Jesaya 33:1-24
33 Cilaka me kam,* kam si erban hancur tapi lenga ihancurken,+Kam si erhianat tapi lenga ihianati!
Kenca dung kam erban hancur, ihancurken pagi kam.+
Kenca dung kam erhianat, ihianati pagi kam.
2 O Jahwe, mekuah min ateNdu kami.+
Kam kap si arapken kami.
Kam min si jadi gegeh kami+ tiap erpagi-pagi,Kam min si nelamatken kami sanga susah.+
3 Kiam bangsa-bangsa sanga begina soraNdu.
Merap bangsa-bangsa sanga ertindak Kam.+
4 Bagi labang si rangap si ngkeriken kai pe si ilewatina, bage me pagi hasil jarahen kena ikeriken kalak,Serbuna pagi hasil rampasen e bagi labang si nyerbu.
5 Imuliaken pagi Jahwe,Sebab Ia tading bas ingan si meganjang.
BanNa pagi dem keadilen ras kebenaren i Sion.
6 Ia kap si mereken keamanen,Keselamaten si luar biasa,+ kepentaren, pemeteh, ras perasan mbiar man Jahwe,+E me ertana.
7 Nenlah! Dilaki-dilaki si perpang nderkuh i dalan,Janah ngandung kel pagi utusen-utusen perdamen.
8 Pasar-pasar si galang jadi kosong,La lit si lewat arah pasar e.
Enggo langgarna* perjanjin,Enggo hinana kota-kota,Lanai diatena ise pe.+
9 Erceda ate* negri e janah jadi gersang.
Mela akap Libanon,+ enggo macik ia.
Saron enggo jadi taneh mesawang,*Janah Basan ras Karmel enggo nggugurken bulung-bulungna.+
10 Nina Jahwe, “Gundari ertindak Aku,Kupeganjang pagi bangKu,+Janah Kumuliaken pagi bangKu.
11 Bas beltek kena lit dukut si kerah janah lahirken kena nggala.*
Sipat kena e ngkeriken kena bali bagi api.+
12 Bali pagi kalak bagi sisa penutungen kapur.
Bagi peren duri si ipotong, itutung pagi kalak e alu api.+
13 O kena si ndauh, begikenlah kai si nandangi Kulakoken!
O kena si ndeher, akuilah kuasaKu!
14 Nggirgir kalak perdosa i Sion,+Mbiar kel kalak murtad,
‘Ise si banci tading bas ingan api si gurlah?+
Ise si banci tading i deher api si lalap gara?’
15 Kalak si lalap ngelakoken kai si benar,+Kalak si ngataken kai si tuhu,+Kalak jujur, si la nggit nipu guna ndatken untung,Kalak si la nggit ngaloken sogok,+Kalak si tutupna cupingna gelah la begina rencana pembunuhen,Ras kalak si tutupna matana gelah la idahna kai si la mehuli,
16 Kalak si bage me si tading bas ingan si meganjang.
Ingan erlindungna* si aman lit pagi i tebing batu,Isikapken pagi rotina,Janah persedian launa la pernah keri.”+
17 Tatapndu pagi sekalak raja si mulia,Idah kalak e pagi negri si lit bas ingan si ndauh.
18 Sanga inget kena pagi kejadin si ngeri e, nungkun kena,
“I ja sekertaris e?
I ja kalak si nimbang upeti* e?+
I ja kalak si ngkira menara-menara e?”
19 Lanai pagi idah kena bangsa si sombong e,Bangsa si bahasana meserasa ngangkaisa,Si bahasana aneh ras la banci iangkai.+
20 Nenlah kota Sion, ingan perayan-perayanta iban!+
Idahndu pagi Jerusalem jadi ingan tading si aman,Kemah lanai pagi ipindahken.+
Pantuk-pantukna lanai pagi icabut,Janah nali-nalina lanai pernah iretapken.
21 I je, Jahwe Dibata Si MuliaNgelindungi kita bagi lau maler ntah pe lau maler si mbelang si ngelindungi sada ingan,Si la banci imasuki kapal-kapal perangBage pe ilewati kapal si galang.
22 Sebap Jahwe kap Hakimta,+Jahwe kap Si Mereken Undang-Undang man banta,+Jahwe kap Rajata,+Ia kap pagi si nelamatken kita.+
23 Gantung pagi nali-nali,Tiang kapal lanai banci tegak janah layarna pe la banci ikimbangken.
Paksa si e, ibagi-bagi pagi hasil jarahen si melala,Kalak pincang pe ndatken melala hasil jarahen.+
24 Si tading bas* negri e lanai pagi lit si ngataken, “Sakit aku.”+
Janah kerina kalak si tading i je, iampuni pagi dosana.+
Cataten i teruh
^ Maksudna, Assur.
^ Maksudna, musuh.
^ Taneh si mbelang si jarang iingani.
^ Ntah banci saja “Kerah.”
^ Ntah “jerami.”
^ Ntah “Ingan si meganjang.”
^ Ntah “Penduduk.”
