Johanes 3:1-36
3 Lit sekalak Parisi gelarna Nikodemus.+ Ia peminpin kalak Jahudi.
2 Bas sada berngi dahina Jesus,+ nina, “O Rabbi,+ teh kami maka kam me guru si suruh Dibata. Sebap ise pe labo banci erban mukjizat-mukjizat+ bagi si banndu e, adi la kin Dibata ras ia.”+
3 Ngaloi Jesus, “Situhuna kukataken man bandu, ise pe la banci ngidah Kerajan Dibata+ adi la kin ia lahir mulihi.”+
4 Nina Nikodemus, “Banci kin kalak si enggo galang lahir mulihi? Me labo ia banci masuk ku rahim mamakna janah ilahirken mulihi?”
5 Nina Jesus, “Situhuna kukataken bandu, ise pe la banci masuk ku bas Kerajan Dibata adi la kin ia lahir arah lau+ ras kesah si badia.+
6 Si ilahirken arah manusia eme manusia, janah si ilahirken arah kesah si badia eme anak Dibata.
7 Emaka ula ate kena mamang adi kukataken: Kena arus ilahirken mulihi.
8 Ku ja ate angin rembus, ku je me ia, janah begindu sorana. Tapi la tehndu i ja nari rehna ntah ku ja perlawesna. Bage ka me tiap kalak si ilahirken arah kesah si badia.”+
9 Nungkun ka Nikodemus, “Uga si e banci terjadi?”
10 Nina Jesus, “Kam guru kalak Israel kap, engkai maka la tehndu?
11 Situhuna kukataken man bandu, kami ngerana kerna kai si teh kami, janah beritaken kami kerna kai si enggo idah kami. Tapi la aloken kena kai si beritaken kami e.
12 Adi kerna doni saja pe si kuceritaken la kena tek, uga ka kena banci tek adi kuceritaken kerna surga?
13 Ise pe labo pernah nangkih ku surga,+ tapi Anak manusia nusur arah surga nari.+
14 Bagi Musa sanga i taneh mesawang,*+ peganjangna nipe i tiang, bage ka me Anak manusia arus ipeganjang,+
15 gelah kerina kalak si tek man bana banci ndatken kegeluhen si rasa lalap.+
16 “Perban keleng kel ate Dibata doni enda, emaka berekenNa AnakNa si tonggal,+ gelah ise pe si erkiniteken man bana la ikernepken tapi ndatken kegeluhen si rasa lalap.+
17 Suruh Dibata AnakNa ku doni enda labo guna ngakimi doni, tapi gelah doni enda iselamatken arah ia.+
18 Ise pe si erkiniteken man bana labo ihakimi.+ Tapi ise pe si la erkiniteken enggo ihakimi, perban la ia erkiniteken man gelar Anak Dibata si tonggal.+
19 Enda me alasenna kalak e ihakimi: terang enggo reh ku doni enda,+ tapi ngenan ate manusia man kegelapen asangken terang, perban jahat perbahanenna.
20 Ise pe si rusur ngelakoken kai si jahat, segat atena man terang, janah la dahina terang gelah ula tereteh perbahanenna e.
21 Tapi ise pe si ngelakoken kai si benar, dahina terang e,+ gelah teridah maka perbahanenna cocok ras peraten Dibata.”
22 Kenca si e, lawes Jesus ras murid-muridna ku kuta-kuta i Judea. Tading ia i je ras murid-muridna piga-piga waktu dekahna janah peridikenna kalak.+
23 Tapi Johanes pe peridikenna kalak i Ainon deher Salim, sebap i je melala lau.+ Enterem kalak rehen ndahi ia janah iperidiken.+
24 Sanga si e, Johanes lenga ipenjaraken.+
25 Bas sada waktu, piga-piga murid Johanes sijawapen ras sekalak Jahudi kerna acara pembersihen diri.
26 Emaka dahi murid-murid Johanes me Johanes, nina, “O Guru,* dilaki si ras kam i sebrang Lau Jordan, si ceritakenndu kerna ia,+ gundari peridikenna kalak janah kerina kalak ndahi ia.”
27 Nina Johanes, “Kai pe labo dat kalak adi la kin Dibata si meresa man bana.
28 Kena kap si jadi saksi maka pernah kukataken, ‘Aku labo Kristus,+ tapi aku isuruh leben asangken ia.’+
29 Penganten si dilaki kap mpuna penganten si diberu.+ Meriah me ukur teman penganten si dilaki sanga tedis i deher penganten si dilaki janah begina sorana. Bage me aku, keriahen ukurku la kurang kai pe.
30 Kai si lakokenna reh buena, tapi kai si kulakoken reh sitikna.”
31 Si reh arah datas nari,+ belinen asangken ise pe. Si reh arah doni nari, rehna arah doni nari, janah cakapkenna kerna kai si lit bas doni. Si reh arah surga nari belinen asangken ise pe.+
32 Beritakenna kerna kai si enggo idahna ras kai si enggo begina,+ tapi ise pe la ngaloken beritana.+
33 Ise pe si ngaloken beritana e, akuina* maka benar kap Dibata.+
34 Kalak si isuruh Dibata kap si mpeseh kata Dibata,+ perban bereken Dibata seh kel buena kesah si badia man bana.
35 Keleng ate Bapak man AnakNa,+ janah enggo berekenNa kerina ku bas tanna.+
36 Ise pe si erkiniteken man Anak, ndatken kegeluhen si rasa lalap pagi.+ Ise pe si la patuh man Anak, labo ndatken kegeluhen,+ tapi rawa Dibata lalap lit bas ia.+
