Jop 1:1-22
1 I negri Us lit sekalak dilaki gelarna Jop.*+ Ia bujur ras setia.+ Mbiar ia man Dibata, la lakokenna kai si jahat.+
2 Anakna pitu dilaki, telu diberu.
3 Lit 7.000 biri-birina, 3.000 untana, 1.000* lembuna, janah 500 keledena.* Pelayanna pe seh kel teremna. Emaka arah kerina kalak si lit i Timur, ia si bayakna janah ihamati.
4 Anak-anakna si dilaki biasa erban pesta. Ergiliren kalak e erban pesta i rumah kalak e. Undang kalak e teluna turangna guna man ras minem ras kalak e.
5 Kenca kerina enggo dat giliren erban pesta, suruh Jop anak-anakna e reh gelah banci pebadiana kalak e. Kenca si e, bas pagi-pagi si lampas medak ia, persembahkenna korban tutungen+ guna anakna e masing-masing. Perban nina Jop, “Mungkin enggo lit lakoken anak-anakku dosa janah sumpahina Dibata bas pusuhna.” Bage rusur lakoken Jop.+
6 Bas sada wari, seh warina anak-anak Dibata si benar*+ ngadap man Jahwe,+ Setan+ pe ikut i je.+
7 Nina Jahwe man Setan, “Ja nari kam ndai?” Nina Setan man Jahwe, “Erdalan-dalan ku jah ku je engkelilingi doni.”+
8 Nina Jahwe man Setan, “Perdiatekenndu nge pelayanKu Jop? La lit si bagi ia i doni. Ia bujur ras setia.+ Mbiar ia man Dibata, la lakokenna kai si jahat.”
9 Nina Setan man Jahwe, “Nggit kin Jop patuh man Dibata adi la datna kai pe?+
10 La kin sedekah enda lindungiNdu ia,+ keluargana, ras kerina si lit bas ia? Pasu-pasuNdu ka dahinna.+ Asuh-asuhenna pe lalap reh buena.
11 Gundari, dudurken dage tanNdu janah buat kerina si lit bas ia. Pasti sumpahina Kam i lebe-lebeNdu.”
12 Kenca si e nina Jahwe man Setan, “Kerina si bas ia lit bas kuasandu, tapi ula sakitindu ia!” Emaka lawes Setan arah lebe-lebe Jahwe nari.+
13 Sanga anak-anak Jop si dilaki ras si diberu man ras minem anggur i rumah anak sintua,+
14 reh sekalak si mpeseh berita man Jop, nina, “Paksa lembu-lembu sangana mbajak janah kelede-kelede sangana nggagat i deherna,
15 rempet reh kalak Seba nyerang, buatna kerina binatang-binatang e. Bunuhna pelayan-pelayan alu pedang. Aku ngenca si selamat, emaka banci kupeseh berita e man bandu, Tuan.”
16 Sanga ngerana denga ia, reh ka si deban, nina, “Reh api arah Dibata langit nari, tutungna kerina biri-biri ras permakanna! Aku ngenca si selamat, emaka banci kupeseh berita e man bandu, Tuan.”
17 Sanga ngerana denga ia, reh ka si deban, nina, “Reh telu kelompok kalak Kaldea+ nyerang, rampasna unta-unta. Bunuh kalak e pelayan-pelayan alu pedang. Aku ngenca si selamat, emaka banci kupeseh berita e man bandu, Tuan.”
18 Sanga ngerana denga ia, reh ka si deban, nina, “Anak-anakndu si dilaki ras anak-anakndu si diberu sangana man ras minem anggur i rumah anak sintua.
19 Rempet reh angin si meter arah taneh mesawang,* entamna empat sudut rumah e. Runtuh rumah e, dabuhina anak-anakndu, emaka mate kalak e kerina. Aku ngenca si selamat, emaka banci kupeseh berita e man bandu, Tuan.”
20 Emaka tedis Jop, rigatkenna bajuna jenari cukurna bukna seh asa keri. Dung e sujud ia,
21 nina,
“Kadeku pe la lit sanga aku ndarat arah beltek mamakku,Kadeku pe la lit sanga aku mate.*+
Jahwe kap si merekenca,+ Jahwe ka si muatca.
Mbera-mbera gelar Jahwe lalap ipuji.”
22 Bas si e kerina, Jop la ngelakoken dosa janah la salahkenna Dibata.*
Cataten i teruh
^ Mungkin ertina “Segat Ate Kalak.”
^ As. “500 pasang.”
^ As. “keledena si beruna.”
^ Istilah bas bahasa Heber si ertina malekat-malekat Dibata.
^ Taneh si mbelang si jarang iingani.
^ As. “mulihken.”
^ Ntah “janah la tuduhna Dibata ngelakoken si la patut.”
