Johanes 15:1-27
15 “Aku kap batang anggur situhu-tuhu, Bapakku perjuma anggur e.
2 Cabang-cabangku si la erbuah tektekNa, cabang-cabangku si erbuah bersihkenNa gelah reh buena buahna.+
3 Kena enggo ibersihken alu kata si kupeseh man kena.+
4 Tetaplah kena ersada ras aku, aku pe tetap ersada ras kena. Cabang la banci erbuah adi la kin ersada ras batangna. Bage ka pe kena adi la kin ersada ras aku, la banci erbuah.+
5 Aku kap batang anggur e, kena cabang-cabangna. Ise pe si tetap ersada ras aku, aku ersada ras ia, melala pagi buah si hasilkenna.+ Adi la kin ras aku, labo kai pe banci lakoken kena.
6 Ise pe si la tetap ersada ras aku, ia bagi cabang si iambekken, dungna kerah. Ipepulung pagi cabang-cabang e, ibenterken ku api, dungna tertutung.
7 Adi tetap kena ersada ras aku, janah kata-kataku tetap lit bas pusuh kena, pindolah kai te kena pindo kena, e pasti ibereken man kena.+
8 Adi terus hasilken kena melala buah, imuliaken pagi Bapakku, e jadi bukti maka kena kap murid-muridku.+
9 Kena kukelengi bagi Bapak engkelengi aku.+ Tetap min kena bas kekelengenku e.
10 Adi patuhi kena perentah-perentahku, kena tetap bas kekelengenku. Bagi aku enggo matuhi perentah-perentah Bapak, aku tetap bas kekelengenNa.
11 “Si enda kukataken man kena gelah nanami kena keriahen ukurku janah gelah tuhu-tuhu kena ermeriah ukur.+
12 Enda kap perentahku: Sikeleng-kelengenlah kena, bagi aku enggo engkelengi kena.+
13 Labo lit kekelengen si belinen asangken kalak si nggit mereken geluhna* man teman-temanna.+
14 Kena kap teman-temanku adi lakoken kena kai si kuperentahken.+
15 Lanai kena kugelari budak-budak, perban sekalak budak la tehna kai si lakoken tuanna. Tapi kugelari kena teman-temanku, perban enggo kukataken man kena kerina si enggo kubegi arah Bapakku nari.
16 Labo kena si milih aku, tapi aku nge si milih kena. Kupilih kena gelah lalap hasilken kena buah, eme buah si tahan rasa lalap. Alu bage, kai pe pindo kena man Bapak bas gelarku, berekenNa man kena.+
17 “Si e kuperentahken man kena, gelah kena sikeleng-kelengen.+
18 Adi segat ate doni enda kena, ingetlah enggo leben segat tena aku.+
19 Adi kena jadi bagin bas doni enda, kelengi doni enda nge kena, perban kena jangna. Gundari kena lanai jadi bagin doni enda,+ enggo kupilih kena arah doni enda. Perban si e, segat ate doni man kena.+
20 Ingetlah kai si enggo pernah kukataken enda: Sekalak budak labo belinen asangken tuanna. Adi aku pe siksa kalak e, kena pe siksana ka nge.+ Adi kata-kataku patuhi kalak e, kata-kata kena pe patuhina ka.
21 Kerina si e lakoken kalak e man kena perban gelarku, perban la tandai kalak e Ia si nuruh aku.+
22 Adi la min ndai aku reh janah ngerana man kalak e, labo kalak e erdosa.+ Tapi gundari, lanai banci persokenna dosana.+
23 Ise si segat tena aku, segat ka nge tena Bapakku.+
24 Bicara la pernah kulakoken pendahin-pendahin si lenga pernah lakoken kalak si deban, labo kalak e erdosa.+ Tapi gundari, enggo idah kalak e aku janah segat ka tena aku ras Bapakku.
25 Alu bage, terjadi pagi kata-kata si enggo itulis bas Undang-Undang kalak e, ‘Labo lit sebapna, segat ate kalak e aku.’+
26 Kusuruh pagi penampat si reh arah Bapak nari ndahi kena eme kesah si badia si ncidahken kebenaren.+ Adi enggo reh pagi kesah e, ia kap si ersaksi kerna aku.+
27 Kena pe ersaksi ka kerna aku,+ perban tangtangna nari kena enggo ras aku.
Cataten i teruh
^ Ntah “si nggit ngorbanken kesahna.”
