Jop 41:1-34
-
Ceritaken Dibata kerna kehebaten Lewiatan (1-34)
41 “Banci kin tangkapndu buaya*+ alu kawil?
Banci kin iketndu dilahna alu nali?
2 Banci kin tamandu nali bas igungna?
Banci kin cucukndu rahangna alu pengkawit?*
3 Nggit kin ia mindo perkuah atendu,Lembut kin ia ngerana man bandu?
4 Nggit kin ia erban perjanjin ras kam,Gelah banci ia jadi budakndu rasa lalap?
5 Nggit kin kam main-main ras ia bagi main-main ras perik?
Nggit kin kam ngiket ia gelah banci main-main ras anakndu si diberu?
6 Nggit kin perbinaga ndayakensa ntah pe nukursa?
Nggit kin kalak e motongsa jenari bagi-bagikenna antara kalak e?
7 Banci kin pantemkenndu lembing ku kulitna+Janah cucukndu takalna alu tombak ikan?
8 Cuba kuitndu ia sekali sajalah gia,Asa ndigan pe labo kam lupa sanga ertarung ras ia. Pasti lanai kam nggit ngulihisa.
9 Sia-sia nge adi lit kalak si merhat nangkap ia.
Ngidahsa saja pe enggo mbiar* kam banna.
10 La lit si pang ngganggu ia.
Emaka ise si pang nentang Aku?+
11 Ise kin si leben mere man bangKu maka arus Kubere ka ia mulihi?+
JangKu kap kerina si lit i teruh langit.+
12 Lalap ateKu cerita kerna nahena,Kerna gegehna ras dagingna si iban alu cara si luar biasa.
13 Ise si ngasup mbuka bajuna?
Ise si pang masuk ku rahangna si sangana nganga?
14 Ise si ngasup nguak babahna?
Ipenna tuhu-tuhu erban mbiar.
15 Bas gurungna lit sisik si erbaris-baris,*Kerina sisikna leket janah rapat.
16 Rapat kel sisik-sisikna e,Emaka angin pe la banci masuk ku celah-celahna.
17 Perban leketna sisik-sisikna e ersada,Emaka la banci ipesirang.
18 Adi kebacihen ia teridah sinar,Matana ersinar bagi matawari terbit.
19 Ndarat sinar arah babahna nari,Arah sinar e ndarat perciken api.
20 Ndarat asap arah lubang igungna,Bagi ranting si itutung bas tungku.
21 Kesahna erban rara jadi gara,Janah ndarat api si gurlah arah babahna.
22 Megegeh kel kerahungna,Emaka la lit si pang ndeher ras ia.
23 Kulit beltekna seh kel piherna,Bali bagi logam.
24 Jantungna piher bagi batu,Seh kel piherna bagi batu gilingen si arah teruh.
25 Adi tedis ia, kalak si megegeh pe mbiar,Janah nggirgir kalak e.
26 Pedang kai pe la banci naluken ia,Tombak, panah, ras senjata si debanna pe la banci.+
27 Besi bali akapna bagi nggala*Janah tembaga bali akapna bagi kayu si enggo lapuk.
28 Anak panah si ibenterken man bana la banci erban ia kiam,Batu si ibenterken man bana, bagi dukut-dukut si kerah saja ngenca akapna.
29 Palu-palu bagi dukut-dukut si kerah akapna,Adi ipantemken lembing man bana, tawa ia.
30 Beltekna bali bagi pecahen-pecahen barang si iban arah taneh liat nari,Adi lewat ia bas kubang, bekasna bali bagi ingan ngerik.*+
31 Banna lau si mbages bagi lau si luam bas panci.
Banna laut bali bagi minak si itangger bas kudin.
32 Sanga ia erlangi, rugup lau si bentasina,Lau si mbages teridah mbentar bagi uban.
33 La lit si bagi ia i doni enda,Ciptaken Dibata ia janah la lit kebiarenna.
34 Jerlengna kerina si sombong,Ia kap raja arah kerina binatang buas.”
Cataten i teruh
^ Bas bahasa Heber “Lewiatan.”
^ As. “duri.”
^ Ntah “ndabuh.”
^ Ntah banci saja “Si ibanggakenna eme sisikna si erbaris-baris.”
^ Ntah “jerami.”
