Jesaya 65:1-25
65 “Kupediat Aku idarami kalak si la nungkuni Aku,Kupediat Aku idat kalak si la ndarami Aku.+
Man bangsa-bangsa si la erlebuh man gelarKu, Kukataken, ‘Enda Aku, enda Aku!’+
2 Gedang-gedang wari, Kududurken tanKu man bangsa si keras kepala,+Man kalak si ngikutken dalan si la mehuli,+Si ngikutken perukurenna saja.+
3 Kalak si rusur erban Aku sakit hati,+Persembahkenna korban bas taman-taman+ janah tutungna korban i datas batu-batu.
4 Kundul kalak e i tengah-tengah kuburen,+Gedang-gedang berngi, erberngi kalak e bas ingan si terbuni,*Panganina daging babi,+Janah inemna kuah arah kudinna si isina kai si najis.+
5 Nina kalak e, ‘Ula miser. Ula deheri kami,Sebap lebih badia kami asangken kam!’*
Lalap iban kalak e Aku merawa, bagi api si gara gedang-gedang wari.
6 Kerina e tertulis i lebe-lebeKu,Lanai Aku banci kem saja,Kubalas pagi kalak e,+Kubalas pagi kalak e alu hukumen si sebanding,
7 Perban kesalahen kalak e ras kesalahen nini bulangna,”+ nina Jahwe.
“Perban tutung kalak e korban persembahen i gunung-gunung,Janah tokohi kalak e Aku i bukit-bukit,+Emaka si pertama, Kubalas kalak e alu hukumen si sebanding.”
8 Bagenda nina Jahwe,
“Bagi anggur si mbaru si reh bas sada tandan anggur,Janah nina kalak, ‘Ula cedai e, lit denga si mehuli i je,’
Bage ka me pagi Kulakoken guna kepentingen pelayan-pelayanKu,Labo pagi kerina kalak e Kukernepken.+
9 Kubaba pagi sada keturunen arah Jakup,Arah keturunen Juda lit pagi sada si ndatken gunung-gunungKu jadi warisenna.+
Kalak si Kupilih pagi si ndatkenca.
Janah pelayan-pelayanKu pagi si tading i je.+
10 Saron+ pagi jadi mbalmbal man biri-biri,Janah Lembah Akhor+ pagi jadi ingan ngadi-ngadi man asuh-asuhen,Kulakoken pagi e man umatKu si ndarami Aku.
11 Tapi kena kap si nadingken Jahwe,+Si ngelupaken gunungKu si badia,+Si nikapken pangan man Dewa Keuntungen,Janah ngisi cangkir-cangkir alu anggur si icampur man Dewa Nasip.
12 Emaka Kuserahken kena man pedang,+Janah mungkuk kena guna ibunuh,+Sebap sanga Kulebuh, la aloi kena,Sanga ngerana Aku, la begiken kena.+
Lalap lakoken kena kai si jahat Kuakap,Janah ipilih kena kai si la ateKu ngena.”+
13 Eme sebapna bagenda nina Jahwe Tuhan Si Meganjangna,
“Nenlah! Pelayan-pelayanKu man pagi, tapi kena kelihen.+
Pelayan-pelayanKu minem pagi,+ tapi kena muas.
Pelayan-pelayanKu ermeriah ukur pagi,+ tapi kena ipermelaken.+
14 Nenlah! Ersurak pagi pelayan-pelayanKu perban meriah ukurna,Tapi ngandung pagi kena perban latih ukur kena janah ceda pusuh kena,Ngandung pagi kena perban getem pusuh kena.
15 Gelar si tadingken kena, pake kalak si Kupilih pagi guna numpahi,Jahwe Tuhan Si Meganjangna pagi si munuh kena,Tapi Kulebuh pagi pelayan-pelayanKu alu gelar si deban.+
16 Alu bage, ise pe si ndarami pasu-pasu i doni,Dibata si setia* pagi si masu-masusa,Ise pe si ersumpah bas doni,Ersumpah pagi ia guna Dibata si setia.*+
Sebap kesusahen* si mbarenda, ilupaken pagi,Kerina e lanai pagi Kuidah.+
17 Nenlah! Kuciptaken pagi langit si mbaru ras doni si mbaru,+Kai si terjadi mbarenda lanai pagi iinget,Ntah pe turah bas pusuh.+
18 Emaka ersurak ras ermeriah ukurlah seh rasa lalap perban kai si Kuciptaken.
Kuban pagi Jerusalem jadi sumber kesenangen,Janah pendudukna jadi sumber keriahen.+
19 Emeriah ukur pagi Aku perban Jerusalem bage pe perban umatKu,+I je lanai pagi terbegi sora tangis ntah pe sora ngandung.”+
20 “I je lanai pagi lit anak bayi si nggeluh piga-piga wari saja,Lanai pagi lit kalak si metua si gendek umurna.
Kalak si mate bas umur 100 tahun, ianggap pagi nguda* denga,Janah kalak si erdosa isumpahi pagi amin pe umurna enggo 100 tahun.*
21 Bangun kalak e pagi rumah janah kalak e si ngianisa,+Suan kalak e pagi batang anggur janah kalak e si man buahna.+
22 Rumah si bangun kalak e, labo pagi kalak si deban si ngianisa,Sinuan-sinuan si suan kalak e, labo pagi kalak si deban si manca.
Sebap umur umatKu bagi umur batang kayu pagi,+Umat si Kupilih tuhu-tuhu pagi ngenanami hasil kerja kerasna.
23 Labo pagi sia-sia kerja keras kalak e,+Ntah pe lahirkenna anakna guna rate mesui,Perban kalak e keturunen si ipasu-pasu Jahwe,+Janah anak-anak bage pe kempu-kempuna ras-ras pagi ras kalak e.+
24 Ope lenga pe kalak e erlebuh, enggo Kualoi,Ngerana denga pe kalak e, enggo Kubegi.
25 Srigala ras anak biri-biri radu ras pagi nggagat,Singa ras lembu radu ras pagi man dukut,+Janah abu pagi jadi pangan nipe.
Lanai pagi lakoken binatang-binatang e kai si jahat ntah pe si ncedai bas kerina gunungKu si badia,”+ nina Jahwe.
Cataten i teruh
^ Ntah banci saja “bas sapo-sapo ingan erjaga.”
^ Ntah banci saja “Banci kena badia perban kami.”
^ Ntah “Dibata kebenaren.”
^ Ntah “Dibata kebenaren.”
^ Ntah “kesalahen.”
^ Ntah “kitik.”
^ Ntah banci saja “Kalak si mate sope seh umurna 100 tahun ianggap kena sumpah.”
