Jesaya 14:1-32
14 Sebap mekuah pagi ate Jahwe man Jakup,+ janah pilihNa pagi mulihi Israel.+ BanNa pagi kalak e tading bas negrina.+ Reh pagi penduduk asing ndahi keturunen Jakup janah ras pagi kalak e tading.+
2 Buat bangsa-bangsa pagi kalak Israel janah babana ku ingan kalak e sendiri. Ban kalak Israel pagi bangsa-bangsa e jadi budakna si dilaki ras si diberu+ bas negri Jahwe. Taban kalak Israel pagi kalak si pernah erban kalak e jadi tabanen. Kuasai kalak e pagi kalak si pernah maksa kalak e kerja paksa.*
3 Sanga bebasken Jahwe kam arah si mesuindu, arah si erban kam kuatir, bage pe arah perbudaken si mberat si terpaksa lakokenndu,+
4 katakenndu pagi kuan-kuanen* enda man raja Babilon,
“Mandor e enggo ndabuh!
Enggo ngadi penindasen!+
5 Enggo penggelken Jahwe tongkat kalak jahat,Ras tongkat penguasa-penguasa.+
6 Enggo hancurken Dibata kalak si kejam si la erngadi-ngadi nyerang bangsa-bangsa,+Eme kalak si naluken bangsa-bangsa ras terus nyiksa kalak e.+
7 Sebelang doni jadi tenang, lanai lit si ngganggu.
Ersurak pagi kalak alu ermeriah ukur.+
8 Batang kayu juniper pe ermeriah ukur,Radu ras batang kayu aras i Libanon.
Nina kalak e, ‘Mulai kam ndabuh,Lanai reh kalak si nabah kayu guna nabah kami.’
9 Kuburen* si lit i teruh taneh pe gemparGuna ngalo-ngalo kam.
Perban kam, kerina peminpin si kejam*Si enggo mate, nggeluh mulihi.
Enda erban kerina raja tedis arah tahtana nari.
10 Kerina kalak e ngataken man bandu,‘Enggo bali kam lemahna bagi kami?
Enggo bali kam bagi kami?
11 Kesombongenndu enggo nusur ku Kuburen,*Bage pe sora alat musikndu si ersenar.+
Bernga enggo merap i teruhndu jadi ingan medemndu,Janah cacing jadi selimutndu.’
12 Enggo ndabuh kam arah langit nari,O kam bintang si ersinar arah matawari erpagi-pagi!
Enggo iruntuhken kam ku doni,Kam kap si naluken bangsa-bangsa!+
13 Nindu bas ukurndu, ‘Nangkih pagi aku ku langit.+
Kuangkat tahtaku ngelewati bintang-bintang Dibata,+Janah kundul pagi aku i gunung perjumpan,Bas ingan si ndauhna i utara.+
14 Nangkih pagi aku ngelewati puncak embun-embun.
Kuban pagi aku bagi Tuhan Si Meganjangna.’
15 Tapi, ibaba pagi kam ku Kuburen,*Ingan si mbagesna kel bas kuburen.
16 Kalak si ngidah kam, natap kam pagi.
Pernehenna kel kam pagi, janah nina,‘Tuhu kin kalak enda si ngugur doni,Si erban kerajan-kerajan nggirgir,+
17 Si erban penduduk doni bagi taneh mesawang,*Si hancurkenna kota-kotana,+Ras la pediatna tabanenna mulih?’+
18 Kerina kalak e ikuburken pagi alu cara si mehamat,Payo, kerina raja bas bangsa-bangsa,Ikuburken pagi sekalak-sekalak bas kuburenna.
19 Tapi kam, iambekken pagi janah la ikuburken,Bagi tunas* si erban ciga ate,Itutupi pagi kam alu mayat-mayat si ibunuh alu pedang,Si ndabuh ku batu-batu bas sada lubang,Bagi bangke si iperjaki.
20 Labo kam pagi ersada ras kalak e bas kuburen,Perban hancurkenndu negrindu,Bunuhndu rakyatndu.
Gelar keturunen kalak jahat lanai pagi ibelasken.
21 Ersikaplah munuh anak-anakna si dilakiPerban kesalahen nini bulang kalak e,Gelah kalak e la reh gegehna janah nguasai doni,Ras ndemi doni alu kota-kotana.”
22 Nina Jahwe penguasa malekat, “Kuserang pagi kalak e.”+
Nina Jahwe ka, “Kumasapken pagi gelar Babilon, rakyatna si nggeluh denga, anak-anakna, kempu-kempuna, bage pe anak kempu-kempuna.”+
23 Nina Jahwe penguasa malekat, “Kuban pagi Babilon jadi jang landak, janah Kuban pagi Babilon jadi paya-paya.* Kukernepken pagi ia seh ngasa keri.”+
24 Ersumpah Jahwe penguasa malekat, nina,
“Kai si Kurencanaken, terjadi pagi,Kai si enggo Kutetapken, terjadi pagi.
25 Kuhancurken pagi kalak Assur bas negriKu,Kuperjaki pagi ia i gunung-gunungKu.+
Kuagui pagi pasangen* si tamana bas umatKu,Bage pe baban si tamana i bara umatKu.”+
26 Si enda me si enggo itetapken man belang-belang doni,Enda kap tan si idudurken man* kerina bangsa.
27 Jahwe penguasa malekat enggo erban keputusen,Ise si banci ngalangisa?+
TanNa enggo idudurken,Ise si banci nariksa?+
28 Bas tahun sanga mate Raja Ahas,+ iumumken berita enda:
29 “O kena kerina kalak Pilistia, ula kena ermeriah ukurPerban tongkat si nyerang kena enggo ipenggelken.
Sebap arah keturunen nipe+ e reh pagi nipe si erbisa,+Janah arah keturunenna reh pagi nipe kabang si erbisa.
30 Sanga anak sintua arah kalak mesera man alu puas,Sanga kalak si mesera medem alu aman,Kuban pagi bangsandu mate perban kelihen,Janah kalak si nggeluh denga ibunuh.+
31 O gerbang, tangiskenlah! O kota, serkokenlah!
O kalak Pilistia, mbiarlah kena kerina!
Sebap reh tentera arah utara nari bali bagi asap,Janah bas pasuken musuh la lit si terpisah arah barisen.”
32 Jawapen kai si bereken kalak e man utusen bangsa e?
Jawap kalak e pagi maka enggo pasang Jahwe pondasi Sion,+Kalak si lemah arah umatNa, erlindung pagi i je.
Cataten i teruh
^ Ntah “si pernah jadi mandor kalak e.”
^ Ntah “kata-kata si nokoh.”
^ As. “kerina kambing jantan.”
^ Taneh si mbelang si jarang iingani.
^ Ntah “cabang.”
^ Ntah “rawa-rawa.”
^ Pasangen eme alat si biasa itama ku kuduk manusia ntah pe binatang guna maba baban.
^ Ntah “si ersikap guna nyerang.”
