Jesaya 51:1-23
51 “Begikenlah Aku, o kena si erusaha gelah ianggap benar,Kena si ndarami Aku, Jahwe.
Nenlah gunung batu si i je nari kena ipotongRas lubang si i je nari kena ibaba ndarat.
2 Nenlah Abraham bapak kenaRas Sara+ si ngelahirken kena.*
Sanga Kulebuh Abraham, sekalak ngenca ia,+Jenari Kupasu-pasu ia janah Kuban melala keturunenna.+
3 Aku, Jahwe si ngapuli Sion pagi.+
Kerina inganna si hancur, Kuban pagi bagi si sebelumna,+Tanehna si mesawang,* Kuban pagi bagi Eden,+Ras gurun pasir bagi taman Jahwe.+
Kesenangen ras surak meriah ukur lit pagi i je,Bage pe pengatan bujur ras lagu si entabeh megisa.+
4 O umatKu, perdiatekenlah kata-kataKu.
O bangsaKu, tutuslah atendu megiken Aku.+
Sebap Kupeseh ateKu undang-undang,+Janah Kutetapken pagi keadilenKu jadi terang man bangsa-bangsa.+
5 KeadilenKu enggo ndeher.+
KeselamatenKu nandangi reh.+
Alu kuasaKu, Kuhakimi pagi bangsa-bangsa.+
Pulau-pulau ngarap man bangKu,+Timaina pagi kuasaKu.
6 Tataplah ku langit,Nenlah ku doni.
Lesap pagi langit bagi asap,Janah doni bali pagi bagi uis si male,Mate pagi pendudukna bagi rengit.
Tapi keselamaten arah Aku nari lit pagi seh rasa lalap,+Janah keadilen arah Aku nari la pernah gagal.+
7 Begikenlah Aku, o kena si meteh kai si benar,Si tamakenna undang-undangKu* ku bas pusuhna.+
Ula mbiar itokohi manusia.
Ula mbiar ihina kalak e.
8 Sebap kalak e bali pagi bagi baju si ipan serangga,*Bagi uis wol si ipan serangga.*+
Tapi keadilenKu tetap pagi lit rasa lalap,Janah keselamaten arah Aku nari lit pagi arah jaman ku jaman.”+
9 Mbera-mbera tan Jahwe ertindak!
Mbera-mbera tanNa ertindak janah cidahkenNa gegehNa!+
Mbera-mbera perbahanenNa bali bagi si mbarenda.
La kin Kam si ngancurken Rahap,*+La kin Kam si nebak raksasa si lit bas laut?+
10 La kin Kam si erban laut si mbages ras mbelang jadi kerah?+
La kin Kam si erban laut si mbages jadi dalan man kalak si itebus?+
11 Mulih pagi kalak si itebus Jahwe.+
Mulih pagi kalak e ku Sion alu surak meriah ukur,+Keriahen ukur pagi jadi mahkota kalak e rasa lalap.+
Keriahen ras kesenangen jadi jang kalak e pagi.
Ceda ate ras kesusahen bene pagi.+
12 “Aku si ngapuli kam.+
Engkai maka arus kam mbiar man manusia si dungna mate?+
Man manusia si bali bagi dukut meratah si dungna kerah?
13 Engkai maka lupa kam man Jahwe, Si Erban kam,+Dibata si ngkimbangken langit+ ras si erban pondasi doni?
Gedang-gedang wari mbiar kam perban rawa kalak si nindas kam,Tempa-tempa enggo nandangi kernepkenna kam.
Gundari, ja dage rawa kalak si nindas kam e?
14 Kalak si irante mis pagi ilepasken,+Labo pagi ia masuk ku lubang kuburen,Janah labo pagi ia kekurangen pangan.
15 Tapi Aku kap Jahwe Dibatandu,Si erban laut ergelombang janah gelombangna ergeruhguh.+
GelarKu eme Jahwe, penguasa malekat.+
16 Kuban pagi kam ngataken kataKu,Kulindungi pagi kam alu tanKu,+Guna ngkimbangken langit ras erban pondasi doni,+Janah ngataken man Sion, ‘Kam kap umatKu.’+
17 O Jerusalem, kekeken! Kekekenlah!+
Kam si minem arah calung* rawa Jahwe si lit bas tanNa.
Minem pagi kam arah calung e,Inemndu pagi ngasa keri seh ngasa kam mbewat-mbewat.+
18 Arah kerina anak si ilahirkenna, la lit sada pe mabai ia,Janah arah kerina anak si ipebelinna, la lit sada pe si ncikep tanna.
19 Duana pagi si enda terjadi man bandu.
Ise pagi si rate mekuah man bandu?
Hancur pagi kam janah kernep perban pedang ras kelihen.+
Ise pagi si ngapuli kam?+
20 Pingsan pagi anak-anakndu si dilaki.+
Ampar pagi kalak e bas simpang,Bali bagi biri-biri kerangen bas jaring.
Gejapken kalak e pagi rawa Jahwe, rawa Dibatandu.”
21 Emaka begikenlah enda,O diberu si susah ras mabuk labo perban anggur.
22 Bagenda nina Tuhan Jahwe, Dibatandu si mbela umatNa,
“Kubuat pagi calung arah tanndu nari, calung si erban kam mbewat-mbewat,+Calung rawaKu,Lanai pagi kam pernah minem arah calung e nari.+
23 Kutamaken pagi calung e bas tan kalak si nindas kam,+Si ngataken man bandu, ‘Sujud kam, gelah erdalan kami arah datasndu!’
Emaka banndu gurungndu bagi taneh,Bagi dalan si man lewaten kalak e.”
Cataten i teruh
^ Ntah “si mesui kel kapna ngelahirken kena.”
^ Taneh si mbelang si jarang iingani.
^ Ntah “petunjukKu.”
^ Ntah “nget-nget.”
^ Ntah banci saja “cacing.”
^ Ntah “cangkir.”
