Jesaya 6:1-13
6 Bas tahun sanga Raja Ussia mate,+ kuidah Jahwe kundul bas tahta si meganjang,+ janah ujung jubahNa ndemi rumah pertoton.
2 Tedis serafim-serafim e i sekelilingna. Masing-masing serafim e lit enem kabengna. Dua kabengna nutupi ayona, dua nutupi nahena, janah dua nari guna kabang.
3 Nina man sada ras si debanna,
“Badia, badia, badia kap Jahwe penguasa malekat.+
Belang-belang doni dem alu kemulianNa.”
4 Sora e erban kusen pintu rumah e mugur-ugur janah dem asap bas rumah e.+
5 Kenca si e ningku, “Cilaka me aku!
Mate me aku!
Perban aku erdosa janah babahku najis,Selain si e, tading aku i tengah-tengah kalak si babahna najis,+Sebap enggo kuidah Raja eme Jahwe penguasa malekat!”
6 Emaka kabang sada serafim e ndahi aku, janah babana rara api+ si buatna alu penjepit arah ingan nutung* persembahen nari.+
7 Kuitna biberku alu rara api e janah nina,
“Rara api enda enggo kena ku biberndu.
Kesalahenndu enggo ihapus,Janah dosandu enggo iampuni.”
8 Jenari kubegi sora Jahwe, nina, “Ise pagi si Kusuruh, ise si nggit lawes guna kami?”+ Ningku ngaloi, “Aku, suruhlah aku!”+
9 Jenari nina, “Laweslah, kataken man bangsa enda,
‘Mulih-ulih begi kena,Tapi la angka kena,Mulih-ulih idah kena,Tapi la dat kena pemeteh.’+
10 Banlah pusuh bangsa e la erpenggejapen,+Banlah cupingna la erpemegi,+Tutuplah mata kalak e,Gelah kalak e la banci ngenen,Gelah la banci erpemegi,Janah pusuhna la erpengangka,Alu bage kalak e la pagi mulihken man bangKu janah ipepalem.”+
11 Megi si e ningku, “Ngasa ndigan bage, Jahwe?” Kenca si e nina,
“Seh ngasa hancur kota-kota janah lanai lit pendudukna,Bage pe rumah-rumah lanai lit si ngianisa,Taneh pe dungna gersang janah la iurus.+
12 Seh ngasa pelawes Jahwe pagi manusia ku ingan si ndauh,+Janah belangen negri e la lit si ngianisa.
13 “Tapi lit denga sepersepuluh arah kalak Israel si tading, kalak e bali bagi batang kayu si galang* ras batang kayu raksasa si sanga itabah lit denga tongkehna, janah itutung pagi e. Benih* si badia pagi si jadi tongkehna.”
