Jesaya 46:1-13
46 Dewa Bel ras Dewa Nebo enggo mungkuk.+
Patung-patung kalak e ibaba binatang, i datas binatang si maba baban,+Bali bagi baban si erban latih akap binatang.
2 Ras-ras dewa e sujud,La ngasup kalak e nelamatken baban* e,Janah kalak e pe itaban.
3 “Begikenlah, o keturunen Jakup bage pe kerina kalak Israel si selamat.+
Enggo Kudukung kena mulai kena lahir janah Kujaga kena sanga bas rahim denga.+
4 Seh ngasa kena metua, Aku labo pagi berubah.+
Seh ngasa bukndu mbentar, lalap pagi kam Kudukung.
Kubaba, Kudukung, ras Kusampati pagi kam bagi si enggo Kulakoken.+
5 Ras ise Aku peseri kena?
Ras ise Aku bandingken kena+ guna mbuktiken maka kami seri?+
6 Lit kalak si mpedarat melala emas arah tasna,Timbangna pirak.
Sewana tukang besi janah iban tukang besi e kerina si ndai jadi dibata.+
Jenari sujud kalak e nembahsa.+
7 Tamaken kalak e berhala e ku barana,+Babana janah tamakenna bas inganna, jenari berhala e tetap i je.
La ia miser arah ingan e nari.+
Serko pe kalak e, labo aloina.
La banci selamatkenna ise pe arah kesusahen nari.+
8 Ingetlah enda, janah arus kena pang.
O kena pemberontak, ukurilah enda.
9 Ingetlah kai si terjadi mbarenda,Aku kap Dibata, janah la lit si deban.
Aku kap Dibata, janah la lit si bagi Aku.+
10 Tangtangna nari enggo Kukataken hasilna,Mbarenda nari enggo Kukataken kai si lenga terjadi.+
NingKu, ‘RencanaKu pasti terjadi,+Kai pe sura-suraKu pasti Kulakoken.’+
11 Kulebuh perik si man daging arah timur nari,+Sekalak arah negri si ndauh guna ngelakoken rencanaKu.+
Enggo Kukataken, janah Kulakoken pagi.
Enggo Kurencanaken, janah Kuban pagi terjadi.+
12 Begikenlah Aku, o kena si mekeng,O kena si ndauh arah kai si benar.
13 Enggo ndeher waktuna Kudalanken me keadilenKu,Lanai ndekah,Keselamaten arah Aku nari labo terlambat.+
Kuselamatken pagi Sion janah Kubereken kemulianKu man Israel.”+
Cataten i teruh
^ Eme patung-patung si ibaba binatang.
