Jop 22:1-30
22 Nina Elipas+ kalak Teman e,
2 “Erguna kin manusia man Dibata?
Erguna kin kalak si erpengangka man baNa?+
3 Meriah kin ukur Si Madakuasa* bicara mehuli gia perbahanenndu?
Lit kin untungna man baNa adi lalap gia kam setia?+
4 Adi hamatindu Dibata,HakimiNa kin kam janah hukumNa?
5 Enda kerina terjadi perban jahat kel kam,La kam erngadi-ngadi ngelakoken dosa!+
6 La lit alasenna, rampasindu barang-barang seninandu jadi jaminen,Buatndu baju kalak si deban janah pediatndu ia tilanjang.+
7 La berendu inemen man kalak si latih,La berendu pangan man kalak si melihe.+
8 Kalak si megegeh mbelang tanehna,+Kalak si penting ngenca si tading i je.
9 Suruhndu diberu si enggo janda lawes la maba kai pe,Tindasndu anak si la erbapa.*
10 E me sebapna lit siding i sekelilingndu,+Si rempet-rempet reh si erban kam mbiar.
11 E me sebapna lit kegelapen si erban kam la banci ngidah,Gedap kam iban banjir.
12 La kin Dibata nge si tading bas langit si meganjangna?
Nenlah uga ganjangna kerina bintang-bintang.
13 Tapi nindu, ‘Kai kin si teh Dibata?
Banci kin hakimiNa kita bas kegelapen nari?
14 Sanga erdalan Ia bas langit si meganjangna,La banci Ia ngenen perban tutupi embun Ia.’
15 Ikutkenndu kin atendu dalan si nai,Si mbarenda idalani kalak jahat?
16 Mate kalak e sope waktuna,Bagi bangunen si ombakken banjir.+
17 Ning kalak e man Dibata si benar, ‘Ula ganggu kami!’
Janah ‘Kai kin si banci ilakoken Si Madakuasa man kami?’
18 Padahal Dibata si ndemi rumah kalak e alu si mehuli.
(Beda kel perukuren si bage ras perukurenku.)
19 Meriah pagi akap kalak si bujur ngidah si e,Tokohi kalak si la ersalah pagi kalak e, nina,
20 ‘Musuh-musuhta enggo ikernepken,Janah si tading, keri ipan api.’
21 Cubakenlah nandai Dibata, erdamelah ras Ia,Alu bage datndu pagi kai si mehuli.
22 Alokenlah undang-undang si katakenNa,Simpanlah kata-kataNa bas pusuhndu.+
23 Mulihlah kam ku Dibata Si Madakuasa, gelah banci kam makmur mulihi.+
Ambekkenlah perbahanen si la mehuli arah kemahndu.
24 Benterken emasndu ku taneh,Bage pe emas Opir+ ku celah-celah* batu.
25 Alu bage Si Madakuasa jadi emasndu,Ia jadi pirak si mejilena man bandu.
26 Sebap Si Madakuasa pagi si erban meriah ukurndu,Janah la kam mbiar ndeher ras Dibata.
27 Adi ertoto kam man baNa, begikenNa pagi kam,Janah tepatindu pagi janjindu.
28 Kerina keputusenndu berhasil pagi,Dalan-dalanndu iterangi pagi.
29 Sebap adi sombong kam ngerana, ipermelaken pagi kam,Tapi selamatkenNa pagi kalak si meteruk rukur.
30 SelamatkenNa pagi kalak si la ersalah,Emaka adi la lit perbahanenndu si jahat, pasti kam selamatkenNa.”
