Johanes 13:1-38
13 Sope Perayan Paskah, teh Jesus enggo seh waktuna+ maka tadingkenna me doni enda janah mulih ia ku Bapakna.+ Keleng kel tena pengikutna si lit bas doni enda, seh ku kedungenna pe tetap tena keleng.+
2 Sanga si e, kalak e sangana man berngi, ban Iblis turah sura-sura bas pusuh Judas Iskariot+ anak Simon gelah hianatina Jesus.+
3 Teh Jesus maka enggo bereken Bapak kerinana ku bas tanna, teh Jesus ka maka ia reh bas Dibata nari, janah nandangi mulih ku Dibata.+
4 Sanga kalak e man berngi, tedis Jesus, tangtangina uisna si arah darat. Jenari buatna sada anduk, kenca si e iketna bas awakna.+
5 Tamakenna lau ku bas baskom, cucina nahe murid-muridna, elapna alu anduk si iketna bas awakna ndai.
6 Kenca seh giliren Simon Petrus, sungkunna Jesus, “Cucindu nge atendu naheku e, Tuan?”
7 Nina Jesus, “Kai si kulakoken enda gundari labo angkandu, tapi angkandu nge pagi.”
8 Nina Petrus, “Ndigan pe ula cucindu naheku.” Nina Jesus, “Adi la kucuci nahendu,+ la kam banci ras aku.”
9 Ngaloi Simon Petrus, “O Tuan, adi bage kin ula naheku saja cuci. Tapi cuci ka tanku ras takalku.”
10 Nina Jesus, “Kalak si enggo ridi, nahena saja ngenca perlu icuci perban kerina dagingna enggo bersih. Kena enggo bersih, tapi labo kerina kena bersih.”
11 Sebap enggo tehna ise kari si erhianat man bana.+ Emaka katakenna, “Labo kerina kena bersih.”
12 Kenca cuci Jesus nahe kalak e janah pakena uisna si arah darat, kundul ia, nina, “Angka kena nge engkai maka bagenda kuban man kena?
13 Lebuh kena aku ‘Guru’ ras ‘Tuan,’ payo si kataken kena e.+
14 Adi aku saja pe Tuan kena ras Guru kena nuci nahe kena,+ kena pe arus sicuci-cucin nahe.+
15 Enggo kuban usihen man kena, gelah lakoken kena ka bagi si kuban e.+
16 Situhuna kukataken man kena, budak labo belinen asangken tuanna, kalak si isuruh labo belinen asangken si nuruh ia.
17 Adi teh kena kerina enda, meriah pagi ukur kena adi dalanken kena e.+
18 Si kucakapken labo kerna kena kerina. Kuteh nge kalak si enggo kupilih. Tapi alu bagenda, terjadi kai si enggo itulis bas ayat enda:+ ‘Kalak si ras-ras kami man, enggo ngelawan aku.’+
19 Gundari kukataken man kena sope e terjadi, gelah sanga e terjadi, tek kena maka aku kap si ikataken bas ayat e.+
20 Situhuna kukataken man kena, ise pe si ngaloken kalak si kusuruh, ngaloken aku ka nge.+ Ise pe si ngaloken aku, alokenna ka nge Ia si nuruh aku.”+
21 Kenca dung Jesus ngerana, latih kel ukurna, nina alu terus terang, “Situhuna kukataken man kena, sekalak arah kena nari hianatina kari aku.”+
22 Sitatapen murid-murid perban la teh kalak e ise maksud Jesus.+
23 Sekalak murid si keleng ate Jesus,+ kundul rembak ras ia.*
24 Emaka tatap Simon Petrus murid e, nina, “Kataken man kami ise maksudna e.”
25 Emaka murid si rembak ras Jesus ndai nungkun man Jesus, “O Tuan, ise kin katandu e?”+
26 Nina Jesus, “Kucelupken kari roti enda, ku ise kari kubereken, ia jelmana.”+ Kenca celupkenna roti e, berekenna man Judas anak Simon Iskariot.
27 Kenca buat Judas roti e, pengaruhi Setan pusuhna.+ Emaka nina Jesus man bana, “Mis lakoken kai si atendu lakokenndu.”
28 Tapi, kalak si kundul i je sada pe la meteh engkai maka bage Jesus ngerana man bana.
29 Perban Judas si njemak kotak sen,+ lit si erpengakap maka Jesus sangana nuruh ia nukur keperlun guna perayan e, ntah mereken sumbangen man kalak mesera.
30 Emaka kenca buatna roti e, mis lawes Judas. Sanga si e enggo berngi.+
31 Kenca lawes Judas, nina Jesus, “Gundari, imuliaken me Anak manusia+ janah Dibata pe imuliaken arah ia.
32 Dibata pagi si mere kemulian man bana,+ janah mis pagi muliakenNa.
33 O anak-anak, ntisik nari ngenca aku ras kena. Darami kena pagi aku, tapi kukataken man kena gundari bagi si enggo kukataken man kalak Jahudi, ‘Labo kena banci reh ku ingan si nandangi kudahi e.’+
34 Kubereken man kena perentah si mbaru: Sikeleng-kelengenlah kena. Bagi aku enggo engkelengi kena,+ kena pe arus sikeleng-kelengen.+
35 Adi sikeleng-kelengen kena, kerina kalak meteh maka kena kap murid-muridku.”+
36 Nungkun Simon Petrus man Jesus, “Ku ja kin kam lawes, Tuan?” Nina Jesus, “Gundari labo banci ikutkenndu aku ku ingan si nandangi kudahi e, tapi ikut nge kam pagi.”+
37 Nina Petrus, “Engkai maka gundari la banci aku ikut ras kam, Tuan? Nggit nge aku mate guna kam.”+
38 Ngaloi Jesus, “Tuhu kin kam nggit mate guna aku? Situhuna kukataken man bandu, sope tekuak manuk, enggo persokenndu pagi aku telu kali.”+
Cataten i teruh
^ As. “tertande bas dada Jesus.”
