Jop 24:1-25
24 “Engkai maka la tetapken Si Madakuasa wari penghakimen?+
Engkai maka kalak si nandai Ia, la ngidah wari e?
2 Lit kalak si mindahken batas taneh kalak si deban,+Tangko kalak e biri-biri janah tamana ku mbalmbalna.
3 Rampas kalak e kelede anak si la erbapa,Buat kalak e lembu jantan arah janda jadi jaminen pinjamenna.+
4 La pediatna kalak mesera erdalan arah dalan si galang,Kalak si lemah cebuni arah kalak e nari.+
5 Kalak si mesera ndarami pangan bagi kelede liar+ i taneh mesawang,*Darami kalak e pangan guna anak-anakna i gurun pasir.
6 Terpaksa perani kalak e* juma kalak,Pepulungna buah anggur arah kebun anggur kalak jahat.
7 Gedang-gedang berngi, medem kalak e la ruis.+
La lit kadena pe si banci pakena guna nutupi dagingna gelah ula bergehen.
8 Litap daging kalak e perban udan i gunung,Rapatkenna dagingna ku tebing batu perban la lit inganna cio.
9 Rampas kalak e anak si la erbapa si sangana ipepinemken.*+
Uis kalak si mesera buatna jadi jaminen pinjamenna.+
10 Terpaksa kalak e tilanjang erdalan,Kelihen kalak e sanga ngangkat hasil rani.
11 Sanga melas kel matawari, kerja keras* kalak e i kebun si lit i lereng bukit, i antara tembok-tembok batu.
Perjaki kalak e ingan meras anggur tapi muas kalak e.+
12 Kalak si menam mate ndehereng i kota,Kalak si luka parah mindo penampat,+Tapi sitik pe la diate Dibata.*
13 Lit kalak si mberontak ngelawan terang,+La tandai kalak e dalan-dalanna,Janah la ikutkenna dalan e.
14 Sanga erpagi-pagi medak pembunuh,Bunuhna kalak si lemah ras si mesera,+Sanga berngi jadi pinangko ia.
15 Perlua-lua nima-nimai wari gelap,+Nina, ‘Labo kari lit si ngidah aku!’+
Tutupina ayona.
16 Bas berngi wari bongkar kalak e rumah-rumah,Bas ciger wari cebuni kalak e.
La tandai kalak e terang.+
17 Pagi-pagi bali akap kalak e bagi berngi si seh kel gelapna,Tapi kegelapen si ngeri akap kalak, biasa saja akap kalak e.
18 Meter kel kalak e ibabaken lau.
Taneh si jadi baginna isumpahi.+
Lanai pagi kalak e mulihken ku kebun anggurna.
19 Bagi salju si enggo cair masap iban lego ras las matawari,Bage me Kuburen* nasapken kalak perdosa!+
20 Lupaken mamakna pagi ia, janah pan bernga ia.
Ndigan pe lanai ia iinget.+
Kalak si la mehuli perbahanenna, ipenggelken pagi bagi batang kayu.
21 Tindas kalak e diberu si mandul,La mehuli perbahanen kalak e man diberu si enggo janda.
22 Gunaken Dibata gegehNa guna engkernepken kalak si megegeh,Amin pe kalak e ipeganjang, la lit jaminen maka kalak e tetap nggeluh.
23 Pediat Dibata tenang ras aman akap kalak e,+Tapi perdiatekenNa kerina si lakoken kalak e.+
24 Ntisik ngenca kalak e ipeganjang, kenca si e lanai kalak e lit.+
Kalak e ipeteruk+ janah ipepulung bagi kalak si deban,Kalak e bagi gandum si ipotong.
25 Gundari, ise si banci mbuktiken aku perbual,Ntah pe mbuktiken kata-kataku salah?”
Cataten i teruh
^ Taneh si mbelang si jarang iingani.
^ Ntah banci saja “Terpaksa pepulung kalak e pangan binatang i.”
^ Ntah “ibere ASI.”
^ Ntah banci saja “meras minak.”
^ Ntah banci saja “Tapi ise pe labo isalahken Dibata.”