Jop 3:1-26
3 Kenca si e ngerana Jop, sumpahina wari lahirna.+
2 Nina Jop,
3 “Padin min ndai la lit wari kelahirenku.+
Padin min ndai la lit berngi sanga lit si ngataken, ‘Enggo lahir sekalak anak dilaki!’
4 Pediat saja wari e jadi gelap.
Pediat saja la diate Dibata wari e.
Pediat saja la lit sinar si nerangisa.
5 Pediat saja kegelapen si seh kel gelapna nguasaisa.
Pediat saja embun si mbiring nutupisa.
Pediat saja kegelapen si seh kel ngerina nutupi sinarna.
6 Pediat saja berngi e tutupi kegelapen.+
Pediat saja la lit keriahen bas wari e,Pediat saja wari e la lit bas bulan si apai pe.
7 Pediat saja la lit kalak si lahir bas berngi e,Pediat saja la lit terbegi surak keriahen bas berngi e.
8 Pediat saja wari e isumpahi kalak si numpahi,Eme kalak si banci erban buaya* medak.+
9 Pediat saja bintang erpagi-pagi jadi gelap,Pediat saja berngi e nimai terang si la pernah reh,Pediat saja berngi e la pernah ngidah sinar matawari erpagi-pagi.
10 Perban la tutup berngi e rahim mamakku,+Emaka kuidah kesusahen.
11 Engkai maka aku la mate saja sanga ilahirken?
Engkai maka aku la mate saja sanga ndarat arah rahim mamakku?+
12 Engkai maka ampu mamakku akuEngkai maka pepinemkenna aku?*
13 Adi la min ndai bage, pasti aku sangana tayang alu tenang,+Medem aku, dame kuakap+
14 Radu ras raja-raja i doni bage pe penasehat-penasehatna,Si mbangun ingan-ingan si gundari enggo runtuh,*
15 Ntah pe radu ras pangeran* si lit emasna,Si dem pirak bas rumahna.
16 Engkai maka aku la bagi bayi si mate keguguren,Bagi anak-anak si la pernah ngidah terang?
17 I kuburen, kalak jahat pe lanai mbiar.
I je kalak si latih istrahat.+
18 I je kalak si ipenjaraken tenang akapna.
Lanai begina sora kalak si maksa ia erdahin.
19 I je la lit bedana kalak si penting ras si la penting,+Budak pe bebas arah tuanna.
20 Engkai maka pediat Dibata kalak si susah tetap nggeluh,Janah berekenNa kegeluhen man kalak si rate mesui?+
21 Engkai maka kalak e la mate-mate, padahal enggo merhat kel kalak e mate?+
Darami kalak e kematen lebihen asangken ndarami erta si terbuni.
22 Meriah kel ukur kalak eSenang akapna sanga datna kuburen.
23 Engkai maka pediat Dibata kalak si papak tetap nggeluh,Eme kalak si enggo kepungNa?+
24 Ceda ate si jadi panganku,+Lalap aku ndehereng+ bagi lau si maler.
25 Sebap kai si erban aku mbiar enggo reh man bangku,Kai si erban aku nggirgir enggo terjadi man bangku.
26 La lit kedamen bas aku, la lit ketenangen ras kesenangen,Kesusahen saja si reh la erngadi-ngadi.”
Cataten i teruh
^ Bas bahasa Heber “Lewiatan.” Mungkin binatang si deban si nggeluh bas lau, si galang janah megegeh.
^ Ntah “maka berena ASI man bangku.”
^ Ntah banci saja “Si mbangun ingan-ingan si la iingani.”
^ Ntah “pejabat tinggi.”
