Jesaya 43:1-28
43 O keturunen Jakup, o Israel,Bagenda nina Jahwe, Dibata Si Nciptaken kam ras si erban kam,+
“Ula mbiar, sebap enggo Kutebus kam.+
Enggo Kulebuh kam alu gelarndu.
JangKu kap kam.
2 Sanga sebrangindu laut, Aku si nemani kam,+Sanga sebrangindu lau maler, la kam mombak.+
Sanga lewatindu api, la kam meseng,Janah apina la nutung kam.
3 Aku Jahwe Dibatandu,Dibata Israel Si Badia, Si Nelamatken kam.
Kubereken Mesir, Etopia, ras SebaJadi gantindu.
4 Sebap merga Kuakap kam,+Kuhamati kam janah keleng ateKu kam.+
Emaka Kubereken kalak si deban nggantiken kam,Janah bangsa-bangsa nggantiken kesahndu.
5 Ula mbiar, sebap Aku kap ras kam.+
Kubaba pagi keturunenndu arah timur nari,Kupepulung pagi kena arah barat nari.+
6 Kukataken pagi man utara, ‘Serahken kalak e!’+
Janah Kukataken man selatan, ‘Ula tahan kalak e.
Baba anak-anakKu si dilaki arah ingan si ndauh, bage pe anak-anakKu si diberu arah ujung-ujung doni nari,+
7 Kerina si Kulebuh alu gelarKu,+Si Kuciptaken guna kemulianKu,Si Kubentuk ras si Kuban.’+
8 Baba ndarat bangsa e, bangsa si pentang amin gia lit matana,Si pasek amin gia lit cupingna.+
9 Suruhlah kerina bangsa pulung bas sada ingan,Pediatlah pulung suku-suku bangsa.+
Ise arah kalak e si banci ngataken kerna si e?
Banci kin ban kalak e kita megi si tangtangna terjadi?+
Pediatlah baba kalak e saksi-saksi guna mbuktiken ia benar,Pediatlah begi kalak si deban janah nina, ‘Enda tuhu!’”+
10 Nina Jahwe, “Kena kap saksi-saksiKu+PelayanKu si Kupilih,+Gelah banci tandai kena Aku ras tek kena man bangKu,Alu bage angka kena maka Aku la pernah berubah.+
Sope lenga Aku, la lit Dibata,Kenca Aku pe, tetap la lit si deban.+
11 Aku, Aku kap Jahwe,+ Aku ngenca si nelamatken kena.”+
12 Nina Jahwe, “Aku kap si ngumumken, si nelamatken, ras si mpebetehken,Sanga la lit dibata si deban i tengah-tengah kena.+
Emaka kena kap saksi-saksiKu, janah Aku kap Dibata.+
13 Aku tetap seri.+
Ise pe la banci ngerebut kai pe arah tanKu.+
Sanga ertindak Aku, ise si banci ngambatisa?”+
14 Bagenda nina Jahwe, Si Nebus kena,+ Dibata Israel Si Badia,+
“Guna kepentingen kena, Kukirim pagi kalak e ku Babilon, Kuhancurken pagi palang-palang gerbang kalak e,+Nderkuh pagi kalak Kaldea bas kapal-kapalna perban sedihna.+
15 Aku kap Jahwe, Dibata Si Badia,+ Si Nciptaken Israel,+ ras Raja kena.”+
16 Bagenda nina Jahwe,Dibata si erban dalan arah tengah laut,Si erban dalan ngelewati lau si ergelombang,+
17 Si minpin gereta perang ras kuda,+Pasuken ras prajurit si megegeh,
“Ampar pagi kalak e janah lanai keke mulihi.+
Mate pagi kalak e bali bagi sumbu lampu si imateken.”
18 “Ula nai inget si mbarenda.
Ula lalap ukuri si enggo lewat.
19 Kuban kai si mbaru,+Gundari pe enggo mulai teridah.
La kin idah kena?
Kuban pagi dalan bas taneh mesawang,*+Kuban pagi lau maler bas gurun pasir.+
20 Binatang liar bas taneh mesawang,* imuliakenna pagi Aku,Biang kerangen ras burung unta pe bage.
Sebap Kusikapken pagi lau bas taneh mesawang,Kuban pagi maler lau bas gurun pasir,+Guna jadi inemen man umat si Kupilih,+
21 Umat si Kuban guna Aku,Gelah bereken kalak e pujin man bangKu.+
22 Tapi la kam erlebuh man bangKu, o Jakup,+Sebap enggo latihsa akapndu ras Aku, o Israel.+
23 La babandu biri-biri jadi persembahen tutungen man bangKu,Ras la muliakenndu Aku alu korban persembahenndu.
La pernah Kupaksa kam maba pemere,La pernah Kususahi kam alu nuntut kam maba kemenyan mbentar.+
24 Labo tukurndu alu senndu jerangau* si ntebu man bangKu,Labo pesenangndu Aku alu lemak korban persembahenndu.+
Tapi susahindu Aku alu dosa-dosandu,Banndu Aku latih perban kesalahenndu.+
25 Aku, Aku kap si nasapken pelanggaren-pelanggarenndu*+ guna gelarKu,+Janah lanai pagi Kuinget dosa-dosandu.+
26 Mari jumpa kita bas pengadilen, ingetken Aku,Turiken katandu, buktiken kam benar.
27 Nini bulangndu si pertama mbarenda enggo erdosa,Janah mberontak juru bicarandu* man bangKu.+
28 Kuban pagi jadi najis peminpin ingan si badia.
Kuserahken pagi Jakup guna ikernepken,Bage pe Israel gelah ihina.+
Cataten i teruh
^ Taneh si mbelang si jarang iingani.
^ Taneh si mbelang si jarang iingani.
^ Sinuan-sinuan si merim.
^ Ntah “pemberontaken-pemberontakenndu.”
^ Mungkin maksudna guru Undang-Undang.