Johanes 5:1-47
5 Kenca si e, lit perayan+ kalak Jahudi, emaka lawes Jesus ku Jerusalem.
2 Bas Jerusalem, i deher pintu Gerbang Biri-Biri,+ lit sada kolam si igelari Betesda bas bahasa Heber. Kolam e lit lima serambina.*
3 Enterem kalak si sakit, pentang, pincang, ras lumpuh bas serambi e.
4 * ——
5 I je lit sekalak dilaki si enggo sakit 38 tahun dekahna.
6 Idah Jesus ia ampar i je janah tehna maka enggo ndekah ia sakit. Emaka sungkun Jesus ia, “Nggit nge kam malem?”+
7 Ngaloi dilaki si penakiten e, “O Pak, la lit kalak si namaken aku ku bas kolam e sanga erburak* launa. Masuk kenca ateku ku bas, mis lebei kalak.”
8 Nina Jesus man bana, “Tedisken! Angkat amakndu,* jenari erdalanlah.”+
9 Sanga si e mis ia malem. Angkatna amakna* jenari erdalan ia.
Wari e wari Sabat.
10 Emaka nina kalak Jahudi man dilaki si enggo ipepalem e, “Wari Sabat kap gundari. La banci angkatndu amakndu.”*+
11 Ngaloi dilaki e, “Nina kalak si mpepalem aku ndai, ‘Angkat amakndu, jenari erdalanlah.’”
12 Nungkun kalak e, “Ise si nuruhsa kam ngangkat amak e ras erdalan?”
13 Tapi la tandai dilaki e ise si mpepalem ia, perban Jesus enggo lawes arah tengah-tengah jelma si enterem si lit i je.
14 Kenca si e, jumpa Jesus ras dilaki e i rumah pertoton. Nina Jesus man bana, “Gundari enggo malem kam. Ula nai ban dosa, gelah la terjadi si la mehuli man bandu.”
15 Jenari lawes dilaki e. Katakenna man kalak Jahudi maka Jesus kap si mpepalem ia.
16 Emaka, itentang kalak Jahudi Jesus perban lakokenna si e bas wari Sabat.
17 Tapi nina Jesus man kalak e, “Bapakku terus erdahin ngayak gundari, emaka aku pe terus erdahin.”+
18 Megi si e, reh gegehna kalak Jahudi ndarami cara guna munuh Jesus, sebap akap kalak Jahudi maka labo saja wari Sabat si ilanggarna, tapi peserina ka bana ras Dibata+ alu ngataken Dibata e Bapakna.+
19 Emaka nina Jesus man kalak Jahudi e, “Situhuna kukataken man kena, kai pe labo banci lakoken Anak menurut peratenna saja. Tapi kai si idahna ban Bapakna, e nge si banna.+ Kai pe si lakoken Bapak, bage kang nge si lakoken Anak alu cara si seri.
20 Sebap keleng ate Bapak man Anak,+ janah cidahkenNa kerina man Anak e kai si lakokenNa. CidahkenNa ka pagi perbahanen-perbahanen si belinen asangken si enda man bana gelah kena takjup.+
21 Bagi Bapak enggo mpekeke kalak si mate, jenari berekenNa kegeluhen man bana,+ bage ka me Anak, pegeluhna pagi ise pe si atena pegeluhna.+
22 Ise pe labo hakimi Bapak, tapi berekenNa kuasa man Anak guna ngakimi,+
23 gelah kerina kalak mehamat man Anak e, bagi mehamat man Bapak. Ise pe si la mehamat man Anak, la mehamat man Bapak si nuruh ia.+
24 Situhuna kukataken man kena, ise pe si megiken kataku enda janah tek man Dibata si nuruh aku, datna pagi kegeluhen si rasa lalap+ janah labo ia ihakimi. Ia bagi kalak si enggo mate tapi gundari enggo nggeluh mulihi.+
25 “Situhuna kukataken man kena, reh pagi waktuna janah gundari waktuna e enggo seh, begi kalak si mate pagi sora Anak Dibata e, janah ise pe si megi ras patuh man bana, nggeluh me ia.
26 Lit kuasa Bapak mereken kegeluhen,+ janah berekenNa ka kuasa si bage man Anak.+
27 Bereken Bapak ka kuasa man bana guna ngakimi,+ sebap ia Anak manusia.+
28 Ula atendu mamang kerna si enda, sebap reh me waktuna maka kerina kalak si lit bas kuburen megi sorana pagi,+
29 jenari ndarat. Kalak si mehuli perbahanenna ipekeke guna nggeluh si rasa lalap, tapi kalak si jahat perbahanenna ipekeke guna ihakimi.+
30 Kai pe labo banci kulakoken menurut peratenku saja. Kuhakimi kalak menurut kai si kataken Bapak, janah penghakimenku adil+ perban la kuhakimi kalak menurut peratenku tapi menurut peraten Ia si nuruh aku.+
31 “Adi aku ngenca si mere kesaksin kerna diriku, la kap benar kesaksinku e.+
32 Lit kap si deban si ngataken kerna aku, janah kuteh maka si katakenNa kerna aku e benar.+
33 Enggo suruh kena kalak njumpai Johanes, janah enggo kataken Johanes kerna kebenaren.+
34 Situhuna, la kuperluken manusia guna njelasken kerna aku, tapi kukataken si enda gelah kena kerina iselamatken.
35 Johanes bali kap ras lampu si nggeluh janah ersinar. Bas waktu si ntisik, merhat kena ngaloken terangna e.+
36 Tapi bas aku lit berita si belinen asangken berita Johanes, eme pendahin si ibereken Bapak man bangku gelah kudungi, pendahin e kap si sangana kulakoken. Dahin e me si jadi bukti maka aku isuruh Bapak.+
37 Bapak si nuruh aku e pe enggo ersaksi kerna aku.+ Lenga pernah begi kena soraNa ntah pe idah kena ayoNa,+
38 janah kataNa la lit bas pusuh kena perban la kena tek man kalak si suruhNa e.
39 “Pelajari kena Kitap si Badia alu mbages,+ perban akap kena alu bage banci dat kena kegeluhen si rasa lalap. Situhuna, ayat-ayat Kitap si Badia e nge si ngataken kerna aku.+
40 Tapi la kena nggit ndahi aku+ guna ngaloken kegeluhen e.
41 La kuarapken kemulian arah manusia,
42 tapi kuteh maka labo lit kekelengen kena man Dibata.
43 Reh aku bas gelar Bapakku, tapi la aloken kena aku. Adi kalak si deban si reh bas gelarna sendiri, aloken kena ia.
44 Uga kena banci tek man bangku adi meriah kap kena ngaloken kemulian arah manusia ras muliaken kena ka manusia, janah la usahaken kena ndarami kemulian si rehna arah Dibata si tonggal?+
45 Ula akap kena aku si nuduh kena i lebe-lebe Bapak. Tapi si nuduh kena eme Musa,+ si man bana kena erpengarapen.
46 Situhuna, adi tek kin kena man Musa, arusna tek ka nge kena man bangku, sebap Musa e nge si nulisken kerna aku.+
47 Tapi adi la kena tek man kai si tulisna, uga kena banci tek man kai si kukataken?”
Cataten i teruh
^ Ntah “lorongna.”
^ Ntah “berguncang.”
^ Ntah “ingan medemndu.”
^ Ntah “ingan medemna.”
^ Ntah “ingan medemndu.”
