Johanes 4:1-54
4 Enggo begi kalak Parisi maka teremen dat Jesus murid-murid ras teremen si peridikenna+ asangken Johanes. Sanga teh Tuan Jesus kerna si e,
2 (situhuna labo Jesus si mperidikenca tapi murid-muridna nge)
3 lawes ia Judea nari janah berkat ku Galilea.
4 Tapi arus lewatina Samaria.
5 Seh Jesus bas sada kota i Samaria si igelari Sihar. Kota e ndeher ras taneh si enggo bereken Jakup man Jusup, anakna.+
6 I je lit sumur Jakup.+ Perban latih kel akap Jesus bas perdalanen, kundul ia i tepi sumur e. Sanga si e, kira-kira jam 12 ciger.*
7 Reh sekalak diberu Samaria guna muat lau. Nina Jesus man bana, “Enta ge sitik lau ena gelah kuinem.”
8 (Sanga si e, murid-muridna sangana nukur pangan ku kota.)
9 Ngaloi diberu e, “Kam me kalak Jahudi, aku kalak Samaria. Engkai maka pindondu lau inemen man bangku?” (Biasana kalak Jahudi la nggit erteman ras kalak Samaria.)+
10 Nina Jesus, “Adi tehndu kerna pemere Dibata,+ janah adi tandaindu ise si mindo lau inemen e man bandu, pasti pindondu man bana lau, jenari berekenna man bandu lau kegeluhen.”+
11 Ngaloi diberu e, “O Pa, mbages kap sumur enda, timbandu pe la lit. I ja nari banci buatndu lau kegeluhen?
12 Nini bulang kami, Jakup, enggo mereken sumur enda man kami. Ia, anak-anakna, ras asuh-asuhenna pe minem jenda nari. Me labo kam belinen asangken ia?”
13 Nina Jesus, “Ise pe si nginem lau enda, muas denga nge.
14 Tapi ise pe si nginem lau si kubereken man bana, lanai pagi pernah muas.+ Lau si kubereken e jadi sumber lau bas dirina si mereken kegeluhen si rasa lalap.”+
15 Ngaloi diberu e, “O Pa, bereken min lau e man bangku, gelah lanai aku muas janah la perlu aku mulih-ulih ku jenda muat lau.”
16 Nina Jesus, “To legi dilakindu, baba ia ku jenda.”
17 Ngaloi diberu e, “La kap lit dilakiku.” Nina Jesus, “Payo katandu ena, la lit dilakindu.
18 Sebap enggo lima kali kam erjabu, janah dilaki si ras kam gundari e labo dilakindu. Payo si katakenndu ena.”
19 Ngaloi diberu e, “O Pa, kam pasti sekalak nabi.+
20 Nini bulang kami nembah Dibata i datas gunung enda, tapi ning kena i Jerusalem ngenca ingan nembah Dibata.”+
21 Nina Jesus ka, “Teklah man bangku. Seh pagi waktuna lanai kena nembah Dibata datas gunung enda bage pe i Jerusalem.
22 La tandai kena ise si sembah kena.+ Kami tandai kami ise si sembah kami, sebap keselamaten tangtangna reh arah kalak Jahudi nari.+
23 Tapi reh me waktuna, janah situhuna gundari pe enggo seh waktuna, kalak si nembah Bapak alu cara si benar nembah Ia pagi alu kesah si badia ras kebenaren. Sebap, Bapak sangana ndarami kalak si nembah Ia alu cara si bage.+
24 Dibata e la banci siidah* janah Ia i surga,+ kalak si nembah Ia arus nembah Ia alu penegu-negu kesah si badia ras kebenaren.”+
25 Ngaloi diberu e, “Kuteh maka Mesias si igelari Kristus nandangi reh. Adi enggo reh pagi ia, jelaskenna man kami kerinana alu jelas.”
26 Nina Jesus, “Aku kap ia, si sangana ngerana ras kam.”+
27 Sanga si e, reh murid-muridna, sengget kel kalak e ngidah Jesus ngerana ras sekalak diberu. Tapi, sada pe kalak e la nungkun man Jesus engkai maka ia ngerana ras diberu e janah kai perluna ras diberu e.
28 Emaka tadingken diberu e ingan launa ndai, jenari lawes ia ku kota janah nina man kalak si lit i je,
29 “Ota sinen dilaki si enggo ngataken kerina si enggo pernah kulakoken. Banci saja ia kap Kristus e!”
30 Emaka ndarat kalak e arah kota janah dahina Jesus.
31 Sanga si e, iahken murid-muridna ia man, nina, “O Guru,*+ manken.”
32 Tapi nina Jesus, “Lit kap panganku si la teh kena.”
33 Sisungkun-sungkunen murid-murid e, “Me labo lit kalak si naruhken pangan man bana?”
34 Ngaloi Jesus, “Panganku eme ngelakoken peraten Ia si nuruh aku,+ janah ndungi dahin si berekenNa man bangku.+
35 Ning kena musim rani empat bulan nari. Tapi ningku: Nenlah juma-juma enggo megersing* janah enggo banci iperani.+
36 Kalak si rani enggo ngaloken upahna janah sangana pepulungna hasil peranin guna kegeluhen si rasa lalap, alu bage kalak si nuan ras kalak si rani radu ras ermeriah ukur.+
37 Tuhu kap kata-kata enda: Lit si nuan, lit ka si mperanisa.
38 Kusuruh kena mperani kai si labo dahiken kena. Kalak si deban si enggo latih erdahin, tapi kena si ngaloken hasilna.”
39 Enterem kalak Samaria bas kota e erkiniteken man Jesus perban nina diberu e, “Ceritakenna man bangku kerina si enggo pernah kulakoken.”+
40 Emaka kenca jumpa kalak Samaria e ras Jesus, pindokenna gelah tading Jesus ras kalak e. Tading Jesus dua wari dekahna i je.
41 Hasilna, reh teremna kalak si tek kenca megi kai si katakenna.
42 Jenari nina kalak e man diberu e, “Gundari enggo tek kami, labo perban kai si katakenndu saja, tapi perban enggo begiken kami si ajarkenna, janah teh kami maka dilaki enda kap si jadi juru selamat man doni.”+
43 Kenca dua wari i je, berkat Jesus ku Galilea.
44 Enggo pernah kataken Jesus, “Sekalak nabi labo ihamati bas kutana.”+
45 Tapi kenca seh Jesus i Galilea, alo-alo kalak Galilea ia, perban enggo idah kalak e kerina si lakoken Jesus sanga perayan i Jerusalem,+ sebap kalak e pe ikut ku perayan e.+
46 Jenari mulihken Jesus ku Kana si lit i Galilea, i je pernah ubahna lau jadi anggur.+ I je lit sekalak pegawai raja, anakna si dilaki sangana sakit i Kapernaum.
47 Sanga begina Jesus enggo reh Judea nari ku Galilea, jumpaina Jesus, pindokenna gelah reh Jesus guna mpepalem anakna si menam mate e.
48 Tapi ngaloi Jesus, “Adi lenga idah kena tanda-tanda si luar biasa ras mukjizat-mukjizat, pasti labo kena tek.”+
49 Ngaloi pegawai raja e, “O Tuan, rehlah kam ope lenga mate anakku.”
50 Nina Jesus, “To mulihlah kam, enggo malem anakndu e.”+ Tek dilaki e man kai si kataken Jesus, emaka lawes ia.
51 Sanga bas perdalanen, jumpai budak-budakna ia guna ngataken maka anakna ndai enggo malem.
52 Sungkunna budak-budakna e jam piga anakna e malem. Nina kalak e, “Nderbih kira-kira jam sada ciger* enggo malem demamna.”
53 Inget bapak anak e maka pas bas jam e kataken Jesus, “Enggo malem anakndu e.”+ Emaka ia ras kerina keluargana tek man Jesus.
54 Enda me mukjizat si peduaken+ si ban Jesus sanga ia reh arah Judea ku Galilea.
Cataten i teruh
^ Bas jaman Jesus, enda jam si peenemken. Perhitungen waktu e imulai sanga terbit matawari.
^ As. “Rabbi.”
^ As. “mbentar.”
^ Bas jaman Jesus, enda jam si pepituken. Perhitungen waktu e imulai sanga terbit matawari.
