Johanes 2:1-25
2 Bas wari si peteluken, lit pesta perjabun bas Kana i Galilea, janah mamak Jesus sangana i je.
2 Jesus ras murid-muridna pe iundang ku pesta e.
3 Sanga enggo nandangi keri lau anggur, nina mamak Jesus man Jesus, “Enggo keri lau anggur kalak enda.”
4 Tapi nina Jesus, “O Mak, urusenta kin e? Lenga kap seh waktuku.”
5 Tapi nina mamak Jesus man pelayan-pelayan si lit i je, “Lakoken saja kai nina.”
6 I je lit enem kudin si iban arah batu nari guna pembersihen diri bagi si biasana ilakoken kalak Jahudi.+ Tiap kudin isina banci kira-kira 44 liter seh ku 66 liter* buena.
7 Nina Jesus, “Isilah kudin e alu lau.” Emaka isi kalak e ngayak dem.
8 Nina Jesus ka man kalak e, “Gundari, buatlah sitik isi kudin e, jenari baba man ketua pesta e.” Emaka lakoken kalak e.
9 Nanami ketua pesta e lau si enggo berubah jadi anggur. La tehna ja nari rehna, tapi pelayan-pelayan si mabasa e tehna kerna si e. Emaka dilo ketua pesta e penganten si dilaki,
10 janah nina, “Biasana anggur si mehulina nge leben bagiken kalak, kenca mabuk tamu-tamu e, emaka ibagiken anggur si biasa. Tapi kam seh asa gundari lit denga simpanndu anggur si mehuli.”
11 Enda me mukjizat si pertama ban Jesus bas Kana i Galilea. Alu bage teridah kemulianna+ janah murid-muridna pe erkiniteken man bana.
12 Kenca si e, lawes Jesus ku Kapernaum+ ras mamakna, senina-seninana,+ bage pe murid-muridna. Tapi piga-piga wari ngenca kalak e i je.
13 Gundari enggo ndeher Perayan Paskah+ kalak Jahudi, emaka lawes Jesus ku Jerusalem.
14 Bas rumah pertoton, dapeti Jesus kalak si erbinaga lembu, biri-biri, ras merpati.+ I je lit ka kalak si kundul si dahinna nukari sen.
15 Kenca ban Jesus cambuk arah nali nari, pelawesna kerina kalak si erbinaga biri-biri ras lembu bas rumah pertoton e. Tunggalingkenna ka meja-meja kalak si nukari sen seh ngasa merap kerina sen logamna e.+
16 Nina Jesus man kalak si erbinaga merpati, “Angkat ndarat kerina barangndu e! Ula nai ban rumah Bapakku jadi ingan erbinaga!”+
17 Ngidah si e, inget murid-murid me ayat si ngataken, “Semangatku man rumahNdu bagi api si gurlah bas pusuhku.”+
18 Perban si e, nina kalak Jahudi man bana, “Mukjizat kai si banci cidahkenndu man kami+ guna mbuktiken maka lit hakndu ngelakoken si e kerina?”
19 Nina Jesus, “Runtuhkenlah rumah pertoton enda, bas telu wari kubangun ka pagi mulihi.”+
20 Ngaloi kalak Jahudi e, “Rumah pertoton enda ibangun 46 tahun dekahna, tapi bangunndu atendu bas telu wari?”
21 Situhuna, rumah pertoton si imaksud Jesus eme dagingna.+
22 Kenca Jesus ipekeke arah si mate nari, inget murid-muridna maka rusur katakenna kerna si e.+ Emaka tek murid-murid man ayat si tertulis bage pe kai si kataken Jesus.
23 Sanga Jesus i Jerusalem denga, sanga Perayan Paskah, enterem kalak erkiniteken man bana perban erbage-bage mukjizat si ibanna.
24 Tapi Jesus la tek man kalak e, perban tehna sipat-sipat manusia.
25 Jesus labo perlu ise pe guna mpebetehken kerna manusia, perban teh Jesus nge isi pusuh manusia.+
