Jop 38:1-41
38 Kenca si e ngerana Jahwe man Jop arah angin badai,+
2 “Ise kin si la tek man keputusenKu eJanah ngerana tapi la tehna uga situhuna?+
3 Ersikaplah kam bagi sekalak dilaki.
Kusungkuni kari kam janah arus jawapndu.
4 I ja dage kam sanga Kuban doni enda?+
Kataken bangKu adi erpengangka akapndu bandu.
5 Tehndu kin ise si nentuken asa kai belangna doni enda,Janah si ngukursa alu nali pengukur?
6 I ja dage tiang-tiang si natang doni?
Janah ise kin si namaken batu utamana?+
7 I ja dage kam sanga bintang+ erpagi-pagi radu ras ersurak ermeriah ukur,Janah kerina anak-anak Dibata*+ ersurak perban riahna?
8 Ise si nutup pintu-pintu laut+Sanga mburtas ia arah sumberna* nari,
9 Sanga Kututupi ia alu embunJanah kubungkus alu kegelapen si seh kel gelapna,
10 Sanga Kuban batasnaJanah kupasang pintu ras palangna,+
11 Sanga ningKu, ‘Ngayak jenda ngenca batasndu, la kam banci lewat,Ombakndu si ergelombang arus ngadi i jenda,’ ise si erbanca?+
12 Pernah kin berendu perentah man erpagi-pagiNtah katakenndu man matawari i ja inganna terbit?+
13 Kam kin si nuruh sinar matawari lawes ku ujung-ujung doniJanah mpelawes kalak jahat?+
14 Bentuk doni berubah bagi taneh liat si icap alu meterai,Janah kerina isina jelas teridah bagi corak kain.
15 Tapi terang kalak jahat ibuat arah kalak e,Janah lanai banci cilakaina kalak si deban.
16 Pernah kin kam nusur ku sumber lautJanah erdalan-dalan bas lau si mbages?+
17 Pernah kin ituduhken man bandu gerbang kematen?+
Pernah kin idahndu gerbang si seh kel gelapna?*+
18 Tehndu kin uga belangna doni enda?+
Adi tehndu si e kerina, turiken dage man bangKu.
19 Tehndu kin ja nari rehna terang,+Janah i ja sumber kegelapen?
20 Banci kin taruhkenndu ia ku ingannaJanah tehndu dalan ku rumahna?
21 Perban kam enggo lahir janah enggo metua kel kam maka tehndu kerna si e?
22 Pernah kin kam masuk ku gudang salju,+Pernah kin idahndu gudang udan es,+
23 Si Kusimpan guna wari kesusahenEme guna wari pertempuren ras peperangen?+
24 Tehndu kin ja nari rehna terang*Janah ja nari angin timur rembus ku doni?+
25 Ise si mbagi-bagiken udan mederJanah ise si erban dalan man embun badai?+
26 Ise si erban udan meder nusur ku ingan si la lit i je manusia,Eme ku taneh mesawang* si la iingani manusia?+
27 Ise si erban taneh si gersang jadi litapJanah erban turah dukut i je?+
28 Lit kin bapak udan,+Janah ise kin bapak namur?+
29 Ise kin mamak es?
Ise kin si ngelahirken salju si nusur arah langit?+
30 Ise si erban lau bas laut bali bagi batu,Janah banna beku bagin si arah datas laut si mbages?+
31 Banci kin iketndu bintang Kima*Janah lepaskenndu iketen bintang Kesil?*+
32 Banci kin babaindu ndarat bintang-bintang* i bas musimna,Janah arak-arakndu bintang As* ras anak-anakna?
33 Tehndu kin undang-undang si ngatur langit+Janah banci kin banndu langit* erkuasa nandangi doni?
34 Banci kin serko kam man embunGelah penusurna udan si meder man bandu?+
35 Banci kin kirimndu kilap?
Reh ka kin ia mulihi janah nina, ‘Enda kami!’
36 Ise kin si mereken kepentaren man embun,*+Janah ise kin si mereken pengertin man langit?*+
37 Ise kin si perban pentarna ngasup ngkira embun,Janah ise kin si ngasup mbalikken ingan-ingan lau i langit,+
38 Si erbanca abu jadi kubangJanah erban taneh ergumpal?*
39 Banci kin kam si erburu guna ndatken pangan man singa,Jenari besur banndu anak-anak singa si melihe,+
40 Sanga gempang ia bas ingannaJanah cebuni guna nyerang arah inganna nari?
41 Ise kin si nikapken pangan man burung gagak,+Sanga nderkuh anak-anakna mindo penampat man DibataJanah lawes kalak e ku jah ku je perban la lit nakanna?
Cataten i teruh
^ Istilah bas bahasa Heber si ertina malekat-malekat Dibata.
^ As. “beltek doni.”
^ Ntah “gerbang bayangen kematen.”
^ Ntah banci saja “kilap.”
^ Taneh si mbelang si jarang iingani.
^ Mungkin kelompok bintang Kartika (Pleiades) bas kelompok bintang Taurus.
^ Mungkin kelompok bintang Belantik (Orion).
^ As. “Mazarot.”
^ Mungkin kelompok bintang Beruang Galang (Ursa Mayor).
^ Ntah banci saja “Ia.”
^ Ntah banci saja “manusia.”
^ Ntah banci saja “perukuren.”
^ Ntah “ergulbak.”
