Joel 3:1-21
3 “Bas masa e ras bas waktu e,Sanga Kubaba mulih kalak Juda ras kalak Jerusalem si itaban,+
2 Kupepulung ka pagi kerina bangsa,Kubaba kalak e ku Lembah* Josapat.*
Kuhakimi pagi kalak e i je+Guna kepentingen umatKu Israel eme jangKu,Sebap enggo ban kalak e umatKu merap i tengah bangsa-bangsa,Bagi-bagiken kalak e negriKu man dirina sendiri.+
3 Ban kalak e undi guna mbagi-mbagiken umatKu.+
Dayaken kalak e anak si dilaki guna nggalari sekalak pelacur,Dayaken kalak e anak si diberu guna ndatken inemen anggur.
4 O Tirus, Sidon, ras kerina daerah Pilistia,Lit kin hak kena ngelakoken si bage man bangKu?
Balas dendam kin ate kena perban lit si la mehuli si Kulakoken man kena?
Adi bage kin,Mis kel kena Kubalas menurut perbahanen kena.+
5 Perban enggo buat kena pirakKu ras emasKu,+Enggo baba kena ertaKu si mejilena ku ingan-ingan ersembah kena.
6 Dayaken kena kalak Juda ras kalak Jerusalem man kalak Junani+Gelah kalak e ndauh arah daerahna.
7 Gundari, Kubaba kalak e arah ingan kalak e idayaken kena,+Kubalas kena menurut perbahanen kena.
8 Kudayaken pagi anak-anak kena si dilaki ras si diberu man kalak Juda,+Dayaken kalak Juda pagi kalak e ku kalak Syeba, ku bangsa si ndauh.
Aku, Jahwe si enggo ngatakenca.
9 Umumkenlah kerna si e man bangsa-bangsa,+
‘Ersikaplah guna erperang! Semangatilah pejuang si megegeh!
Pediatlah prajurit-prajurit maju janah nyerang!+
10 Banlah piso bajak kena jadi pedang janah sabi-sabi kena jadi tombak.
Pediatlah kalak si lemah ngataken, “Aku megegeh.”
11 O bangsa-bangsa arah kerina ingan, pulunglah janah sisampat-sampatenlah kena!’”+
O Jahwe, babalah pejuang-pejuangNdu si megegeh ku ingan e.
12 “Pediatlah bangsa-bangsa tedis janah reh ku Lembah* Josapat.
Sebap i je pagi Aku kundul guna ngakimi bangsa-bangsa arah kerina ingan.+
13 Ayunkenlah sabi-sabi, sebap si man peranin enggo banci iperani.
Rehlah, perjakilah anggur, sebap enggo dem ingan meras anggur.+
Anggur bas ingan anggur si enggo ipereh enggo mamburen, sebap kejahaten kalak e seh kel buena.
14 Enterem kel kalak bas lembah* penghakimen,Sebap i je, wari Jahwe enggo ndeher.+
15 Gelap pagi matawari ras bulan,Bintang-bintang lanai ersinar.
16 Erngaung pagi Jahwe arah Sion,Megang pagi Ia erlebuh arah Jerusalem.
Mugur-ugur pagi langit ras doni.
Jahwe jadi penyelamat pagi man umatNa,+Jadi kota si erbenteng man kalak Israel.
17 Teh kena pagi maka Aku kap Jahwe Dibata kena, si tading i Sion, eme gunungKu si badia.+
Jadi ingan si badia pagi Jerusalem,+Lanai pagi lit kalak si la itandai* lewat arah je nari.+
18 Bas wari e, naktaken pagi lau anggur si ntebu i gunung-gunung,+Melala kel pagi susu i bukit-bukit,Melala kel pagi lau bas kerina lau maler i Juda.
Lit pagi mata lau bas rumah Jahwe, maler pagi lau e+Janah palerina Lembah* Akasia.
19 Tapi Mesir pagi jadi ingan si la iurus,+Edom jadi taneh mesawang* si la iurus,+Perban enggo lakoken kalak e kekerasen man kalak Juda,+Enggo amburken kalak e dareh kalak si la ersalah i negri Juda.+
20 Tapi Juda lalap pagi iingani,Bage ka pe Jerusalem, arah jaman ku jaman.+
21 Lanai pagi Kuanggap kalak e* ersalah.+
Tading pagi Jahwe i Sion.”+
Cataten i teruh
^ Ntah “Baluren.”
^ Ertina “Jahwe kap Hakim.”
^ Ntah “Baluren.”
^ Ntah “Baluren.”
^ Ntah “kalak asing.”
^ Taneh si mbelang si jarang iingani.
^ As. “dareh kalak e.”
