Johanes 11:1-57
11 Lit sekalak dilaki gelarna Lasarus. Ia sangana sakit. Ia arah kuta Betani, ingan tading Maria ras kakakna Marta.+
2 Maria enda si ncurcurken minak wangi ku nahe Tuan janah elapna alu bukna.+ Turangna Lasarus sangana sakit.
3 Emaka duana turang Lasarus e ngirimken pesan man Jesus, nina, “O Tuan, teman si kelengindu sangana sakit.”
4 Megi si e, nina Jesus, “Penakit e labo maba kematen, tapi maba kemulian man Dibata,+ gelah Anak Dibata imuliaken arah e.”
5 Keleng ate Jesus man Marta, Maria, ras Lasarus.
6 Tapi kenca begina Lasarus sakit, tetap ia tading bas ingan e dua wari nari.
7 Kenca si e, nina man murid-murid, “Ota kita lawes ka ku Judea.”
8 Nina murid-murid, “O Guru,*+ mbaru denga benteri kalak Judea tena kam alu batu,+ gundari ku jah ka tendu mulihi?”
9 Nina Jesus, “La kin 12 jam dekahna terang wari?+ Adi suari kalak erdalan labo ia tertuktuk, sebap idahna terang doni enda.
10 Tapi adi berngi ia erdalan tertuktuk ia, sebap la lit terang bas ia.”
11 Kenca dung kataken Jesus si e ndai, nina ka, “Temanta Lasarus enggo medem,+ lawes teku ngingeti ia.”
12 Nina murid-murid, “O Tuan, adi medem nge ia, malem nge ia kari.”
13 Situhuna maksud Jesus ia enggo mate. Tapi akap kalak e maksud Jesus ia sangana medem.
14 Emaka kataken Jesus alu terus terang, “Lasarus enggo mate.+
15 Guna kena, meriah ukurku la aku i jah. Alu bage banci kena reh tekna man bangku. Gundari, ota sidahi ia.”
16 Tomas si igelari si Kembar, ngerana man murid-murid si deban, “Ota kita ku jah, gelah mate kita ras ia.”+
17 Kenca seh Jesus i je, dapetina enggo empat wari Lasarus bas kuburen.
18 Betani ndeher ras Jerusalem, lit kira-kira telu kilometer* dauhna.
19 Enterem kalak Jahudi reh ngapuli Marta ras Maria, perban turangna enggo mate.
20 Kenca begi Marta maka Jesus enggo reh, ndarat ia njumpai Jesus, tapi Maria+ tading i rumah.
21 Nina Marta man Jesus, “O Tuan, bicara i jenda min ndai kam, labo mate turangku e.
22 Tapi amin pe bage, tek nge aku kai pe pindondu man Dibata berekenNa nge.”
23 Nina Jesus, “Nggeluh nge kari turangndu mulihi.”
24 Ngaloi Marta, “Kuteh nge nggeluh ia pagi sanga terjadi kekeken+ bas wari pendungi.”
25 Nina Jesus man bana, “Aku kap kekeken ras kegeluhen.+ Ise pe si erkiniteken man bangku, nggeluh mulihi amin pe ia enggo mate,
26 ise pe si nggeluh ras erkiniteken man bangku, ndigan pe la ia mate.+ Tek nge kam kerna si e?”
27 Nina Marta, “Tek aku Tuan, tek aku kam kap Kristus Anak Dibata si reh ku doni enda.”
28 Kenca bage, mulih Marta ku rumah. Kusikkenna man Maria nina, “Enggo jenda Guru,+ dilona kam.”
29 Kenca si e mis tedis Maria, dahina Jesus.
30 Sanga si e Jesus lenga seh bas kuta e. Tetap denga ia bas inganna jumpa ras Marta ndai.
31 Ngidah Maria rempet tedis jenari lawes, akap kalak Jahudi si reh ngapuli e, lawes ate Maria ku kuburen+ guna ngandung. Emaka ikutken kalak e Maria.
32 Kenca seh Maria bas ingan Jesus janah idahna ia i je, sujud Maria i nahe Jesus, nina, “O Tuan, bicara i jenda min ndai kam, labo mate turangku e.”
33 Sanga idah Jesus tangis Maria ras kalak Jahudi si reh radu ras ia, sedih Jesus, ceda kel atena.
34 Emaka sungkunna kalak ndai, “I ja ban kena mayatna?” Nina kalak e, “Ota sinen, Tuan.”
35 Tangis Jesus.+
36 Emaka nina kalak Jahudi, “Nenlah, keleng kel atena Lasarus e!”
37 Tapi lit ka si ngerana, “Kalak pentang banna erpengidah,+ la kin ia ngasup erban Lasarus e la mate?”
38 Sedih denga akap Jesus, jenari lawes ia ku kuburen e. Kuburen e gua si tutupi batu.
39 Nina Jesus, “Gulingken batu ena.” Tapi ngaloi Marta turang si mate e, “O Tuan, ia pasti enggo mbau, sebap enggo empat wari ia mate.”
40 Nina Jesus, “La kin enggo kukataken adi tek kam idahndu me kemulian Dibata?”+
41 Emaka gulingken kalak e batu ndai. Tatap Jesus ku langit,+ nina, “O Bapak, bujur kukataken man baNdu sebap enggo begikenNdu aku.
42 Kuteh nge katawari pe begikenNdu aku, tapi si enda kukataken guna kalak si tedis i jenda, gelah tek kalak e Kam kap si nuruh aku.”+
43 Kenca bage, megang Jesus erlebuh, nina, “O Lasarus, ndaratkenlah!”+
44 Emaka ndarat dilaki si enggo mate e. Tanna ras nahena ibaluti uis, ayona pe ibaluti uis. Nina Jesus man kalak si lit i je, “Agui balutna e, jenari pediat ia lawes.”
45 Ngidah kejadin e, enterem kalak Jahudi si reh ngapuli Maria dungna erkiniteken man Jesus.+
46 Tapi lit piga-piga kalak si lawes ndahi kalak Parisi, kataken kalak e kai si enggo lakoken Jesus.
47 Emaka imam-imam kepala ras kalak Parisi mpepulung kerina anggota Pengadilen Agama Jahudi,* nina, “Enggo melala banna mukjizat, kai si arus silakoken?+
48 Adi sipediat ia lalap bagenda, kerina kari kalak erkiniteken man bana. Dungna reh pagi kalak Roma, rampasna pagi rumah pertotonta ras bangsata.”
49 Tapi ngerana sekalak arah kalak e nari eme Kayapas,+ ia imam si mbelin bas tahun e, nina, “La kap teh kena kai pe,
50 la kap teh kena padin sekalak jelma mate guna sada bangsa asangken kerina bangsa ikernepken.”
51 Situhuna, kai si katakenna enda labo arah ukurna nari. Tapi perban ia imam si mbelin bas tahun e, ernubuat ia mate pagi Jesus guna bangsa e.
52 Labo guna bangsa e saja, tapi guna mpepulung anak-anak Dibata si enggo merap.
53 Emaka mulai bas wari e, ersada arih kalak e guna munuh Jesus.
54 Emaka lanai terang-terangen Jesus erdalan i lebe-lebe jelma si enterem i tengah-tengah kalak Jahudi. Tapi, lawes ia ku Eperaim+ deher taneh mesawang.* I je ia tading ras murid-murid.
55 Sanga si e, lanai ndekah Perayan Paskah+ kalak Jahudi. Sope Perayan Paskah e, enterem kalak reh arah kuta-kuta nari ku Jerusalem ngelakoken acara pembersihen diri.
56 Darami kalak e Jesus, sisungkun-sungkunen ia sanga tedis i rumah pertoton, “Uga nge kap kena? Reh nge ia ku perayan enda?”
57 Enggo perentahken imam-imam kepala ras kalak Parisi gelah ise pe si meteh i ja Jesus arus laporkenna, gelah banci tangkap kalak e ia.
