Johanes 16:1-33
16 “Kukataken enda man kena gelah ula bene kiniteken kena.*
2 Pedarat kalak pagi kena arah ingan pulung kalak Jahudi.*+ Seh pagi waktuna maka ise pe si munuh kena,+ akapna enggo berekenna pelayanen si badia man Dibata.
3 Bage perbahanenna, perban la tandaina Bapak ntah pe aku.+
4 Amin pe bage, enggo kukataken man kena kerna si e gelah sanga terjadi pagi e, inget kena maka enggo pernah kukataken kerna si e man kena.+
“Tangtangna la kukataken si enda man kena, perban aku ras kena denga.
5 Gundari lawes aku ndahi Ia si nuruh aku,+ tapi sekalak pe kena la nungkun, ‘Ku ja kam lawes?’
6 Tapi perban enggo kukataken man kena kerna si enda, sedih kel kena.+
7 Amin pe bage, kai si kukataken e benar. Aku lawes guna kiniulin kena. Adi la aku lawes, labo reh penampat e.+ Tapi adi lawes aku, kukirim penampat e man kena.
8 Sanga reh penampat e, buktikenna man doni ise si erdosa, ise si ngelakoken si benar, janah ise si ihukum.
9 Pertama, buktikenna ise si erdosa+ perban la kalak e erkiniteken man bangku.+
10 Kenca si e, buktikenna ise si ngelakoken si benar, perban lawes aku ndahi Bapak janah lanai idah kena aku.
11 Buktikenna pagi ise si ihukum, perban penguasa doni enda enggo ihukum.+
12 “Melala denga si ateku kukataken man kena, tapi gundari lenga ngasup kena ngangkaisa.
13 Tapi, sanga reh penampat e, eme kesah si badia si ncidahken kebenaren,+ tegu-teguna kena guna ngangkai kerina kebenaren. Kai si kataken penampat e labo rehna arah penampat e nari. Tapi si kataken penampat e eme kerna kai si begi penampat e janah kataken penampat e man kena kerna kai si nandangi terjadi.+
14 Muliaken penampat e pagi aku,+ sebap pebetehken penampat e pagi man kena kai si aloken penampat e arah aku nari.+
15 Kerina jang Bapak jangku ka nge.+ E me sebapna kukataken maka kataken penampat e man kena kai si alokenna arah aku nari.
16 Ntisik nari lanai idah kena aku,+ ntisik nari idah kena ka aku.”
17 Megi si e, piga-piga muridna sisungkun-sungkunen, “Kai maksud kata-katana, ‘Ntisik nari lanai idah kena aku, ntisik nari idah kena ka aku,’ nina ka, ‘sebap lawes pagi aku ndahi Bapak’?”
18 Emaka nina kalak e, “Kai nge maksudna sanga katakenna ‘ntisik nari’? La kap siangka kai si katakenna e.”
19 Teh Jesus maka nungkun ate murid-murid man bana, emaka nina, “Sisungkun-sungkunen nge kena perban kukataken, ‘Ntisik nari lanai idah kena aku, ntisik nari idah kena ka aku’?
20 Situhuna kukataken man kena, tangis ras ngandung pagi kena, tapi doni enda ermeriah ukur. Ceda pagi ate kena, tapi ceda ate kena e berubah jadi keriahen ukur.+
21 Mesui kel akap sekalak diberu adi enggo seh waktuna melahirken, tapi kenca enggo lahir anakna e, lanai ingetna kiniseranna e. Meriah ukurna perban enggo lahir sekalak manusia ku doni enda.
22 Bage ka me kena. Gundari ceda ate kena, tapi sanga kuidah pagi kena mulihi,+ meriah pagi ukur kena. La lit ise pe si muat keriahen ukur e arah kena nari.
23 Bas wari e pagi, lanai lit penungkunen kena man bangku. Situhuna kukataken man kena, kai pe si pindo kena+ man Bapak bas gelarku, berekenNa nge.+
24 Seh asa gundari, lenga pernah pindo kena kai pe bas gelarku. Pindolah, tentu ngalo pagi kena gelah tuhu-tuhu meriah ukur kena.
25 “Kukataken kerina enda man kena alu perumpaman.* Seh pagi waktuna maka lanai aku ngerana man kena alu perumpaman, tapi kukataken man kena alu terus terang kerna Bapak.
26 Bas wari e pagi, mindo kena man Bapak bas gelarku. Kukataken bage, labo ertina aku mindo man baNa guna keperlun kena.
27 Keleng ate Bapak man kena perban enggo kelengi kena aku+ janah tek kena maka aku wakil Dibata.+
28 Aku reh jadi wakil Bapak, aku enggo reh ku doni enda. Gundari kutadingken me doni enda, mulih aku ndahi Bapak.”+
29 Nina murid-muridna, “Gundari, terus terang kel kam ngerana lanai make perumpaman.
30 Gundari, enggo teh kami maka kai pe tehndu nge, la perlu kalak nungkun man bandu perban tehndu kai si lit bas ukurna. Perban si e maka tek kami kam reh arah Dibata nari.”
31 Ngaloi Jesus, “Enggo tek kena gundari?
32 Reh pagi waktuna, janah enggo seh, merap kena kerina ku rumah kena masing-masing, tadingken kena pagi aku sisada.+ Tapi labo aku sisada, sebap Bapak ras aku kap.+
33 Kukataken enda man kena, gelah lit kedamen bas kena perban aku.+ Dat kena pagi kiniseran bas doni enda, tapi ula kena mbiar! Enggo kap kutaluken doni enda.”+
