Johanes 19:1-42
19 Kenca si e, suruh Pilatus gelah Jesus ibaba janah icambuk.+
2 Jenari, ban prajurit-prajurit e mahkota arah peren duri, janah tama kalak e ku takal Jesus. Pakeken kalak e ka man Jesus jubah si warna ungu.+
3 Mulih-ulih deheri kalak e Jesus, nina, “Mejuah-juah, o Raja Kalak Jahudi!” Parapi kalak e ka ia.+
4 Ndarat ka Pilatus janah nina man kalak si enterem e, “Nenlah! Kubaba ia ndarat gelah teh kena maka kai pe labo lit kudat salahna.”+
5 Emaka ndarat Jesus alu make mahkota duri ras jubah si warna ungu. Jenari nina Pilatus man kalak e, “Nenlah dilaki enda!”
6 Emaka sanga nen imam-imam kepala ras petugas-petugas e Jesus, serko kalak e nina, “Bunuh ia bas tiang!* Bunuh ia bas tiang!”*+ Jenari nina Pilatus, “Kena saja si mabasa ras munuh ia, perban kai pe labo lit kudat salahna.”+
7 Ngaloi kalak Jahudi, “Lit kap undang-undang kami, janah menurut undang-undang e, ia arus mate,+ perban katakenna ia anak Dibata.”+
8 Megi si e reh biarna Pilatus.
9 Masuk ka ia ku rumah gubernur janah sungkunna Jesus, “I ja nari kin asalndu?” Tapi la aloi Jesus.+
10 Emaka nina Pilatus, “La kam nggit ngerana ras aku? La kin tehndu maka lit kuasaku guna mbebasken kam bage pe mereken hukumen mate man bandu?”*
11 Nina Jesus, “Labo lit kuasandu nandangi aku adi la kin bere Dibata man bandu. Perban si e me maka belinen kap dosa kalak si nyerahken aku man bandu.”
12 Emaka, lalap darami Pilatus dalan guna mbebasken Jesus. Tapi nina kalak Jahudi e alu sora megang, “Adi bebaskenndu dilaki ena, kam labo teman Kaisar. Tiap kalak si ngataken dirina raja, situhuna lawanna kap Kaisar.”+
13 Megi kata-kata e, baba Pilatus me Jesus ndarat. Jenari kundul Pilatus i kursi penghakimen bas ingan si igelari Kesain Batu. Bas bahasa Heber igelari Gabbata.
14 Wari e eme wari Persikapen+ Paskah, kira-kira jam 12 ciger.* Nina Pilatus man kalak Jahudi, “Nenlah raja kena!”
15 Tapi serko kalak e, “Bunuh ia! Bunuh ia! Bunuh ia bas tiang!”* Sungkun Pilatus kalak e, “Arus kin kubereken hukumen mate man raja kena?” Nina imam-imam kepala, “Labo lit raja kami selain Kaisar.”
16 Kenca bage, serahkenna Jesus guna ihukum mate i tiang.*+
Emaka baba kalak e Jesus.
17 Sanga baba Jesus tiang siksanna,* lawes ia ku ingan si igelari Ingan Tengkorak.+ Bas bahasa Heber, igelari Golgota.+
18 I je me Jesus ipakuken,+ i tengah-tengah dua kalak si debanna, sekalak i sebelah kananna, sekalak nari i sebelah kirina.+
19 Ban Pilatus tulisen janah tamana bas tiang siksan* e. Isina, “Jesus kalak Nasaret, Raja Kalak Jahudi.”+
20 Enterem kalak Jahudi si mbaca tulisen e, perban ingan Jesus ipakuken bas tiang* ndeher ku kota, janah tulisen e itulis bas bahasa Heber, Latin, ras Junani.
21 Tapi ngerana imam-imam kepala kalak Jahudi man Pilatus, “Ula tulis, ‘Raja Kalak Jahudi,’ tapi tulislah bagi si katakenna, ‘Aku kap Raja Kalak Jahudi.’”
22 Nina Pilatus, “Kai si enggo kutulis, lanai banci iubah.”
23 Kenca pakuken prajurit-prajurit e Jesus bas tiang,* buat kalak e uisna si arah darat, rigatkenna jadi empat bagin janah bagikenna sada bagin man tiap prajurit. Buat kalak e ka uisna si arah bas, tapi datas nari seh ku teruh uis e la lit penjarumenna.
24 Nina kalak e, “Uis si e ula sirigatken. Mari siundi guna nentuken man ise uis e.”+ Alu bage, terjadi me ayat si ngataken, “Bagi-bagiken kalak e uisku, undi kalak e pakenku.”+ Enda me si lakoken prajurit-prajurit e.
25 I deher tiang siksan* Jesus, tedis i je mamakna,+ senina mamakna, Maria diberu Kleopas, ras Maria Magdalena.+
26 Sanga idah Jesus mamakna ras murid si ikelengina+ tedis i deherna, nina man mamakna, “O Mak, gundari nari ia me anakndu.”
27 Jenari nina Jesus man muridna e, “Gundari nari, ia me mamakndu.” Emaka mulai paksa si e, baba murid e mamak Jesus tading bas rumahna.
28 Kenca bage, sanga teh Jesus enggo dung kerinana, katakenna, “Muas aku.” Alu bage, terjadi kai si tertulis bas ayat e.+
29 I je lit sada kudin si dem anggur macem. Celupken kalak e bunga karang ku anggur e, jenari cucukkenna ku batang hisop,* kenca bage tamakenna ku babah Jesus.+
30 Kenca cepcep Jesus anggur e, nina, “Enggo dung!”+ Jenari mungkuk takalna, mate me ia.+
31 Wari e eme wari Persikapen,+ janah la ate kalak Jahudi mayat kalak si ipakuken e tetap lit i tiang siksan+ bas wari Sabat (sebap wari e wari Sabat si mbelin).+ Emaka pindoken kalak e man Pilatus gelah nahe kalak si ipakuken e ipenggelken janah ipenusur mayatna.
32 Emaka reh prajurit-prajurit janah penggelkenna nahe dua kalak si lit bas tiang* i sebelah Jesus.
33 Tapi kenca seh kalak e ku Jesus, idah kalak e Jesus enggo mate. Emaka la penggelken kalak e nahena.
34 Tapi tebak sekalak prajurit tulan rangrang Jesus alu tombak,+ emaka paksa si e ndarat dareh ras lau.
35 Kalak si ngidah kejadin e, beritakenna kerna si e, janah beritana e tuhu. Tehna maka kai si katakenna e benar, janah katakenna si e gelah kena pe banci tek.+
36 Si enda tuhu-tuhu terjadi gelah seh kai si itulis bas ayat, “Sada pe labo pagi ipenggelken* tulanna.”+
37 Lit ka ayat si deban si ngataken, “Tatap kalak e pagi kalak si tebakna.”+
38 Kenca kejadin e, Jusup kalak Arimatea mindo man Pilatus gelah banci min buatna mayat Jesus. Jusup e pe murid Jesus, tapi la katakenna man kalak si deban perban mbiar ia man kalak Jahudi.+ Bere Pilatus pemindon Jusup e, emaka lawes Jusup ngelegi mayat Jesus.+
39 Nikodemus,+ si mbarenda pernah reh ndahi Jesus berngi-berngi, ia pe reh maba campuren* mur ras gaharu lit kira-kira 30 kilo* buena.+
40 Emaka duana kalak e muat mayat Jesus, bungkusna alu uis linen, tamana ka rempah-rempah ku je,+ bagi kebiasan penguburen kalak Jahudi.
41 I deher ingan Jesus ihukum mate* e, lit sada taman, bas taman e lit sada kuburen si mbaru.+ Lenga pernah lit kalak mate si itamaken ku bas kuburen e.
42 Perban wari e wari Persikapen+ kalak Jahudi, janah kuburen e pe ndeher, emaka tamaken kalak e mayat Jesus ku je.
Cataten i teruh
^ Ntah “kayu.”
^ Ntah “kayu.”
^ Ntah “bage pe makuken kam i tiang?”
^ Bas jaman Jesus, enda jam si peenemken. Perhitungen waktu e imulai sanga terbit matawari.
^ Ntah “kayu.”
^ Ntah “kayu.”
^ Ntah “kayu.”
^ Ntah “kayu.”
^ Ntah “kayu.”
^ Ntah “ihancurken.”
^ Ntah banci saja “sada gulung.”
^ Ntah “ipakuken i tiang.”
