Jesaya 37:1-38
37 Kenca begi Raja Hiskia kerna si e, mis rigatkenna uisna janah pakena kain guni, jenari masuk ia ku rumah Jahwe.+
2 Suruhna Eliakim eme si ngawasi istana, bage pe Sepna sekertaris kerajan, ras peminpin-peminpin imam gelah make kain guni janah lawes ndahi Nabi Jesaya+ anak Amos.
3 Nina kalak e man bana, “Bagenda nina Hiskia, ‘Wari enda eme wari ceda ate, kita ihina janah ipermelaken. Kita bagi diberu si nandangi melahirken tapi la ngasup ngelahirkenca.+
4 Emaka ertotolah kam+ guna kami si tading denga bas negri enda.+ Mbera-mbera begiken Jahwe Dibatandu kerna kerina si kataken peminpin pengurus inemen* si suruh tuanna eme raja Assur guna nokohi Dibata si nggeluh.+ Mbera-mbera ia ibalas perban kata-katana e, si enggo begi Jahwe Dibatandu.’”
5 Lawes pelayan-pelayan Raja Hiskia ndahi Jesaya,+
6 janah nina Jesaya man kalak e, “Bagenda ningen man tuan kena, ‘Nina Jahwe, “Ula mbiar+ perban cakap si belasken pelayan-pelayan raja Assur+ amin pe enggo hina kalak e Aku.
7 Kupengaruhi pagi pikirenna, gelah sanga begina pagi sada laporen, mulih ia ku negrina.+ Kuban pagi ia ibunuh alu pedang bas negrina.”’”+
8 Kenca begi peminpin pengurus inemen e maka raja Assur enggo mulih arah Lakis nari, mulih ia njumpai raja e janah dapetina raja sangana erperang ngelawan Lipna.+
9 Dat raja laporen kerna Tirhaka raja Etiopia, “Reh ia guna ngelawan kam.” Megi si e, suruh raja ka kalak ndahi Hiskia,+ nina,
10 “Kataken man Hiskia raja Juda, ‘Ula kam nggit itipu Dibata si andalkenndu e, si ngataken maka labo pagi Jerusalem ndabuh ku bas tan raja Assur.+
11 Enggo begindu kerna uga raja-raja Assur engkernepken kerina negri.+ Akapndu kin banci kam iselamatken?
12 Uga kerna bangsa-bangsa si ikernepken nini bulangku? Selamatken dibatana kin kalak e?+ I ja dage kalak Gosan, Haran,+ Resep, ras kalak Eden si lit i Telassar?
13 I ja dage raja Hamat, raja Arpad, bage pe raja arah kota Separwaim,+ kota Hena, ras kota Iwa?’”
14 Buat Hiskia surat-surat e arah tan kalak si isuruh ndai, jenari bacana. Lawes ia ku rumah Jahwe janah bukana surat-surat e i lebe-lebe Jahwe.+
15 Ertoto Hiskia man Jahwe,+ nina,
16 “O Jahwe penguasa malekat,+ Dibata Israel, si kundul bas tahta i datas* kerubim-kerubim, Kam kap ngenca Dibata si benar bas kerina kerajan i doni. Kam kap si erban langit ras doni.
17 O Jahwe, perdiateken min janah begiken min.+ O Jahwe, bukalah mataNdu janah nenlah.+ Begikenlah kerina pesan si ikirim Sanherip guna nokohi Dibata si nggeluh.+
18 O Jahwe, teh kami maka enggo hancurken raja-raja Assur kerina bangsa+ bage pe negrina.
19 Tutung kalak e dibata-dibata kerina bangsa e,+ perban e kerina labo Dibata situhu-tuhu, tapi tan manusia si erbanca+ arah kayu ras batu. E me sebapna maka kerina e banci hancurken kalak e.
20 O Jahwe Dibata kami, gundari selamatkenNdu min kami arah tan raja Assur, gelah kerina kerajan bas doni enda meteh maka Kam ngenca Dibata, o Jahwe.”+
21 Kenca si e, Jesaya anak Amos ngirim pesan man Hiskia, nina, “Bagenda nina Jahwe Dibata Israel, ‘Perban enggo ertoto kam man bangKu kerna Sanherip raja Assur,+
22 bagenda nina Jahwe kerna raja e,
“Ihina janah itokohi singuda-nguda Sion pagi kam.
Geleng-geleng kepala pagi anak Jerusalem si diberu perban kam.
23 Ise kin si ihina+ ras si itokoh-tokohindu e?
Man ise kin ipegangndu sorandu e?+
Man ise kin pengenen matandu si sombong e?
E me man Dibata Israel Si Badia!+
24 Arah pelayanndu, hinandu Jahwe+ janah nindu,‘Alu gereta perangku si melalaNangkih pagi aku ku datas pegunungen si meganjang,+Ku bagin si ndauhna kel i Libanon.
Kutabah pagi batang-batang kayu aras si meganjang, bage pe batang-batang kayu juniper si mejilena.
Masuk pagi aku ku ingan istrahat si ndauhna kel, ku kerangen si mejile pe masuk pagi aku.
25 Kukurak pagi sumur-sumur janah minem pagi aku,Kupekerah pagi lau maler* si lit i Mesir alu tapak-tapak naheku.’
26 Lenga kin pernah begindu? Mbarenda nari enggo Kutetapken kerna si e.
Mbarenda nari enggo Kuaturken* kerna si e.+
Gundari waktuna Kulakoken.+
Hancurkenndu pagi kota-kota si erbenteng seh ngasa lanai teringani.+
27 Lanai pagi lit gegeh pendudukna,Mbiar janah mela akap kalak e.
Dungna kalak e bagi sinuan-sinuan ras dukut-dukut si meratah,Bagi dukut si lit i datas atap-atap, si kerah perban embus angin timur si melas.
28 Tapi Kuteh kel kerina si ilakokenndu: Sanga kam kundul, sanga kam lawes, sanga kam mulih,+Bage pe sanga merawa kam man bangKu,+
29 Perban rawandu man bangKu+ bage pe sorandu ngamuk enggo seh ku cupingKu.+
Emaka Kupasang pengkawit ku igungndu ras Kusangam*+ babahndu,Jenari Kubaba kam mulih arah dalan si ilewatindu sanga reh.”
30 “‘Enda tandana man bandu:* Bas tahun enda man pagi kena arah sinuan-sinuan si turah bage-bage saja.* Jenari, arah sinuan-sinuan si turah bage-bage saja e ndai, turah ka me sinuan-sinuan janah hasil sinuan-sinuan e me si ipan kena bas tahun si peduaken. Tapi bas tahun si peteluken, ngambur benih pagi kena ras iperani kena. Suan kena ka pagi batang anggur janah pan kena buahna.+
31 Kalak Juda si nggeluh denga,+ rurat janah erbuah pagi bagi sinuan-sinuan.
32 Kalak si nggeluh denga ndarat pagi arah Jerusalem, janah kalak si selamat ndarat pagi arah Gunung Sion.+ Jahwe penguasa malekat pagi si ngelakokenca alu semangat.+
33 “‘Bagenda nina Jahwe kerna raja Assur:+
“Labo pagi ia masuk ku bas kota enda,+Labo pagi panahkenna sada pe anak panahna ku jenda,Labo pagi ia reh alu perisai,*Janah labo pagi pegun-gunna taneh guna nyerang kota e.”’+
34 ‘Mulih pagi ia arah dalan si lewatina sanga ia reh,Labo pagi ia masuk ku bas kota enda,’ nina Jahwe.
35 ‘Kupertahanken janah Kuselamatken pagi kota enda+ guna kepentingenKu,+Bage pe guna kepentingen Daud, pelayanKu.’”+
36 Jenari ibunuh malekat Jahwe 185.000 kalak si lit i perkemahen Assur. Lit kalak si selamat janah sanga medak ia erpagi-pagi, idahna kerina mayat e.+
37 Emaka mulih Sanherip raja Assur ku Niniwe+ janah tading ia i je.+
38 Sanga sujud ia bas ingan ersembah man dibatana eme Nisroh, bunuh anak-anakna ia alu pedang.+ Si munuhsa eme Adramelek ras Sareser. Jenari kiam kalak e ku daerah Ararat.+ Anakna si nggantiken ia jadi raja eme Esarhaddon.+
Cataten i teruh
^ Ntah “Rabsake.”
^ Ntah banci saja “i antara.”
^ Ntah “Lau Nil.”
^ Ntah “Kurencanaken.”
^ Ntah “Kukekang.”
^ Ntah “si turah arah biji-bijin si ndabuh.”
^ Maksudna, man Hiskia.
^ Ntah “ampang-ampang.”