Johanes 9:1-41
9 Sanga erdalan Jesus, idahna sekalak dilaki si pentang mulai lahirna nari.
2 Nungkun murid-muridna, “O Guru,*+ dosa ise nge si erban ia pentang mulai lahirna nari? Dosana ntah dosa orang tuana?”
3 Nina Jesus, “Ia pentang labo perban dosana ntah pe dosa orang tuana. Tapi gelah arah ia, teridah perbahanen Dibata.+
4 Sanga ciger denga wari, arus sidahiken pendahin Ia si nuruh aku,+ sebap reh me berngi janah sanga si e ise pe la banci erdahin.
5 Sanga aku i doni enda denga, aku kap terang doni.”+
6 Kenca kataken Jesus bage, cidurina taneh, adukna taneh ras cidurna e, jenari tamana ku mata dilaki si pentang e,+
7 jenari nina, “To cuci matandu i kolam Siloam” (adi iterjemahken ertina, “Isuruh”). Lawes dilaki e, cucina matana, janah sanga mulihken, enggo erpengidah ia.+
8 Jenari, nina tetangga-tetangga ras kalak si rusur ngidah dilaki si mindo-mindo e, “La kin ia dilaki si biasa kundul mindo-mindo?”
9 Piga-piga kalak ngataken, “Ue, ia kalakna.” Si deban ngataken, “Labo, mirip saja nge.” Tapi dilaki si enggo erpengidah e ngataken, “Ue, aku kalakna.”
10 Emaka sungkun kalak e ia, “Uga maka banci kam erpengidah?”
11 Nina, “Dilaki si gelarna Jesus, adukna taneh ras cidurna, jenari tamana ku mataku, janah nina, ‘To cuci matandu i kolam Siloam.’+ Emaka lawes aku janah kucuci mataku, jenari enggo erpengidah aku.”
12 Sungkun kalak e ka, “I ja dage ia?” Nina, “La kuteh.”
13 Baba kalak e dilaki si enggo erpengidah e man kalak Parisi.
14 Sanga aduk Jesus taneh ras cidurna, janah banna dilaki e erpengidah,+ rembang bas wari Sabat.+
15 Emaka sungkun kalak Parisi dilaki ndai uga maka enggo banci ia erpengidah. Ngaloi dilaki e, “Lit si tamana ku mataku, jenari kucuci mataku, dungna enggo erpengidah aku.”
16 Nina piga-piga kalak Parisi, “Ia labo arah Dibata nari perban la patuhina wari Sabat.”+ Si deban ngataken, “I ja nge banci kalak si erdosa erban mukjizat si bage!”+ Emaka la seri pendapat kalak e.+
17 Sungkun kalak e ka dilaki e, “Enggo banna kam erpengidah, jadi uga pendapatndu kerna ia?” Nina, “Ia sekalak nabi.”
18 Tapi, kalak Jahudi la tek maka ia mbarenda pentang janah gundari enggo erpengidah. Emaka dilo kalak e orang tuana.
19 Sungkunina, “Tuhu kin enda anak kena si kataken kena enggo pentang mulai lahirna nari? Uga maka gundari ia enggo erpengidah?”
20 Nina orang tuana, “Payo ia anak kami, janah ia pentang lahirna nari.
21 Tapi la teh kami uga maka gundari ia enggo erpengidah. La teh kami ise si erban ia erpengidah. Sungkunilah ia. Nggom ia galang, ia sajalah si njawapsa.”
22 Bage nina orang tuana perban mbiar ia man kalak Jahudi.+ Sebap enggo ersada arih kalak Jahudi maka ise pe si ngakui Jesus e Kristus, arus ipedarat arah ingan pulung kalak Jahudi* nari.+
23 Emaka nina orang tuana, “Nggom ia galang. Sungkunilah ia.”
24 Sekali nari dilo kalak e dilaki si enggo erpengidah e, janah nina, “Muliakenlah Dibata. Katakenlah situhuna. Teh kami maka ia kalak perdosa nge.”
25 Ngaloi ia, “Kerna ia kalak perdosa ntah lang, e labo kuteh. Sada ngenca si kuteh: Mbarenda aku pentang, tapi gundari enggo erpengidah.”
26 Nungkun ka kalak e, “Kai si lakokenna man bandu? Uga maka banci banna kam erpengidah?”
27 Nina dilaki e, “Enggo kap kukataken man kena, tapi la begiken kena. Engkai maka kena merhat denga megikenca? Ntah, jadi muridna ka kin te kena?”
28 Merawa kalak e janah ihina kalak e ia, nina, “Kamlah muridna, kami murid Musa kap.
29 Si teh kami, man Musa nge Dibata ngerana. Tapi kerna kalak si katakenndu e, la teh kami i ja nari ia.”
30 Ngaloi dilaki e, “Ngeri naring nge ah! La teh kena ja nari ia rehna, padahal enggo banna mataku erpengidah.
31 Siteh maka labo begiken Dibata kalak perdosa.+ Tapi begikenNa kalak si mbiar man baNa ras si ngelakoken peratenNa.+
32 Nai-nai nari, lenga pernah terbegi maka lit kalak si ngasup erban kalak si pentang lahirna nari erpengidah.
33 Adi la kin ia arah Dibata nari, labo ia banci erban kai pe.”+
34 Nina kalak e, “Mulai lahirndu nari pe, enggo dem kam alu dosa. Tapi gundari ajarindu ka kami?” Kenca bage, pelawes kalak e dilaki e ku darat!+
35 Begi Jesus maka dilaki e enggo pelawes kalak e. Sanga jumpa ras dilaki si enggo erpengidah e, sungkun Jesus ia, “Erkiniteken nge kam man Anak manusia?”
36 Nina, “O Pa, ise kin ia? Kataken man bangku gelah erkiniteken aku man bana.”
37 Nina Jesus, “Enggo kap idahndu ia. Situhuna, ia sangana ngerana ras kam.”
38 Nina dilaki e, “O Tuan, erkiniteken aku.” Jenari sujud dilaki e man Jesus.
39 Kenca si e, nina Jesus, “Aku reh ku doni enda guna ngakimi, gelah kalak pentang banci erpengidah,+ janah kalak si erpengidah jadi pentang.”+
40 I je lit piga-piga kalak Parisi si megi kata-kata Jesus, janah nina, “Jadi menurutndu, kami pe pentang?”
41 Nina Jesus, “Adi kena pentang, kena la erdosa. Tapi ning kena, ‘Kami erpengidah.’ Emaka tetap kena erdosa.”+
