Jesaya 9:1-21
9 Tapi kegelapen e la seri pagi bagi sanga nanami negri e kesusahen. Janah la pagi seri bagi sanga taneh Sebulon ras taneh Naptali ihina kalak.+ Tapi ingan-ingan si ihina e, iban Dibata pagi dungna ihamati, eme dalan i tepi laut, daerah Lau Jordan, Galilea si iingani bangsa-bangsa si deban.
2 Kalak si erdalan bas kegelapen,Enggo idahna terang si luar biasa.
Kalak si tading bas negri si seh kel gelapna,Enggo isinari terang.+
3 BanNdu bangsa e reh teremna,BanNdu bangsa e tuhu-tuhu ermeriah.
Ermeriah ukur kalak e i lebe-lebeNdu,Bagi kalak si ermeriah ukur sanga rani,Bagi kalak si ermeriah ukur sanga erbagi hasil jarahen.
4 Sebap enggo hancurkenNdu pasangen* kalak e,Tongkat bas bara kalak e, eme tongkat kalak si nindas kalak e,Bali bagi sanga Midian italuken.+
5 Kerina pagi sepatu kalak e erban doni mugur-ugur,Kerina baju si lit i je bekas darehJadi minak pagi man api.
6 Sebap enggo lahir sekalak anak man banta,+Sekalak anak dilaki enggo ibereken man banta,Lit kuasa bas tanna.+
Igelari pagi ia Penasehat si Hebat,+ Dibata si Megegeh,+ Bapak Rasa Lalap, ras Peminpin Perdamen.
7 Kuasana terus reh tambahna,Janah kedamen la erngadi-ngadi+Bas tahta Daud+ ras kerajanna.
Paguh pagi kerajanna,+Pondasina eme keadilen+ ras kebenaren,+Gundari nari seh rasa lalap.
Jahwe penguasa malekat pagi si ngelakokenca alu semangat.
8 Bereken Jahwe persinget man Jakup,Janah si e terjadi man Israel.+
9 Kerina pagi kalak meteh kerna si e,Eme kalak Eperaim ras penduduk Samaria.
Sombong janah tual kalak e ngerana, nina,
10 “Runtuh bangunen si iban arah batu bata,Tapi ibangun kami pagi alu batu.+
Batang ara kerangen itabah,Tapi gantiken kami pagi alu batang kayu aras.”
11 Pediat Jahwe pagi musuh-musuh Resin menang ngelawan Eperaim,Janah iahkenNa musuh-musuh kalak Israel gelah ertindak,
12 Siria arah timur nari ras kalak Pilisti arah barat nari,*+Buka kalak e pagi babahna janah panna kalak Israel.+
E me sebapna tetap Ia merawa,Tetap dudurkenNa tanNa guna ngukum.+
13 Sebap bangsa e la mulihken ku Dibata si ngukum kalak e,La darami kalak e Jahwe penguasa malekat.+
14 Bas sada wari saja, potong Jahwe pagi arah kalak IsraelTakal ras ikur, tunas ras tangkena.+
15 Takal eme kalak si enggo metua ras kalak si ihamati.
Ikur eme nabi si mereken ajaren si salah.+
16 Kalak e me si minpin bangsa e, si erban bangsa e papak,Janah dungna bingung kalak si ngikutken kalak e.
17 E me sebapna la pagi meriah ukur Jahwe man anak muda bangsa e,La ateNa mekuah man anak si la erbapa* ras janda-janda bas bangsa e,Sebap kerina kalak e enggo murtad ras jahat,+Janah si la erguna ngenca si cakapken kalak e.
E me sebapna tetap Ia merawa,Tetap dudurkenNa tanNa guna ngukum.+
18 Kejahaten gara bagi api,Erban meseng peren duri ras rambah.
Itutungna pagi peren duri bas kerangen,Emaka cimberna erdipul ku datas.
19 Perban merawa Jahwe penguasa malekat,Itutung me negri e,Janah si jadi rantingna eme pendudukna.
La lit si rate mekuah, man seninana pe lang.
20 Potong kalak e pagi kai pe si lit i sebelah kanan kalak e guna ipan,Tapi tetap denga kalak e melihe.
Potong kalak e pagi kai pe si lit i sebelah kiri kalak e,Tapi tetap denga kalak e la puas.
Pan kalak e pagi daging tanna sendiri,
21 Pan Manase pagi Eperaim,Janah pan Eperaim pagi Manase.
Lawan kalak e pagi Juda.+
E me sebapna tetap Ia merawa,Tetap dudurkenNa tanNa guna ngukum.+
Cataten i teruh
^ Pasangen eme alat si biasa itama ku kuduk manusia ntah pe binatang guna maba baban.
^ As. “arah pudi nari.”
^ Ntah “anak melumang.”
