Johanes 7:1-52
7 Kenca si e, erdalan Jesus arah sada ingan ku ingan si debanna i Galilea. La ia nggit lawes ku Judea perban kalak Jahudi sangana ndarami kesempaten guna munuh ia.+
2 Tapi sanga si e, lanai ndekah Perayan Sapo-Sapo.+
3 Emaka nina senina-seninana,*+ “Tadingkenlah ingan enda janah laweslah ku Judea, gelah murid-muridndu pe ngidah dahin si lakokenndu.
4 Sebap labo lit kalak erbuni-buni erdahin adi atena jadi kalak terkenal. Perban dahin si bage nge si lakokenndu, cidahkenlah bandu man doni.”
5 Situhuna senina-seninana la erkiniteken man bana.+
6 Emaka nina Jesus, “Waktuku lenga seh.+ Tapi kena katawari pe banci.
7 La lit alasen doni enda rate segat man kena, tapi doni rate segat man bangku perban kupebetehken maka perbahanen doni jahat.+
8 To lawes saja kena ku perayan e. Aku lenga ku jah perban lenga seh waktuku.”+
9 Kenca bage nina, tetap Jesus tading i Galilea.
10 Kenca lawes senina-seninana ku perayan e, Jesus pe lawes ku je alu erbuni-buni.
11 Emaka darami kalak Jahudi ia bas perayan e janah nina, “I ja dilaki e?”
12 Enterem kalak erkusik-kusik kerna Jesus. Lit si ngataken, “Ia kalak bujur.” Lit ka si ngataken, “Lang, tipuna jelma si enterem.”+
13 Tapi la lit si pang terang-terangen ncakapken Jesus perban mbiar man kalak Jahudi.+
14 Kenca setengah acara perayan e erdalan, masuk Jesus ku rumah pertoton jenari mulai ia ngajar.
15 Mamang ate kalak Jahudi janah nina, “I ja nari nge pemetehna kerna Kitap si Badia+ adi labo ia pernah sekolah agama?”+
16 Ngaloi Jesus, “Kai si kuajarken labo ajarenku, tapi ajaren Ia si nuruh aku.+
17 Kalak si nggit ndalanken peraten Dibata pasti tehna si kuajarken e arah Dibata nari+ ntah arah aku.
18 Ise pe si ngerana menurut perukurenna sendiri, usahakenna kap gelah ia imuliaken. Tapi ise pe si imuliakenna si nuruh ia,+ kalak benar kap ia janah la lit si palsu bas ia.
19 La kin bereken Musa Undang-Undang man kena?+ Tapi sada pe la patuhi kena. Engkai maka bunuh kena ate kena aku?”+
20 Ngaloi kalak si enterem e, “Rasuki malekat jahat kap kam e. Ise kin si atena munuh kam?”
21 Nina Jesus, “Sada si kulakoken, kemamangen kena kerina.
22 Perban bereken Musa perentah kerna sunat,+ sunat kena kalak bas wari Sabat. Situhuna perentah e labo arah Musa tapi arah nini bulangna.+
23 Adi lit kalak isunat bas wari Sabat gelah Undang-Undang Musa la ilanggar, engkai maka merawa kel kena sanga kupepalem kalak bas wari Sabat?+
24 Ula nai hakimi kena kalak arah kai si teridah saja. Hakimilah kalak alu adil.”+
25 Jenari nina penduduk Jerusalem, “La kin dilaki enda nge si bunuh penguasa-penguasa kalak Jahudi atena?+
26 Nenlah! Ngerana ia i lebe-lebe jelma si enterem, tapi la lit kai pe nina kalak e. Ntah enggo teh penguasa-penguasa e maka ia Kristus?
27 Siteh kap ja nari asal dilaki enda.+ Tapi, adi reh pagi Kristus, ise pe la meteh ja nari asalna.”
28 Sanga Jesus ngajar bas rumah pertoton, nina, “Tandai kena aku janah teh kena ja nari asalku. Aku reh labo perban sura-suraku.+ Si nuruh aku tuhu-tuhu lit, tapi la tandai kena.+
29 Tapi, kutandai Ia.+ Sebap aku reh jadi wakilNa, janah Ia si nuruh aku.”
30 Usahaken kalak e nangkap Jesus,+ tapi sada pe la banci ngelakokenca, perban lenga seh waktuna.+
31 Amin pe bage, enterem kalak si erkiniteken man bana+ janah nina, “Adi reh pagi Kristus, me melala pagi ibanna mukjizat? La kin e si sangana lakoken dilaki enda?”
32 Begi kalak Parisi jelma si enterem e erkusik-kusik kerna Jesus, emaka suruh imam-imam kepala ras kalak Parisi piga-piga petugas guna nangkap Jesus.
33 Tapi nina Jesus, “Ntisik nari ngenca aku ras kena, kenca bage mulih aku ndahi Ia si nuruh aku.+
34 Darami kena pagi aku, tapi la dat kena, sebap kena la banci reh ku ingan si kudahi e.”+
35 Emaka sisungkun-sungkunen kalak Jahudi e, “Ku ja kin ate dilaki enda lawes, maka la banci sijumpai? Ntah, lawes kin atena ku kalak Jahudi si lit i tengah-tengah kalak Junani ras ngajari kalak Junani?
36 Kai nge maksudna maka nina, ‘Darami kena pagi aku, tapi la dat kena, sebap kena la banci reh ku ingan si kudahi e’?”
37 Bas wari terakhir perayan e,+ eme wari si pentingna, tedis Jesus janah nina, “Ise si muas, rehlah ku aku gelah ia minem.+
38 Ise pe si erkiniteken man bangku, ia bagi si itulisken bas ayat enda, ‘Bas pusuhna nari, maler lau si mereken kegeluhen.’”+
39 Situhuna, si cakapken Jesus eme kerna kesah si badia, si nandangi aloken kalak si erkiniteken man bana. Sanga si e, kesah si badia lenga ibereken,+ sebap Jesus lenga imuliaken.+
40 Megi si e, nina piga-piga jelma si enterem si lit i je, “Tuhu-tuhu kap ia Nabi.”+
41 Deba ngataken, “Ia kap Kristus.”+ Si debanna ka ngataken, “Kristus me labo reh arah Galilea nari?+
42 La kin lit ayat si ngataken maka Kristus e reh arah keturunen Daud+ janah asalna arah Betlehem,+ kuta Daud?”+
43 Erbage-bage pendapat jelma si enterem e kerna ia.
44 Piga-piga kalak tangkapna atena Jesus, tapi sada pe la banci njemak ia.
45 Kenca si e, mulih petugas-petugas ndahi imam-imam kepala ras kalak Parisi. Sungkun kalak e petugas-petugas e, “Engkai maka la baba kena ia ku jenda?”
46 Ngaloi kalak e, “Ise pe lenga pernah ngerana bagi ia.”+
47 Nina kalak Parisi e, “La kin lah kena pe enggo tipuna?
48 Me labo lit penguasa-penguasa ntah pe kalak Parisi si enggo erkiniteken man bana?+
49 Jelma si enterem enda, si la meteh Undang-Undang Musa, labo merga akap Dibata.”
50 Sekalak arah kalak e eme Nikodemus, si pernah njumpai Jesus, nina man kalak e,
51 “Menurut Undang-Undangta, me labo banci sihakimi kalak adi lenga sibegi ras siteh kai si lakokenna?”+
52 Ngaloi kalak e, “La kin lah asalndu pe arah Galilea nari nge? Pelajarilah Kitap si Badia janah tehndu kari maka labo lit nabi si reh arah Galilea nari.”*
Cataten i teruh
^ Ntah “adek-adekna.”
^ Piga-piga tulisen si nai si banci iteki, benekenna ayat 53 seh pasal 8 ayat 11.
