Jesaya 21:1-17
21 Berita penghukumen man taneh mesawang* si lit i tepi laut:*+
Lit bencana si reh bagi angin badai si rembus arah selatan nari,Arah taneh mesawang, arah negri si erban mbiar.+
2 Enda pengenehenen* si erban mbiar si enggo ikataken man bangku:
Bangsa penghianat enggo erhianat,Bangsa penghancur enggo erban hancur.
O Elam, majulah! O Media, kepunglah!+
Kupengadi pagi kesusahen si ibanna.+
3 Susah kel kuakap perban pengenehenen e.+
Mesui kel kuakap,Bagi diberu si sangana melahirken.
Mbiar kel aku megisa.
Kuatir kel aku ngenenca.
4 Pusuhku la tenang. Nggirgir aku perban biarna.
Karaben si kuarapken gundari erban aku mbiar.
5 Aturken meja, sikapken ingan-ingan kundul!
Manlah ras minemlah!+
O kena peminpin-peminpin, kekekenlah, minakilah perisai!*
6 Sebap bagenda nina Jahwe man bangku,
“Laweslah, tugasken penjaga janah suruh laporkenna kai si idahna.”
7 Idahna sada gereta perang si itarik sepasang kuda,Sada gereta perang si itarik kelede-kelede,Sada gereta perang si itarik unta-unta.
Perdiatekenna kel alu megermet.
8 Kenca si e ngerana ia bagi singa si erngaung, nina,
“O Jahwe, tetap aku tedis sanga ciger wari i menara penjaga,Janah tetap aku tedis tiap berngi bas inganku erjaga.+
9 Nenlah, lit si reh:
Kalak i datas gereta perang si itarik sepasang kuda!”+
Kenca si e nina,
“Enggo ndabuh ia! Enggo ndabuh Babilon!+
Kerina patung ukiren berhalana enggo hancur ku taneh!”+
10 O bangsaku, bangsa si enggo iperjak-perjaki,Hasil arah ingan ngerikku,*+Enggo kukataken man kena kai si enggo kubegi arah Jahwe penguasa malekat eme Dibata Israel.
11 Berita penghukumen man Duma:*
Lit si ngelebuh aku arah Seir nari,+
“O penjaga, ndekah denga nge maka erpagi-pagi?
O penjaga, ndekah denga nge maka erpagi-pagi?”
12 Nina penjaga e,
“Pasti nge reh erpagi-pagi, berngi pe bage nge.
Adi nungkun ate kena, sungkun saja.
Reh ka kari kena!”
13 Berita penghukumen man gurun pasir:
O rombongen Dedan,+Erberngi pagi kena bas kerangen i gurun pasir.
14 O kena penduduk negri Tema,+Babalah lau guna ngalo-ngalo kalak si muas,Bage pe roti guna kalak si melariken diri.
15 Sebap melariken diri kalak e arah pedang, arah pedang si idudurken,Arah panah si nandangi ipanahken, ras arah perang si kejam.
16 Sebap bagenda nina Jahwe man bangku, “Bas sada tahun pagi, bagi tahun-tahun kalak upahen,* bene pagi kerina kemulian Kedar.+
17 Sitik nari ngenca pagi tading kalak si beluh manah arah Kedar, sebap bage nina Jahwe Dibata Israel.”
Cataten i teruh
^ Taneh si mbelang si jarang iingani.
^ Mungkin maksudna daerah Babilon si mbarenda.
^ Eme kerna kai pe si cidahken Dibata ku bas pikiren sekalak jelma.
^ Ntah “ampang-ampang.”
^ Ertina “Melungen.”
^ Maksudna, pas sada tahun.
