk ia ku menara-menarata si erbenteng,Guna muat anak-anak i tengah dalan,Bage pe muat anak-anak perana arah lapangen kota.’+
22 Kataken, ‘Bagenda nina Jahwe,
“Amparen pagi mayat manusia bagi pupuk i juma,Bagi batang gandum* si mbaru ipotong,La lit si mpepulungsa.”’”+
23 Bagenda nina Jahwe,
“Kalak si pentar, ula min banggakenna kepentarenna.+
Kalak si megegeh, ula min banggakenna gegehna.
Kalak si bayak, ula min banggakenna kebayakenna.”+
24 “Kalak si lit atena banggakenna,Banggalah ia perban pengangkan ras pemetehna kerna Aku,+Maka Aku kap Jahwe, Dibata si ncidahken kekelengen si setia, keadilen, ras kebenaren i doni.+
Sebap e me si erban meriah ukurKu,”+ nina Jahwe.
25 Nina Jahwe, “Reh pagi paksana, Kuhukum kerina kalak si isunat tapi situhuna lenga isunat,+
26 eme kalak Mesir,+ kalak Juda,+ kalak Edom,+ kalak Ammon,+ kalak Moap,+ bage pe kerina kalak si ncukur buk perdempakenna seh asa keri, ras kalak si tading i taneh mesawang.*+ Sebap kerina bangsa la isunat janah kerina kalak Israel la isunat pusuhna.”+
Cataten i teruh
^ Taneh si mbelang si jarang iingani.
^ Ntah “Kumurniken,” bagi ngelebur emas guna murnikenca.
^ Ntah “lagu perngandungen.”
^ Taneh si mbelang si jarang iingani.
^ Taneh si mbelang si jarang iingani.
^ Ntah “petunjuk.”
^ Ntah “lagu perngandungen.”
^ Ntah “lagu perngandungen.”
^ Taneh si mbelang si jarang iingani.
