Johanes 20:1-31
20 Pagi-pagi si lampas bas wari pertama minggu e, lawes Maria Magdalena ku kuburen Jesus.+ Paksa si e, lenga terang wari. Kenca seh i kuburen, idahna batu si nutup kuburen e enggo igulingken.+
2 Emaka kiam ia ndahi Simon Petrus bage pe murid si deban si ikelengi Jesus,+ janah nina, “Enggo buat kalak mayat Tuan bas kuburen nari+ janah la teh kami i ja ia tamakenna.”
3 Emaka lawes Petrus ras murid e ku kuburen.
4 Kiam ia duana, tapi murid si deban e pedasen asangken Petrus, emaka leben ia seh ku kuburen.
5 Sanga nungkuk ia ngenen ku bas kuburen, idahna uis linen ampar i je,+ tapi la ia masuk ku bas.
6 Dungna seh ka me Simon Petrus, jenari masuk ia ku bas kuburen. Idahna uis linen ampar i je.
7 Uis si ibalutken ku takal Jesus igulung tapi la ersada ras uis si mbaluti mayatna.
8 Jenari murid si deban si leben ndai seh ku kuburen e, masuk ka ia ku bas. Kenca idahna, tek ia.
9 Tapi lenga angka kalak e ayat si ngataken maka Jesus ipekeke pagi arah si mate nari.+
10 Emaka mulih murid-murid e ku rumahna.
11 Tapi Maria tedis denga i deher kuburen janah tangis. Janahna tangis, nungkuk ia ngenen ku bas kuburen,
12 idahna dua malekat+ si make uis mbentar, sangana kundul bas ingan mayat Jesus iamparken, sekalak arah ingan takalna, sekalak nari arah ingan nahena.
13 Sungkun malekat-malekat e Maria, “Engkai maka tangis kam?” Nina Maria, “Lit si muat mayat Tuanku, janah la kuteh i ja banna.”
14 Kenca bage nina, tulihkenna janah idahna Jesus tedis i je, tapi la tehna maka Jesus si idahna e.+
15 Nina Jesus man bana, “Engkai maka kam tangis? Ise si daramindu?” Perban akap Maria dilaki e tukang kebun, nina Maria, “O Pa, adi kam kin si muat mayatna, kataken min man bangku i ja tamakenndu, gelah kulegi ku je.”
16 Nina Jesus man bana, “O Maria!” Tulihken Maria, jenari ngaloi ia bas bahasa Heber, “Rabuni!” (si ertina “Guru!”)
17 Nina Jesus, “Ula tagangindu aku lalap, perban lenga bo kudahi Bapak. Laweslah, jumpailah senina-seninaku+ janah kataken man kalak e, ‘Lawes me aku ndahi Bapakku+ bage pe Bapak kena, ndahi Dibataku+ bage pe Dibata kena.’”
18 Emaka lawes Maria Magdalena janah katakenna man murid-murid, “Enggo kuidah Tuan!” Jenari, ceritakenna man kalak e kerna kai si enggo kataken Jesus man bana.+
19 Sanga berngi, bas wari pertama bas minggu e, pulung murid-murid janah kuncina pintu-pintu perban mbiar kalak e man kalak Jahudi. Jenari reh Jesus, tedis i tengah-tengah kalak e, nina, “Mbera lit kedamen bas kena.”+
20 Kenca bage nina, cidahkenna duana tanna ras tulan rangrangna.+ Meriah kel ukur murid-murid ngidah Tuan.+
21 Nina Jesus ka, “Mbera lit kedamen bas kena.+ Aku enggo isuruh Bapak,+ emaka kusuruh ka kena.”+
22 Kenca bage nina, embusken Jesus kesahna man murid-murid e, jenari nina, “Alokenlah kesah si badia.+
23 Adi ampuni kena dosa kalak, dosana e iampuni; adi la ampuni kena dosana, dosana e la iampuni.”
24 Tomas,+ sekalak arah murid-murid si 12 e, si igelari ka si Kembar, la ikut sanga reh Jesus.
25 Nina murid-murid si deban man Tomas, “Enggo idah kami Tuan!” Tapi nina Tomas, “Adi lenga kin kuidah bekas paku bas tanna, adi lenga kin kutamaken jari-jariku ku je, ras adi lenga kin kujemak tulan rangrangna,+ labo aku tek.”
26 Waluh wari kenca si e, pulung ka murid-murid bas rumah, Tomas pe ikut i je. Amin pe pintu enggo ikunci, reh Jesus janah tedis i tengah-tengah kalak e, nina, “Mbera lit kedamen bas kena.”+
27 Jenari nina Jesus man Tomas, “Tamaken jari-jarindu ku jenda, nenlah tanku, janah jemaklah tulan rangrangku. Ula nai kam ragu, tapi teklah.”
28 Nina Tomas man bana, “O Tuanku ras Dibataku!”*
29 Nina Jesus man bana, “Perban idahndu nge aku maka kam enggo tek? Ermeriah ukurlah kalak si tek amin pe lenga idahna.”
30 Melala denga mukjizat si ban Jesus i lebe-lebe murid-murid, tapi la itulisken bas gulungen enda.+
31 Tapi si enda itulisken gelah tek kena maka Jesus kap Kristus, Anak Dibata. Alu bage, banci aloken kena kegeluhen arah gelarna.+
Cataten i teruh
^ Jesus ikataken Dibata perban ia si mpeseh kata Jahwe ntah pe jadi wakilNa.
