Jop 5:1-27
5 “Erlebuhlah kam! Lit kin si ngaloi kam?
Man malekat si apai kam mindo penampat?
2 Sebap perasan sakit hati banci munuh kalak si motu,Perasan cemburu banci erban kalak si gendek ukurna dungna mate.
3 Pernah kuidah kalak si motu jadi bayak,Tapi inganna tading rempet isumpahi.
4 Anak-anakna la ilindungi,Janah kalak e isiksa i gerbang kota,+ la lit si nelamatkenca.
5 Kai si iperanina, kalak si melihe si manca,Arah peren duri nari pe ibuati kalak e,Erta-ertana rampasi kalak e.
6 Si la mehuli labo turah arah abu,Janah masalah pe labo turah arah taneh.
7 Bagi bunga api pasti kabang arah api nari,Bage me kegeluhen manusia pasti dem alu masalah.
8 Tapi kupindo penampat Dibata,Janah kuceritaken masalahku man baNa,
9 Eme man Ia si ngelakoken kai si la ngasup kita ngangkaisa ras si ngelakoken kai si luar biasa,Kerina si luar biasa si la terkira buena.
10 PenusurNa udan ku doni,BerekenNa lau ku datas taneh.
11 Kalak si meteruk peganjangNa,Kalak si sedih pe peganjangNa gelah banci iselamatken.
12 Rencana kalak si licik gagalkenNa,Emaka kai si dahiken kalak e la berhasil.
13 BanNa kalak si pentar ndabuh bas jebakenna sendiri,+Emaka gagal rencana kalak e.
14 Gelapen kalak e paksa ciger wari,Dadap-dadap kalak e sanga ciger, tempa-tempa wari enggo berngi.
15 SelamatkenNa kalak arah ise pe si dilahna bagi pedang.
SelamatkenNa kalak si mesera arah penindasen nari.
16 BerekenNa arapen man kalak si perlu penampat,Tapi sompelNa babah kalak jahat.
17 Ermeriah ukur kap kalak si persingeti Dibata.
Emaka ula tulak pengajaren* arah Si Madakuasa!
18 Baluti Dibata kap luka si enggo banNa.
TambariNa si enggo ipenggelkenNa.
19 Pasti kam selamatkenNa arah bencana si la erngadi-ngadi reh,Amin pe enem kali ntah pe pitu kali bencana e reh man bandu.
20 SelamatkenNa* kam arah kematen sanga musim kelihen,Bage pe arah kuasa pedang sanga terjadi peperangen.
21 Pasti kam ilindungi arah kata-kata si nakiti si bagi cambuk,+Pasti kam la mbiar ikernepken sanga reh bencana.
22 La kam mbiar ikernepken ntah pe kelihen,La kam perlu mbiar binatang buas.
23 Bas jumandu la melala batu,*Binatang buas erdame ras kam.
24 Pasti dame pagi akapndu bas kemahndu,La lit sada pe asuh-asuhenndu si bene.
25 Enterem pagi anakndu,Keturunenndu bali buena bagi dukut i doni.
26 Megegeh denga pagi kam seh asa kam mate.
Bagi tangke gandum si ipepulung bas musimna.
27 Si enda kerina enggo teh kami perban enggo pelajari kami,Emaka begikenlah janah teklah kam kerna si e.”
Cataten i teruh
^ Ntah “disiplin.”
^ Ntah “TebusNa.”
^ Ntah “Batu-batu bas juma erban perjanjin ras kam.”
