Johanes 8:12-59
8 12 Ngerana ka Jesus man jelma si enterem e, nina, “Aku kap terang doni.+ Ise pe si ngikutken aku, labo pagi ia erdalan bas gelap, tapi alokenna pagi terang+ si mereken kegeluhen.”
13 Ngaloi kalak Parisi, “Kam ngerana kerna dirindu, emaka labo tuhu kesaksinndu e.”
14 Ngaloi Jesus, “Amin pe kerna diriku aku ngerana, tuhu kap si kukataken enda, perban kuteh nge i ja nari aku reh janah ku ja pagi aku lawes.+ Tapi kena, la teh kena ja nari aku reh janah ku ja pagi aku lawes.
15 Hakimi kena kalak menurut perukuren manusia,+ tapi aku, ise pe la kuhakimi.
16 Adi kuhakimi pe kalak, adil kap penghakimenku e, sebap aku labo sisada, tapi Bapak si nuruh aku ras aku kap.+
17 Lit kap tertulis bas Undang-Undang Musa, ‘Kesaksin si benar eme kesaksin arah dua kalak nari.’+
18 Aku ersaksi kerna diriku janah Bapak si nuruh aku pe ersaksi kerna aku.”+
19 Nungkun kalak enda, “I ja kin Bapakndu?” Nina Jesus, “Labo tandai kena aku ntah pe Bapakku.+ Adi tandai kena aku, pasti tandai kena ka nge Bapakku.”+
20 Kerina enda kataken Jesus sanga ia ngajar denga bas rumah pertoton, i deher kotak-kotak persembahen.+ Tapi ise pe la lit si nangkap ia perban lenga seh waktuna.+
21 Nina Jesus ka, “Lawes me aku, janah darami kena pagi aku. Tapi, mate pagi kena bas dosa kena.+ La kena banci reh ku ingan si nandangi kudahi e.”+
22 Emaka nina kalak Jahudi e, “Munuh bana kin atena maka nina, ‘La kena banci reh ku ingan si nandangi kudahi e’?”
23 Nina Jesus, “Asal kena arah teruh nari, tapi asalku arah datas nari.+ Kena reh arah doni enda, tapi aku labo arah doni enda.
24 Perban si e nge maka kukataken man kena, mate pagi kena bas dosa-dosa kena. Adi la kena tek maka aku me kalak si ijanjiken e, mate pagi kena bas dosa-dosa kena.”
25 Jenari nungkun kalak e, “Ise kin kam?” Ngaloi Jesus, “Man kai nari kin aku ngerana ras kena?
26 Melala si arus kukataken kerna kena janah melala si arus kuhakimi. Situhuna, Ia si nuruh aku e benar kap, janah kai si kukataken man doni enda eme si kubegi arah Ia nari.”+
27 La angka kalak e maka si cakapken Jesus eme kerna Bapak.
28 Nina Jesus, “Kenca ipeganjang* kena Anak manusia,+ teh kena me maka aku kalak si ijanjiken e,+ janah kerina si kulakoken enda labo menurut peratenku,+ tapi kerina si kukataken eme si ajarken Bapak man bangku.
29 Si nuruh aku ras aku kap. Labo tadingkenNa aku sisada, perban lalap kulakoken si ngena ateNa.”+
30 Sanga kataken Jesus kerna si e, enterem kalak erkiniteken man bana.
31 Jenari ngerana Jesus man kalak Jahudi si enggo tek man bana, “Adi terus inget kena kai si kuajarken, tuhu-tuhu kena murid-muridku,
32 teh kena me kebenaren e,+ janah kebenaren e si mbebasken kena.”+
33 Ngaloi kalak e, “Kami keturunen Abraham kap janah la pernah kami jadi budak ise pe. Engkai maka nindu ibebasken pagi kami?”
34 Nina Jesus, “Situhuna kukataken man kena, ise pe si erban dosa, budak dosa kap.+
35 Selain si e, sekalak budak labo tetap tading i rumah majikenna seh rasa lalap, tapi sekalak anak tetap tading i je seh rasa lalap.
36 Emaka adi bebasken Anak e kena, kena tuhu-tuhu bebas.
37 Kueteh nge kena keturunen Abraham, tapi tetap usahaken kena munuh aku, perban la aloken kena kai si kuajarken.
38 Kai si kucakapken eme kerna kai si kuidah sanga aku ras Bapakku,+ tapi kena ngelakoken kai si begi kena arah bapak kena.”
39 Ngaloi kalak e, “Bapak kami Abraham kap.” Nina Jesus, “Adi anak-anak Abraham kin kena,+ pasti lakoken kena kai si lakoken Abraham.
40 Tapi gundari, bunuh kena ate kena aku, padahal si kupeseh eme kebenaren si kubegi arah Dibata nari.+ Abraham labo bage perbahanenna.
41 Lakoken kena kai si lakoken bapak kena.” Ngaloi kalak e, “Kami labo ilahirken arah perbahanen seks si salah.* Sada ngenca Bapak kami, eme Dibata.”
42 Nina Jesus man kalak e, “Adi Dibata kin Bapak kena, pasti keleng ate kena aku,+ sebap aku reh ku jenda perban isuruh Dibata. Aku reh labo perban peratenku, tapi perban peraten Ia si nuruh aku.+
43 Engkai maka la angka kena si kukataken e? E perban la aloken kena kata-kataku.
44 Bapak kena Iblis kap, janah nggit kena ngelakoken peraten bapak kena.+ Tangtangna nari pe ia pembunuh kap,+ janah la ia tetap bas kebenaren, perban kebenaren la lit bas ia. Adi erbual ia, enggo kin bage sipatna, sebap ia perbual janah ia bapak kalak si perbual.+
45 Tapi aku, kukataken man kena kebenaren, tapi perban si e me kena la tek man bangku.
46 Ise kin arah kena nari si banci mbuktiken maka aku erdosa? Adi kebenaren nge si kucakapken, engkai maka kena la tek man bangku?
47 Kalak si reh arah Dibata nari, begikenna kap kata Dibata.+ Tapi kena labo arah Dibata nari,+ emaka la kena nggit megikenca.”
48 Jenari nina kalak Jahudi e, “Me tuhu si kataken kami ndai, ‘Kam kalak Samaria+ janah kam irasuki malekat jahat’?”+
49 Ngaloi Jesus, “Aku labo irasuki malekat jahat. Kuhamati nge Bapakku, tapi kena la hamati kena aku.
50 Labo diriku ateku si kumuliaken,+ tapi lit kap si ateNa mere kemulian man bangku janah Ia me hakimna.
51 Situhuna kukataken man kena, ise pe si ngikutken kataku, ndigan pe la ia mate.”+
52 Nina kalak Jahudi e, “Gundari enggo teh kami maka tuhu-tuhu kam irasuki malekat jahat. Abraham ras nabi-nabi enggo mate, tapi nindu, ‘Ise pe si ngikutken kataku, ndigan pe la ia mate.’
53 Me labo kam belinen asangken bapak kami Abraham si enggo mate? Nabi-nabi pe enggo mate. Ise kin akapndu bandu?”
54 Nina Jesus, “Labo lit gunana adi kumuliaken bangku. Bapakkulah si mereken kemulian man bangku,+ si kataken kena Dibata kena.
55 Labo tandai kena Ia,+ tapi aku kutandai.+ Adi kukataken la kutandai Ia, perbual kap aku bagi kena. Tapi kutandai kap Ia janah kupatuhi kataNa.
56 Meriah kel akap bapak kena Abraham perban banci pagi idahna wari kerehenku. Kerehenku e enggo idahna janah meriah akapna.”+
57 Jenari nina kalak Jahudi e, “Umurndu pe lenga lit 50 tahun, tapi enggo ka idahndu Abraham?”
58 Nina Jesus, “Situhuna kukataken man kena, ope lenga lit Abraham, aku enggo lit.”+
59 Emaka buat kalak e batu guna mbenteri Jesus, tapi cebuni ia, jenari ndarat ia arah rumah pertoton nari.
