Johanes 21:1-25
21 Kenca si e, cidahken Jesus ka dirina sekali nari man murid-muridna i Laut Tiberias. Enda me si terjadi sanga cidahkenna bana.
2 Pulung me Simon Petrus, Tomas (si igelari si Kembar),+ Natanael+ arah Kana i Galilea, anak-anak Sebedeus,+ bage pe dua kalak nari murid-murid Jesus si deban.
3 Nina Simon Petrus man kalak e, “Lawes ateku njala ikan.” Ngaloi kalak e, “Ikut ate kami.” Emaka berkat kalak e, nangkihina sada perahu. Tapi bas berngi e, kai pe la lit dat kalak e.+
4 Sanga nandangi terang wari, tedis Jesus i pantai, tapi la teh murid-murid maka ia Jesus.+
5 Emaka nina Jesus man kalak e, “O anak-anak, lit kang dat kena si man pangan?”* Nina kalak e, “La lit.”
6 Emaka nina Jesus man kalak e, “Amburken jala kena ku sebelah kanan perahu e, pasti lit kari dat kena.” Amburken kalak e jalana, jenari lanai kalak e ngasup nariksa perban melala kel ikan i bas.+
7 Kenca si e, ngerana murid si ikelengi Jesus+ man Petrus, “Tuan kap ah!” Kenca begi Simon Petrus maka Tuan kap si tedis i tepi pantai e, pakena uisna si arah darat perban ndai enggo bukana, jenari lompat ia ku laut.
8 Tapi murid-murid si deban pe reh ndahi ia naik perahu si kitik janahna narik jala si enggo dem ikan, perban kalak e lanai ndauh arah pantai, dauhna kira-kira 90 meter* ngenca.
9 Kenca seh i pantai, idah kalak e lit roti ras ikan si sangana ipanggang i datas rara api.
10 Nina Jesus man kalak e, “Baba ku jenda piga-piga ikan si tangkap kena e.”
11 Emaka nangkihi Simon Petrus perahu e, jenari tarikna jala e ku darat. Dem ikan si galang-galang bas jala e, buena 153 ekor. Amin pe bage buena, la merigat jala e.
12 Nina Jesus, “Iah manken kena.” La lit sada pe murid-murid e si pang nungkun, “Ise kam?” Sebap teh kalak e nge maka Tuan kap ia.
13 Emaka buat Jesus roti, jenari berekenna man kalak e. Ikan e pe berekenna ka.
14 Enda me petelu kaliken+ cidahken Jesus dirina man murid-murid kenca ia ipekeke arah si mate nari.
15 Kenca dung kalak e man erpagi-pagi e, sungkun Jesus me Simon Petrus, “O Simon anak Johanes, kelengen nge atendu aku asangken kerina enda?” Nina, “O Tuan, nggom tehndu keleng ateku kam.” Nina Jesus man bana, “Bere manlah anak biri-biriku.”+
16 Sungkunna ka ia pedua kaliken, “O Simon anak Johanes, keleng nge atendu aku?” Nina, “Ue Tuan, nggom tehndu keleng ateku kam.” Nina Jesus man bana, “Permakanilah biri-biriku si kitik.”+
17 Petelu kaliken sungkun Jesus ka Simon Petrus nina, “O Simon anak Johanes, keleng nge atendu aku?” Getem kel pusuh Petrus perban enggo telu kali sungkuni Jesus ia, “Keleng nge atendu aku?” Emaka nina Simon Petrus, “O Tuan, kai pe tehndu kap. Tehndu nge keleng ateku kam.” Nina Jesus man bana, “Bere manlah biri-biriku si kitik.+
18 Situhuna kukataken man bandu: Sanga kam nguda denga, kam kap si makeken uisndu, janah banci kam lawes ku japa pe atendu. Tapi kenca metua, dudurkenndu tanndu janah kalak si deban si makeken uisndu, jenari babana kam ku ingan si la atendu bage.”
19 Katakenna bage guna ncidahken uga pagi permate Petrus, guna kemulian Dibata. Kenca ngataken si e, nina Jesus, “Teruslah ikutken aku.”+
20 Tulihken Petrus janah idahna murid si kelengi Jesus+ ngikutken kalak e, eme murid si kundul rembak ras Jesus* sanga kalak e man berngi ras si nungkun, “Ise nge si erhianat atena man bandu, Tuan?”
21 Sanga idah Petrus murid e, sungkunna Jesus, “O Tuan, uga kerna ia?”
22 Nina Jesus, “Adi tetap ateku ia nggeluh ngayak aku reh mulihken, man kai kin ukurindu e? Tapi kam, teruslah ikutken aku.”
23 Emaka terbegi me berita i tengah-tengah pengikut Jesus maka murid si kelengina e labo pagi mate. Padahal labo bage nina Jesus, tapi nina, “Adi tetap ateku ia nggeluh ngayak aku reh mulihken, man kai kin ukurindu e?”
24 Ia me murid+ si ersaksi janah si nulisken kerna si enda, janah siteh maka kesaksinna e benar.
25 Situhuna, melala denga si lakoken Jesus. Adi kerina itulisken sada-sadai, kuakap la siat doni enda ingan gulungen-gulungen si itulisken e.+
