Jop 42:1-17
42 Kenca si e nina Jop man Jahwe,
2 “Gundari enggo kuteh ngasup Kam ngelakoken kai pe.
Rencana-rencanaNdu pasti lakokenNdu.+
3 Nindu, ‘Ise kin si la tek man keputusenKu e janah ngerana ia tapi la tehna uga situhuna?’+
Payo tuhu, aku ngerana kerna kerina si luar biasa kel si la kuangka,Tapi la lit pengertinku.+
4 Nindu, ‘Ngerana ateKu, begiken Aku.
Kusungkuni kari kam janah arus jawapndu.’+
5 Mbarenda enggo kubegi kerna Kam,Tapi gundari, mataku enggo ngidah Kam.
6 Nyesal aku perban kai si enggo kubelasken,+Eme sebapna kundul aku i datas abu dapur ras abu taneh.”+
7 Kenca dung Jahwe ngerana man Jop, nina Jahwe man Elipas kalak Teman e,
“Merawa Aku man kam bage pe man duana temanndu,+ sebap kataken kena si la tuhu kerna Aku,+ la bagi Jop pelayanKu.
8 Emaka gundari buatlah pitu lembu jantan ras pitu biri-biri jantan, jenari jumpailah Jop pelayanKu gelah persembahkenna korban tutungen guna kepentingen kena. Jop pelayanKu pagi si ertoto guna kena.+ Pasti Kubegiken pagi totona gelah la kena ihukum perban kebodohen kena, sebap kataken kena si la tuhu kerna Aku, la bagi Jop pelayanKu.”
9 Emaka Elipas kalak Teman e ras Bildat kalak Suah bage pe Sopar kalak Maama ngelakoken kai si perentahken Jahwe man kalak e. Janah begiken Jahwe toto Jop.
10 Kenca dung totoken Jop teman-temanna,+ masapken Jahwe kesusahen Jop+ janah mulihi ka banNa ia bayak. Bereken Jahwe man bana dua kali lipat buen asangken si mbarenda.+
11 Kerina senina ras turang Jop bage pe teman-temanna+ reh ndahi ia janah ras-ras kalak e man i rumahna. Kalak e pe ikut erceda ate kerna kesusahen si pediat Jahwe terjadi man Jop janah apuli kalak e ia. Masing-masing kalak e mereken sen ras sada cincin emas.
12 Emaka pasu-pasu Jahwe me Jop lebihen asangken si sebelumna+ janah lit 14.000 biri-birina, 6.000 untana, 2.000 lembuna, ras 1.000 keledena.+
13 Anakna pe lit ka pitu dilaki ras telu diberu.+
14 Anakna si diberu si pertama banna gelarna Jemima, si peduaken Kesia, janah si nguda Keren Hapuh.
15 I belang-belang negri e la lit diberu si bagi anak Jop e jilena. Bereken bapakna erta warisen man kalak e teluna bali bagi man turangna.
16 Kenca si e, nggeluh Jop 140 tahun nari janah idahna denga kempu-kempuna bage pe anak-anak kempuna seh ku keturunenna si peempatken.
17 Puas ia nggeluh janah gedang umurna, dungna mate ia.
