Jesaya 58:1-14
58 “Serkolah asa gegehndu, ula tahan-tahan!
Pegang sorandu bagi sora trompet tanduk.
Kataken man umatKu kerna pemberontakenna.+
Kataken man keturunen Jakup kerna dosa-dosana.
2 Wari ku wari darami kalak e Aku,Cidahken kalak e maka meriah akapna nandai dalanKu,Tempa-tempa kalak e bangsa si ngelakoken si benar,Janah patuhina perentah Dibatana.+
Pindo kalak e Aku ngakimi alu adil,Merhat kalak e ndeher ras Dibata.+
3 Nungkun kalak e, ‘Engkai maka la idahNdu sanga kami puasa?+
Engkai maka la perdiatekenNdu sanga kami erceda ate perban kesalahen kami?’+
Sebap sanga kena puasa, keuntungen kena* nge si darami kena,Janah tindas kena kalak si erdahin man kena.+
4 Puasa kena e idungi alu perubaten ras perjengilen.
Ertinju kena alu kejam.
Lanai kena banci puasa bagi si lakoken kena gundari, janah ula arapken sora kena terbegi i surga.
5 Sanga puasa kam, erceda ate kam perban kesalahenndu,Mungkuk kam bagi peren si meganjang,Banndu kain guni ras abu jadi ingan medemndu.
Bage kin puasa si Kusuruh lakokenndu?
Akapndu kin puasa si bage ras wari e erban meriah ukur Jahwe?
6 Lang. Bagenda kap puasa si Kupindo:
Eme guna ngambekken kerina kejahaten,Guna mulahi pengiket kayu pasangen,*+Guna mbebasken kalak si itindas,+Ras guna menggelken kerina kayu pasangen jadi dua.
7 Paksa si e me arusna bagikenndu panganndu man kalak si melihe,+Babandu kalak si mesera ras kalak si la lit rumahna ku rumahndu,Berekenndu baju man kalak si tilanjang,+Janah la itulakndu keluargandu si mindo penampatndu.
8 Adi bage banndu, ersinar pagi terangndu bagi matawari erpagi-pagi,+Janah ntisik nari malem me kam.
Kai si benar lit i lebe-lebendu,Janah kemulian Jahwe pagi si ngelindungi kam arah pudindu nari.+
9 Sanga erlebuh kam, Aku, Jahwe pagi si ngaloi kam.
Sanga mindo penampat kam, ningKu pagi, ‘Enda Aku!’
Adi ambekkenndu kayu pasangen* i tengah-tengahndu nari,Janah lanai kam nuduh-nuduh alu jarindu ras ngataken kai si ngelukai kalak,+
10 Adi berekenndu sura-surandu man kalak si melihe,+Janah ibanndu kalak si susah jadi puas,Ersinar pagi terangndu seh ku bas kegelapen,Janah kegelapenndu bali pagi ras terang sanga ciger wari.+
11 Jahwe pagi si lalap mabai kam,Janah banNa kam puas amin pe bas taneh si gersang.+
PegegehiNa pagi tulan-tulanndu,Janah bali pagi kam bagi kebun si isirami alu mehuli.+
Bagi mata lau si la pernah kerah.
12 Ibangun kalak pagi mulihi ingan si mbarenda nari hancur guna kepentingenndu,+Janah pehulindu pagi pondasi si enggo lit arah jaman ku jaman.+
Igelari pagi kam kalak si mpekena tembok si hancur,*+Kalak si mpekena dalan bas ingan si nandangi iingani.
13 Adi rayakenndu wari Sabat, eme wari si badia man Jahwe, janah la akapndu pentingen sura-surandu,+Adi anggapndu wari e, wari si penting si maba keriahen ukur si mbelin,+Adi la kam anggap remeh man wari e, janah la ayakindu kesenangenndu bage pe la cakapkenndu kai si la erguna,
14 Meriah kel pagi akapndu perban Jahwe.
Kuban pagi kam erkuasa bas ingan-ingan si meganjang i doni.+
Kuban pagi kam ngenanami hasil arah warisen Jakup nini bulangndu,+Sebap Aku, Jahwe si enggo ngatakenca.”
Cataten i teruh
^ Ntah “sura-sura kena.”
^ Pasangen eme alat si biasa itama ku kuduk manusia ntah pe binatang guna maba baban.
^ Pasangen eme alat si biasa itama ku kuduk manusia ntah pe binatang guna maba baban.
^ As. “retak; beka.”
